දේශපාලනයේ ධර්ම - විනය..
“විනයො නාම සාසනස්ස ආයු - විනයෙ ඨිතෙ සාසනං ඨිතං හොති” කියන සංගීතිකාරක මහ රහතන් වහන්සේලාගේ වචනය අපි හැමෝම වගේ අහලා තියෙනවා. “විනය යනු ශාසනයේ ආයුෂයයි, විනය පවතින තාක් කල් ශාසනය පවතිනවා” කියන අර්ථය තමයි ඒ උතුම් වචනයේ තියෙන්නේ.
ධර්මයෙන් අපිට විමුක්තිය අත්පත් කරගන්න පුළුවන්. ධර්මය ආරක්‍ෂාවෙලා පවතින්නේ ශාසනයේ උදව්වෙන්. ධර්මය නෙළුම් මලක් නම් ශාසනය තමයි ඒ මල පිපෙන විල. ඉතින් මල පවතින්න නම් විල ආරක්‍ෂා කරගන්න ඕන. ඒ කියන්නේ, ධර්මය පවතින්න නම් ශාසනය ආරක්‍ෂා කරගන්න ඕන.
උඩින් උපුටා දක්වපු සංගීතිකාරක මහ රහතන්වහන්සේලාගේ වචනයට අනුව ශාසනය රැකගන්න නම් විනය රැකගන්න ඕන. ඉතින් බෞද්ධ අපිට අපේ විමුක්ති අරමුණ (නිර්වාණ අරමුණ) සාක්‍ෂාත් කරගන්න නම් ශාසනය රකින විනය පිළිපදින්න සිද්දවෙනවා. මේ උතුම් වචනය අදාළ පැවිදි විනයට විතරක් නම් නෙවෙයි. මේ ආර්ය උපදේශනය ගිහි විනයටත් අදාළයි. ගිහි - පැවිදි දෙපාර්ශ්වයේ විනය එන්න එන්න ම පිරිහෙනවා නම් ශාසනය බිඳවැටෙන්න වැඩි කාලයක් ගතවෙන්නේ නෑ.
මම මේ ලිපියෙන් කියන්නේ අපේ නිර්වාණ අරමුණ සාක්‍ෂාත් කරගැනීම සඳහා උපකාරී වෙන ධර්ම - විනය ගැන නෙවෙයි. ඒ ආර්ය මග පෙන්වීම මත පදනම් වෙලා අපි ගොඩ නගාගන්න ඕන දේශපාලන ධර්මයක් සහ දේශපාලන විනයක් ගැනයි මම මේ ලිපියෙන් කියන්නේ.
ධර්මයක් (මතවාදයක්) නැතුව දේශපාලනය කිරීම තනිකර ම අඳුරේ කනාපල්ලන් ගැහීමක් විතරයි. කිසිම දේශපාලන මතවාදයක් නැතුව ආණ්ඩු කිරීමෙන් සහ ආණ්ඩුවලට බලපෑම්කිරීමෙන් තමයි අද අපේ රටේ මේ තරම් මහා පිරිහීමක්, විනාශයක් ඇතිවෙලා තියෙන්නේ. මම මේ ගැන කීප වතාවක් ම කියලා තියෙනවා. දැන් අපේ රටේ මතවාදී දේශපාලනයක් වෙනුවට පුද්ගලවාදී දේශපාලනයක් ඉස්සරහට ඇවිල්ලා. ඒ හේතුවෙන් මහින්දගේ පක්ෂය, රනිල්ගේ පක්ෂය, සජිත්ගේ පක්ෂය, දිනේෂ්ගේ පක්ෂය, විමල්ගේ පක්ෂය, චම්පිකගේ පක්ෂය, දිලිත්ගේ පක්ෂය, ගම්මන්පිලගේ පක්ෂය, බත්තරමුල්ලේ සීලරතන හාමුදුරුවන්ගේ පක්ෂය, අක්මීමන දයාරතන හාමුදුරුවන්ගේ පක්ෂය වගේ ඒවා ඇතිවෙලා.
දැන් එක්සත් ජාතික පක්ෂය, ශ්‍රී ලංකා නිදහස් පක්ෂය, මහජන එක්සත් පෙරමුණ වගේ සංවිධානාත්මක දේශපාලන කඳවුරු හුදෙක් ම නාමික ඒවා බවට පත් කරලා. ජනතා විමුක්ති පෙරමුණ, ලංකා සමසමාජ පක්ෂය, ශ්‍රී ලංකාවේ කොමියුනිස්ට් පක්ෂය වගේ සංවිධාන කීපයක් තාමත් ඉතුරුවෙලා තියෙනවා. ජනතා විමුක්ති පෙරමුණ මුල්වෙලා හදාගත්ත මාලිමාව (ජාතික ජන බලවේගය) අනුර දිසානායක කියන තනි පුද්ගලයා පැත්තට තල්ලුවෙමින් තියෙනවා. ඉතින් ඊ ළඟ ජනාධිපතිවරණයෙන් පස්සේ ජවිපෙ - මාලිමා සංවිධානගත දේශපාලනයත් ඉවරවෙයි.
චීන පොදු නිෂ්පාදන පක්ෂය (චීන කොමියුනිස්ට් පක්ෂය) එක දිගට ම තමන්ගේ දේශපාලන ධර්මය (මතවාදය) අලුත් කරගන්නවා. මාක්ස්වාදය, මාක්ස් - ලෙනින්වාදය පොතේගුරුවාදයක් බවට පත් කරගෙන ඉස්සරහට යන්න බැරි බව චීන පොදු නිෂ්පාදන පක්ෂයට සම්බන්ධ අය දන්නවා. මාඕ ත්ස-තුංගේ කාලේ ඉඳලා ම මාක්ස් - ලෙනින්වාදය චීනකරණය කිරීමේ කටයුත්ත සිද්දවුණා. ඒ මාර්ගයෙන් ඉතාමත් ශක්තිමත් “චීන ලක්‍ෂණ සහිත මාක්ස්වාදයක්” ඇති කරගත්තා. දැන් ඒ චීන මාක්ස්වාදය චීනයේ සංස්කෘතික ඇගැයීම් එක්ක ගැලැප්පීමේ කාර්යයත් ආරම්භ කරලයි තියෙන්නේ.
මේ විදිහට චීන පොදු නිෂ්පාදන පක්ෂය විසින් හදලා දෙන චීන ලක්‍ෂණ සහිත මාක්ස්වාදය තේරුම්ගන්න, ඒ මතවාදයේ ගුරුහරුකම් ලබන්න වැඩිදුර අධ්‍යාපනයක් නැති, සමාජ - ආර්ථික කරුණු ගැන සාමාන්‍ය දැනීමක් විතරක් තියෙන මිනිස්සුන්ටත් පුළුවන්. ඉතින් ඒ මතවාදයේ මගපෙන්වීම යටතේ ඉතාමත් බලවත් දේශපාලන බලයක් නිර්මාණය කරගන්න චීනයට පුළුවන්වෙලා තියෙනවා.
තමන් පිළිගන්න මාක්ස් - ලෙනින්වාදය චීනකරණය කිරීම හරහා ඉතාමත් ශක්තිමත් දේශපාලන මතවාදයක් ඇති කරගැනීමෙන් විතරක් පක්ෂයට ආරක්‍ෂාවෙන්න බැරි බව චීන පොදු නිෂ්පාදන පක්ෂයේ අය දන්නවා. විනයෙන් තමයි පක්ෂයේ ආයුෂ තීරණය කෙරෙන්නේ. ඉතින්, චීන පොදු නිෂ්පාදන පක්ෂය විසින් තමන්ගේ සාමාජිකයන්ගේ සහ කාඩර්වරුන්ගේ විනය රැකීමේ සහ වර්ධනය කිරීමේ ඉතාමත් ශක්තිමත් වැඩපිළිවෙළක් ක්‍රියාත්මක කරනවා. රතු හමුදාව හදන්නත් කලින් මාඕ ත්ස-තුං විසින් මේ විනය වැඩපිළිවෙළ හඳුන්වලා දුන්නා. දැන් වර්තමානයට ගැලැපෙන විදිහට, අදාළ විනය රෙගුලාසි වෙනස් කරමින් සහ වර්ධනය කරමින් තියෙනවා.
උක්ත අවබෝධය මත පදනම් වෙලා, “විනයො නාම සාසනස්ස ආයු” කියන සංගීතිකාරක මහ රහතන්වහන්සේලාගේ වචනය අනුව පිහිටලා “විනයො නාම රාජනීතිපක්ඛස්ස ආයු” කියලා ප්‍රකාශයක් හදාගන්න අපිට පුළුවන්. එහෙමත් නැතිනම්, වචන ප්‍රමාණය අඩු කරලා “විනයො නාම පක්ඛස්ස ආයු” කියලා මේ ප්‍රකාශය කෙටි කරගන්නත් අපිට පුළුවන්.
ඉතාමත් ශක්තිමත් මතවාදයකින් මගපෙන්වන, විධිමත් විනය වැඩපිළිවෙළකින් මෙහෙයවන පක්ෂයක් බිඳ වැටෙන්නේ නෑ. මේ ගැන නො සළකා, හුදෙක් ම පුද්ගලවාදී සාධක විතරක් ඉස්සරහට දාලා හදන පක්‍ෂ ඉතාමත් ඉක්මනින් ම පිරිහෙනවා, විනාශවෙනවා. මහින්ද රාජපක්ෂ ජනාධිපතිතුමාගේ ආනුභාවය කොඩිය බවට පත් කරගෙන හදපු ශ්‍රී ලංකා පොදුජන පෙරමුණට (පොහොට්ටුවට) අත්වෙච්ච ඉරණම ගැන හිතලා බලන්න. ඒ පක්ෂය තනිකර ම පුද්ගලවාදී එකක්. ඒ පක්ෂයට මතවාදයක් තිබුණේ නෑ. “ජාතිකවාදය, ජාතිකවාදය” කියලා ජප කරන පිරිසක් පොහොට්ටුව පස්සෙන් හිටියත් ඒකෙන් වැඩක් වුණේ නෑ. ඒ මන්තරය මතුරපු අය වුනත් තමන්ගේ මතවාදය හරියාකාරව සූත්‍රගත කරලා තිබුණේ නෑ.
මතවාදයක් තියෙන්න ඕන පක්‍ෂයකට ඉස්සරහින් මිසක් පිටිපස්සෙන් නෙවෙයි. ඉතින් “මහින්ද මහත්තයා” පස්සෙන් ඉඳගෙන “ජාතිකවාදය, ජාතිකවාදය” කියලා මන්තරයක් ජප කළාට වැඩක් වුණේ නෑ. එහෙම සද්දයක් බලවත් වුනත් පුද්ගලවාදී පක්‍ෂ ඒවා හුදෙක් ම තමන්ගේ ආභරණ බවට පත් කරගන්නවා. ඒ මතාවද නිකම් ම නිකම් තොරොම්බල් බවට පත් කරගන්නවා. මෙහෙම හෙළුව වහන මතවාද හදලා වැඩක්වෙන්නේ නෑ.
මහින්ද රාජපක්ෂ ආනුභාවයේ එල්ලිලා දිව්‍ය ලෝකයට යන්න සෙට්වුණේ කිසිම දේශපාලන විනයක් නැති දේශපාලනඥයෝ පිරිසක්. ඉතින් “225 ම හොරු” වගේ ඉතාමත් සරල හංවඩු ගැහිලිවලටත් ඒ අය කොටුවුණා. ඒ කියපු කතා බොරු කියලා කිව්වත්, ඒවා මඩ කියලා කිව්වත් ඒ කළු පැල්ලම් නැති කරගන්න කිසිම කෙනෙක්ට බැරිවුණා. ඉතින් දැන් තියෙන මාලිමා ආණ්ඩුව කොච්චර අකාර්යක්‍ෂම වුනත් ඒකට විරුද්ධව ජන බලයක් එකතු කරගන්න පොහොට්ටුවට බැරිවෙලා.
මේ විනයක් නැති දේශපාලන භාවිතාව රනිල්ගේ පක්‍ෂයටත්, සජිත්ගේ පක්‍ෂයටත්, දිනේෂ්ගේ පක්‍ෂයටත්, විමල්ගේ පක්‍ෂයටත්, චම්පිකගේ පක්‍ෂයටත්, දිලිත්ගේ පක්‍ෂයටත්, ගම්මන්පිලගේ පක්‍ෂයටත්, බත්තරමුල්ලේ සීලරතන හාමුදුරුවන්ගේ පක්‍ෂයටත්, අක්මීමන දයාරතන හාමුදුරුවන්ගේ පක්‍ෂයටත් ඒ විදිහට ම අදාළයි. ඉතින් ඒ අයට තනියෙන් හරි එකතුවෙලා හරි බලය අත්පත් කරගැනීම ඉතාමත් අමාරු කාර්යයක් බවට පත්වෙලා තියෙනවා.
චීනයේ දේශපාලන ශක්තිය ගැන කියපු කතාව ඉරානයටත් යේමනයේ අන්සාර් අල්ලාහ් ව්‍යාපාරයටත් අදාළයි. ඇමෙරිකාවයි ඊශ්‍රායලයයි එකතුවෙලා කොච්චර මිනීමැරුවත් ඉරානයේ දේශපාලන බලයට හානියක් සිද්දවෙලා නෑ. ඒ අය ඉතාමත් ශක්තිමත් විදිහට හතුරාට මුහුණදෙනවා. මේ වෙද්දි, යේමනය ලෝකයේ දුප්පත් ම රාජ්‍යය බවට පත්වෙලා. ඒත් අන්සාර් අල්ලාහ් ව්‍යාපාරයේ දේශපාලන බලය ඉතාමත් ශක්තිමත් එකක්. ඒ බලය ඉස්සරහ සවුදි අරාබිය වගේ බලවත්තු පවා අසරණ වෙලා. ඉරානයටත් යේමනයේ අන්සාර් අල්ලාහ් ව්‍යාපාරයටත් මග පෙන්නන ඉතාමත් ශක්තිමත් දේශපාලන මතවාද තියෙනවා. ඒ වගේ ම, ඒ අයගේ දේශපාලන විනයත් ඉහළ ම මට්ටමක තියෙනවා.
අපි මේ මූලික අවශ්‍යතා ගැන හිතන්නේ නැතුව නායකයෙක් (දියසේන කෙනෙක්) ඇවිල්ලා අපිට මේ දුකෙන් මුදවාගනියි කියලා හිතනවා. මේක ඉතාමත් අබෞද්ධ කල්පනාවක්, මිථ්‍යා දෘෂ්ටික ප්‍රාර්ථනාවක් කියන එකවත් මේ අය හිතන්නේ නෑ.
දේශපාලන පටන්ගන්න ඕන ඉතාමත් පැහැදිළි, නිරවුල් මතවාදයකින්. දේශපාලනය ඉස්සරහට යන්න ඕන ඉතාමත් විධිමත් විනය වැඩපිළිවෙළකින්. මතවාදයක් නැති දේශපාලනය රැවටිල්ලක්. විනයක් නැති දේශපාලනය විනාශයක්.
- ආචාර්ය වරුණ චන්ද්‍රකීර්ති
සම්බන්ධිත පුවත් | Related News
ප්‍රධාන පුවත්
ශ්‍රී ලංකාවේ යෝජිත සංවිධානාත්මක අපරාධ වැළැක්වීමේ පනත් කෙටුම්පත ගැන එක්සත් ජාතීන්ගේ සංවිධානයෙන් අනතුරු ඇඟවීමක්..
මර්ධනය හමුවේ තානාපති සේවයේ නිරුවත හා මර්ධනයේ පැත්ත මාරුවීම..
අනුරාධපුර පූජාභූමියට කරන්න යන දේ ගැන ගැසට් එකත් අරන් මහ රෑ මාධ්‍ය කැඳවා කස්සප හිමියන් හෙළිකළ කරුණු මෙන්න..
පළාත් සභා 04ක මැතිවරණය ලබන වසරේ ජූලි මාසයේ පැවැත්වීමට අවධානය.. විපක්‍ෂයේ හිටපු පිරිසිදු හොද මැති ඇමතිලා මාලිමාවෙන්..?
නි. ඇමති නාමල්ගේ බස් නාටකයේ වෙස් මුහුණු ගැලවේ..
නව රජයක් පිහිටුවීමේ වගකීම නෙතන්යාහුගේ ප්‍රධාන ප්‍රතිවාදියාට..
රුවන්වැලි මහා සෑය අසල සත්‍යග්‍රහයක් ආරම්භ කිරීමට යෑමේදී උණුසුම් තත්ත්වයක්..
හම්බන්තොට තෙල් පිරිපහදුව අර්බුදයක: ඩොලර් බිලියන 3.7 ක ගිවිසුම අවලංගු කිරීමට නිර්දේශ..
“යුද වියදම් කපා හැර වැඩකරන ජනතාව වෙනුවෙන් වහා පෙනී සිටිනු” - සෑන්ඩර්ස්ගෙන් ඩිමොක්‍රටික් පක්ෂයට සැර අවවාදයක්
පැය කිහිපයකදී කොළඹට මිලිමීටර් 129ක වර්ෂාපතනයක්..
ශ්‍රීලනිපය පිළිගත් දේශපාලන පක්ෂයක් ලෙස සැලකිය නොහැකියි.. - මැතිවරණ කොමිසම දන්වයි..
කෝටි10 කැබිනට් තීරණය හැංගුවේ ඇයි?.. ලැබෙන ප්‍රතිලාභ මොනවාද?.. - ප්‍රශ්න වැලක් මතු වන තිරය පිටුපස කතාව
ප්‍රංශයේ වෘත්තීය සමිති 5ක් එක්ව රට පුරා දැවැන්ත වර්ජනයක..
අනුරාධපුර පූජාභූමි සංවර්ධනයට අදාළව උපදේශක සභාවක් පත් කිරීම ගැන ප්‍රසාදය පළ කරනවා.. - දේශහිතෛෂී ජාතික ව්‍යාපාරයේ මහ ලේකම් වෛද්‍ය වසන්ත බණ්ඩාරගෙන් ජනපතිට ලිපියක්..
අනුරාධපුර පූජා නගර සංවර්ධන ක්‍රියාවලිය ආශ‍්‍රිතව පැන නැගී ඇති ගැටලූ සහ මහජන විරෝධය නිරාකරණය කිරීම සම්බන්ධයෙන් දේශහිතෛෂී ජාතික ව්‍යාපාරයෙන් ජනපතිට ලිපියක්..
ඇමෙරිකානු මැතිවරණ තීන්දුව හමුවේ ලෝක දේශපාලනයේ දැවැන්ත පරිවර්තනයක්..