ආණ්ඩුව කතානායක විශ්වාසභංගය කුදලාගෙන දිව්වේ ඇයි...?

Nov 4, 2026 at 09:58 AM

|

Lanka Leader

මතක තියාගන්න හැන්සාඩ් එකෙන් හැංගුවට "ජනතා අධිකරණයෙන්" හැංගෙන්න බෑ...

පාර්ලිමේන්තුවේ මහජන නියෝජිතයන් 44 දෙනෙකු අත්සන් තබා, ලේකම් ජනරාල්වරයා වෙත නිල වශයෙන් භාරදී, ඔක්තෝබර් 12 වැනිදා නිල වශයෙන් "න්‍යාය පුස්තකයට" (Order Book) පවා ඇතුළත් කළ කතානායක වෛද්‍ය ජගත් වික්‍රමරත්න මහතාට එරෙහි විශ්වාසභංග යෝජනාව එක රැයකින් න්‍යාය පත්‍රයෙන් අතුගා දැමීමට ආණ්ඩුව ක්‍රියා කරා..

"අධිකරණයට අපහාස වීම" (Sub judice) වැනි බොළඳ තාක්ෂණික සහ නීතිමය ලේබල් අලවමින්, ප්‍රජාතන්ත්‍රවාදී සම්ප්‍රදායන් උඩුයටිකුරු කරමින්, විපක්ෂයේ භාෂණයේ නිදහස සහ වරප්‍රසාද පෑගීමට වත්මන් ආණ්ඩුව කටයුතු කළේ ඇයිද යන්න පිළිබඳව රටට හෙළිදරව් කළ යුතුය..

විශ්වාසභංගයෙන් මතු කළ ප්‍රධාන චෝදනා මොනවාද..?

විපක්ෂය විසින් ඉදිරිපත් කළ චෝදනා 50 කින් යුත් මෙම විශ්වාසභංග යෝජනාවට ඇතුළත් වූ ප්‍රධානතම බරපතළ කරුණු කිහිපයක් මෙසේය:

🔴 අල්ලස් හෝ දූෂණ චෝදනා විමර්ශන කොමිෂන් සභාව (CIABOC) මඟින් කතානායකවරයාට එරෙහිව සිදුකරනු ලබන බරපතළ දූෂණ විමර්ශනවලට ඔහු එම ධූරයේ රැඳී සිටීම මඟින් සෘජු බලපෑමක් එල්ල වීම.

🔴 අල්ලස් කොමිසමේ විමර්ශන ක්‍රියාත්මක වෙමින් පවතින පසුබිමක, කතානායකවරයාගේ උපදෙස් මත ඔහුගේ පෞද්ගලික ලේකම්වරයා හරහා එම විමර්ශනවලට සහ ඒවායේ අන්තර්ගතයන්ට බලපෑම් කිරීමට උත්සාහ කිරීම.

🔴  පාර්ලිමේන්තු ස්ථාවර නියෝග අපක්ෂපාතීව ක්‍රියාත්මක නොකර, ආණ්ඩු පක්ෂයේ මන්ත්‍රීවරුන්ගේ විෂමාචාර සහ නුසුදුසු හැසිරීම් මඟහරිමින්, විපක්ෂ මන්ත්‍රීවරුන්ගේ අදහස් දැක්වීමේ අයිතිය සීමා කරමින් පක්ෂග්‍රාහීව කටයුතු කිරීම.

ඇතුළු සමහර කරුණු ශිෂ්ඨසම්පන්න සමාජයක කතා කළ නොහැකි තරම් ජුගුප්සාජනකය.. හිරිකිතය.. ලැජ්ජය.

දූෂණ සහ විෂමාචාර ක්‍රියාවලට ලක්ව ඇති බවට බරපතළ සැකයන් පවතින කතානායකවරයෙකුව ආරක්ෂා කිරීමට ආණ්ඩුව සෘජුවම මැදිහත් වුවහොත්, ඉන් තමන්ගේ ඊනියා පිරිසිදු දේශපාලන ප්‍රතිරූපයට සහ ප්‍රතිපත්තියට දරුණු හානියක් සිදුවන බව ආණ්ඩුව හොඳින්ම දනී. 

මේ විශ්වාසභංගය හරහා කතානායකවරයාගේ විෂමාචාරයන් රට හමුවේ හෙළිදරව් වීමත් සමඟම, ඔහුව රකින්නට ආණ්ඩුවට සිදුවුවහොත්, එම "විෂමාචාරයේ කොටස්කරුවන්" බවට තමන්ද පත්වන බව ආණ්ඩුව දනී..

තමන්ගේ නිරුවත වැසීමට ඇති එකම ක්‍රමය විවාදය මඟහැරීම බව ඔවුන් තීරණය කළේ එබැවිනි..

එමෙන්ම.., මේ වනවිටත් වත්මන් ආණ්ඩුවේ ප්‍රමුඛ පෙළේ මැති ඇමතිවරුන් රැසකට එරෙහිව විවිධ මූල්‍ය වංචා සහ දූෂණ චෝදනා එල්ල වෙමින් පවතී. 

කලින් සිටි කතානායකවරයාද බොරු උපාධි වංචාවක් නිසා තනතුර අතහැර යන්නට සිදු වූ අයෙකි..

මෙවැනි සන්දර්භයක, වත්මන් කතානායකවරයාට එරෙහිව දූෂණ චෝදනා විවාද වුවහොත් ඔහුගේ "ව්‍යාජ සුදු පිරුවටයද" මුළුමනින්ම ගැලවී යන බව පැහැදිලිය. 

ආණ්ඩුවේ සහ කතානායකවරයාගේ මෙම ඒකාබද්ධ වංචනික හා දූෂිත ස්වභාවය පාර්ලිමේන්තුව තුළ නිරුවත් වීම වළක්වා ගැනීමට ආණ්ඩුව දැඩි බියක් දක්වයි. එබැවින් මෙම විශ්වාසභංගය ඉදිරිපත් කිරීමට ඉඩ නොදී යට ගැසුවේ සමස්ත ආණ්ඩුවේම දූෂිත ස්වරූපය ආරක්ෂා කරගැනීමේ නින්දිත කුමන්ත්‍රණයක ප්‍රතිඵලයක් ලෙසය..

ඒවගේම, කතානායකවරයාට එරෙහිව විශ්වාසභංගයේ අඩංගු චෝදනා 50 මොනවාද? ඒවා පාර්ලිමේන්තු සභාගර්භය තුළ විවාදයට ලක්වූවා නම්, ඒ සෑම චෝදනාවක්ම නිල වශයෙන් "හැන්සාඩ් ගත" (Hansard) වීමට නියමිතව තිබුණි. 

හැන්සාඩ් වාර්තාවක් යනු මකාදැමිය නොහැකි, ඉතිහාසයට ඉතිරිවන නිල රාජ්‍ය ලේඛනයකි. 

එමෙන්ම එම සජීවී විවාදය මාධ්‍ය හරහා සමාජගත වීම වැලැක්විය නොහැක. අල්ලස් හෝ දූෂණ විමර්ශන කොමිසම මඟින් පවා විමර්ශනය වන බරපතළ දූෂණ චෝදනා රටේ ඉහළම පුටුවක් දරන පුද්ගලයෙකුට එරෙහිව නිල වශයෙන් සටහන් වීම වැලැක්වීම සහ එම චෝදනා මහජනතාව අතරට යාම තදින්ම අවහිර කිරීම ආණ්ඩුවේ සහ කතානායකවරයාගේ ඒකායන අරමුණ වී තිබේ.

එම නිසා පාර්ලිමේන්තු කටයුතු පිළිබඳ කාරක සභාව යොදාගනිමින්, චෝදනා සංශෝධනය කරන ලෙස බල කරමින්, විවාදයට දින ලබාභනොදී මඟහැරීම ප්‍රජාතන්ත්‍රවාදයට එල්ල කළ මරුපහරකි. 

න්‍යාය පුස්තකයට ඇතුළත් කිරීමට පෙර කතානායකවරයාට හෝ ලේකම්වරයාට මෙහි නීත්‍යානුකූලභාවය ගැන ප්‍රශ්නයක් නොතිබුණේ ඇයි...? 

චෝදනා පත්‍රය ප්‍රසිද්ධ වීමත් සමඟ ආණ්ඩුව මෙලෙස කලබල වූයේ ඇයි...? 

උත්තරය පැහැදිලිය.., ඔවුන් චෝදනාවලට මුහුණදීමට බියය..

ආණ්ඩුව පාර්ලිමේන්තු සභාගර්භය තුළ මන්ත්‍රීවරුන්ගේ කටවල් වැසුවද, මහජනතාවගේ කන් සහ ඇස් වැසිය නොහැක. පාර්ලිමේන්තුව තුළ විවාද කිරීමට ඉඩ නොදුන් මෙම විශ්වාසභංග යෝජනාව දැන් ගෙන යා  යුත්තේ ජනතාව අතරටය.

කතානායකවරයාට එරෙහි චෝදනා 50 ම එකින් එක මාධ්‍ය හමුවේ රටටම හෙළිදරව් කළ යුතුය.

සිවිල් සංවිධාන එකමුතුවෙන් සම්මන්ත්‍රණ පවත්වා, මෙම දේශපාලන සහ ව්‍යවස්ථාපිත දූෂණය පිළිබඳව ජනතාව දැනුවත් කළ යුතුය.

නිල හැන්සාඩ් වාර්තාවට ඇතුළත් වීමට ඉඩ නොදුන් චෝදනා පත්‍රය ඩිජිටල් අවකාශය තුළ "මහජන හැන්සාඩ් එකක්" බවට පත්කරමින් වයිරල් (Viral) කළ යුතුය.

පාර්ලිමේන්තු බහුතරයේ බලයෙන් විශ්වාසභංග යෝජනා කුණුකූඩයට දැමිය හැකි වුවද, සමස්ත රටක මහජනතාව නියෝජනය කරන "ජනතා අධිකරණය" හමුවේ චූදිතයන් වීමට ආණ්ඩුවටත් කතානායකවරයාටත් සිදුවන දිනය වැඩි ඈතක නොවේ...

- නිලන්ත සත්සර ගමගේ

(මුහුණු පොතින් උපුටා ගන්නා ලදී)