ආණ්ඩුව ගේන්න මුල් වුන අයම වරායේ නැගෙනහිර ජැටිය ගැන කියන කතාව..

Nov 10, 2026 at 04:11 PM

|

Lanka Leader

(මේ ආණ්ඩුව ගේන්න මුල් වුන අයම වරායේ නැගෙනහිර ජැටිය සම්බන්ධ  අනුරගේ කථාව එක්ක එරෙහි වීමක් පෙන්නනවා. පහළ සටහන ඒ සම්බන්ධවයි) 

මේ ආණ්ඩුව කොළඹ වරායෙ නැගෙනහිර ජැටියෙ ප්‍රශ්ණයේදි ආපහු අපිව මුලටම අරගෙන යනවා.. බොහොම කණගාටුදායක තත්වයක්..

මතක විදිහට 2008 දි විතර වෙන්න ඕනෑ.. මේ කොළඹ දකුණු සමස්ථ ව්‍යාපෘතිය පටන් ගන්න එහි දියකඩනය ඉදිකරන්න ආසියානු සංවර්ධන බැංකුව ලෝන් එක පාස් කරන්න දාපු කොන්දේසිවල තිබුනා මේ ව්‍යාපෘතියේ ඉදිවෙන පර්යන්ත තුනම පෞද්ගලික අංශයට දෙන්න ඕනෑ කියලා.. 

නමුත් එවකට මහින්ද රාජපක්ෂ ආණ්ඩුව සහ වරාය අධිකාරිය වෙනුවෙන් පෙනී හිටපු ප්‍රියාත්බන්දු වික්‍රමලා මේ කොන්දේසියට විරුද්ධව සාර්ථකව කරුණු ඉදිරිපත් කරලා එම පර්යන්ත තුනෙන් එකක් වරාය අධිකාරිය යටතේ තබා ගන්න හැකි ආකාරයට කොන්දේසිය වෙනස් කර ගත්තා.. ඒක එම රාජපක්ෂ පාලනය ප්‍රශංසාවට ලක් කරන්න ඕනෑ හේතුවක් කියලා වෙන කවුරුවත් නෙවෙයි වත්මන් ජනාධිපති අනුර දිසානායක පහුගිය නැගෙනහිර ජැටිය අරගලය කාලෙ පාර්ලිමේන්තුවේදිම කිව්වා.. මතකද දන්නෑ දැන්..

ඊට පස්සේ එකල රාජපක්ෂ පාලනය එම ව්‍යාපෘතිය යටතේ ඉදිවන පර්යන්ත තුනෙන් උපායමාර්ගිකව වටිනාම පර්යන්තය වන නැගෙනහිර ජැටිය වරාය අධිකාරිය යටතේ තබා ගන්න පියවර ගත්තා.. නැගෙනහිර ජැටිය උපායමාර්ගිකව සහ ආර්ථික ශක්‍යතාවයෙන් සෙසු පර්යන්තවලට වඩා ඉදිරියෙන් ඉන්නෙ එම පර්යන්තය සහ SAGT පර්යන්තය එකාබද්ධ කරලා ගොඩනැගිය හැකි එකවර ජැටියේ තුන් පැත්තක නැව් නවත්වන්න පුළුවන් කොළඹ වරායේ එකම බොක්ස් ටර්මිනල් එක බවට එම දැවැන්ත පර්යන්තය පත්වෙන නිසා..

මේ ආකාරයට නැව් විශාල ප්‍රමාණයක් එකවර මෙහෙයුම් කිරීමට හැකිවීම නිසා ප්‍රධාන මාර්ගයේ විශාල නෞකා (Mother Ships) සහ ප්‍රාදේශීය වශයෙන් බහාළුම් බෙදාහරින කුඩා පෝෂක නෞකා (Feeder Ships) මෙහෙයුම් සිද්ධ කරන්න මේ බොක්ස් ටර්මිනල් එකකට විශාල හැකියාවක් ලැබෙනවා.. ඒ නිසා නෞකා සමාගම්වලට විශාල නැව් එක පර්යන්තයකත් කුඩා ෆීඩර් නැව් තවත් පර්යන්තයකත් මෙහෙයුම් කිරීමට සිදුවීමේදී දැරිය යුතු Inter Terminal Transit (ITT) නැත්නම් අන්තර් පර්යන්ත බහාළුම් හුවමාරු වියදම් බොහෝ දුරට කපා හැරීමට අවස්ථාව ලැබෙනවා.. ඒක තමයි මේ බොක්ස් ටර්මිනල් කන්සෙප්ට් එකේ නෞකා සමාගම්වලට තියෙන ප්‍රධාන මූල්‍ය වාසිය..

සිංගප්පූරුව අද තනිකරම මැච් එක ගහන්නෙ මේ බොක්ස් ටර්මිනල් කන්සෙප්ට් එකෙන්.. ඔවුන් සතුව Pasir Panjang වරායේ අතිවිශාල බොක්ස් ටර්මිනල් දෙකක් තිබුණා.. දැන් ඔවුන් තවත් දැවැන්ත බොක්ස් ටර්මිනල් දෙකක් ඔවුන්ගේ නවතම Tuas වරායේ සංවර්ධනය කරමින් ඉන්නවා.. ඒ නිසා එම කලාපයේ සෙසු වරායවලට සිංගප්පූරුව සමඟ තරඟකිරීම පහසු නෑ.. අපේ කොළඹටත් එවැනි පර්යන්තයක් ලැබීම භාග්‍යයක්..

නමුත් කණගාටුවට මේ ආණ්ඩුවට වරාය සම්බන්ධයෙන් එහෙම තිරසාර දැක්මක් තියෙනවා කියලා පෙනෙන්න නම් නෑ.. ඔවුන්ට මේ කොළඹ බොක්ස් ටර්මිනල් එක හැකි ඉක්මනින් ස්ථාපිත කරන්න ඕනෑ කියන එක ඔවුන්ගේ න්‍යාය පත්‍රයේ ප්‍රමූඛව නැති බව පේන්නෙ.. කොටින්ම කොළඹ වරායෙ මොනවද වෙන්න ඕනෑ කියන එක ඔවුන් කොම්පැණි කිහිපයකට පවරලා ඒ එන ඩීල් තෝරන වෙන්දේසි බ්‍රෝකර්ලා වගේ හැසිරෙමින් ඉන්න ආකාරයක් තමයි පෙනෙන්න තියෙන්නෙ..

අර කලිනුත් කිව්වා වගේ කොළඹ වරායේ වටිනාම පර්යන්තය වෙන නැගෙනහිර ජැටිය අත්පත් කරගන්න ඉන්දියාවෙ අදානි සමාගම සහ ඔවුන්ගේ දේශීය ඒජන්තයා වගේම වර්තමානයේ SAGT පර්යන්තයේ ප්‍රධාන කොටස්කරු ජෝන් කීල්ස් සමාගම ඒකාබද්ධව ඉන්දියානු රජයේ රාජතාන්ත්‍රික මැදිහත්වීමක් පවා යොදවලා ලංකාවෙ කලින් තිබුණු ආණ්ඩුවලට දැඩි බලපෑමක් කරේ ඔවුන් මේ පර්යන්තයේ ඇති විශේෂිත වාසිය නිසාම තමයි.. තමන්ගේ අතේ දැනටම තියෙන SAGT එක සහ ECT එක යාකරලා බොක්ස් ටර්මිනල් එක හදා ගන්න එක තමයි එම පාර්ශවයේ අරමුණ උනේ..

නමුත් ලංකාවෙ සියළු ප්‍රගතිශීලි බලවේග පක්ෂ පාට භේද නැතුව ඒකාබද්ධව ඒ උත්සහය පරාජය කලා.. නමුත් මෙි ආණ්ඩුව බන්දේසියේම තියලා ඒ ජය පාවා දෙන්න යනවා වගේ තමයි ජනාධිපතිවරයාගේ කතාවෙන් අපිට අවබෝධ වෙන්නෙ..

මේ බොක්ස් ටර්මිනල් කන්සෙප්ට් එක කොළඹදි යතාර්ථයක් වෙන්න නම් 2030 වෙනකොට ඒ පර්යන්ත දෙකම එකම පාර්ශවයක් අතට යන්න ඕනෑ.. ඒ වරාය අධිකාරිය නොවේ නම් ඒ පාර්ශවය කවුද..? 

2030 දි ගිවිසුම් කාලය සම්පූර්ණ වීමෙන් පසු SAGT පර්යන්තය වරාය අධිකාරිය භාරයට නැවත පත් නොවේ නම් එහි හිමිකාරිත්වය දිගටම තියෙන්නෙ ජෝන් කීල්ස් පාර්ශවයට.. එතකොට මිලියන 3ක වාර්ශික බහාළුම් හැසිරවීමේ ධාරිතාව තියෙන ECT එකේ 20%කින් ඒ මිලියන 3ම කරන්න අධිකාරියට හයියක් නැති නිසා එහෙම කරන්න ජනාධිපතිවරයා ගේන්න කතා කරන අරුම පුදුම ආයෝජකයා ජෝන් කීල්ස්ලද නැත්නම් එයාලගෙ පාට්නර් අදානිද එහෙමත් නැත්නම් වෙන කෙනෙක්ද..? 

වෙන බාහිර කෙනෙක් නම් බොක්ස් ටර්මිනල් කන්සෙප්ට් එක එතනින්ම තව දශක ගණනාවකට ලෙෆ්ට් නේද..? 

අනිත් පැත්තෙන් තමන්ට අත්කර ගන්නට බැරි නම්, බටහිර ජැටිය හිමි අදානිලාට ⁣සහ ජෝන් කීල්ස්ලාට තමන්ගේ තරගකරුවෙක් වෙන නැගෙනහිර ජැටියේ හැදෙන බොක්ස් ටර්මිනල් එක ලෙෆ්ට් වෙන එක ජයක් නොවෙයිද.. ඒක ලෙෆ්ට් කරන්නම තම ධන බලයෙන් SAGT එක ⁣නැවත අධිකාරියට නොදී ඉන්න ජෝන් කීල්ස්ලා උපරිම උත්සහය නොගෙන ඉදීද..?

ඒ උත්සහයට හසු නොවී ඉන්න තරම් මේ ආණ්ඩුවට කොළඹ වරාය සම්බන්ධයෙන් දැක්මක් හෝ වැඩපිළිවෙළක් කාට හෝ පෙනෙන්න තිබේද..?

පුළුවන් නම් ආණ්ඩුවේ කවුරු⁣ හෝ වගකිව යුත්තෙක් මේවට තමන්ගේ ස්ථාවරය පැහැදිලි කරන්න.. විවෘත අභියෝගයක්.. 

වරාය ඇමතිකම දීලා පසුව ඒක බිමල් රත්නායකගෙන් ගලවන කොටම මට අමුත්තක් දැණුනා.. කසකාරයා ලෙස ජනාධිපතිම පදනම් විරහිත හේතු කියමින් මේවා දීලා මොකද්ද පරිවර්තනයක් කරන්න ඕනෑ කියන එකෙන් පෙරහැර ගැන හිතාගන්න මට නම් තියෙන්නෙ දෙවිදියයි..

එකක්.. ගෙඩිය පිටින් බන්දේසියේ තියලා මේ පර්යන්ත දෙකම අදානි ජෝන් කීල්ස් හවුලට දීලා අපිට පස්ස පැත්ත පෙන්නන එක..

නැත්නම් එන ලොකුම ඩීල් එකක් බලලා එක කෑල්ලක් වෙන එකෙකුට අනික ජෝන් කීල්ස්ලටම දීලා කොළඹ වරායෙ බොක්ස් ටර්මිනල් එක තව දශක ගණනාවකට ලෙෆ්ට් කරන එක.. 

ඔය දෙකෙන් කොයික උනත් අදානි මැතිඳුලා කොළඹදි දිණුම්.. ඒක ෂුවර්..

මෙිවා කියන්නෙ වෙන්න යනවා කියලා පේන දේ බකංනිලං ඉන්න බැරි නිසා.. 

ඇත්තටම මේවා දිහා දැක්කම ඇති වෙන්නෙ තරහක් නෙවෙයි දුකක්.. මේ ආණ්ඩුව ආපු ගමන් පළමු බීමෙදි මම මිත්‍රයන්ට කිව්වෙ මොනවා නැතත් වරායෙ වැඩේ මෙයාලා ගොඩදාවි කියලා.. ඔය ගොඩදා ගෙන එනවා වගේ පේන්නෙ..

Wishwa Chinthana  (Copied )

(Nuwan Monaravila ගේ මුහුණු පොතින්)