පොහොර වෙනුවට බොරු සහතික එපා.. 2026 මාස් කන්නය ආරම්භයේදීම ගොවීහු දැඩි අර්බුදයක.. - අනුරාධ තෙන්නකෝන්

Nov 2, 2026 at 05:21 AM

|

Lanka Leader

2026/27 මාස් කන්නයේ වගා කටයුතු දිවයින පුරා ආරම්භ වී තිබුණද, කෘෂිකර්ම ක්ෂේත්‍රයේ පවතින නිසි කළමනාකරණයක් නොමැතිකම සහ දත්තවල පවතින ගැටලු හේතුවෙන් මෙවරද දැඩි පොහොර සහ බීජ හිඟයකට මුහුණ දීමට සිදුවනු ඇතැයි ජාතික ගොවිජන එකමුතුවේ සභාපති අනුරාධ තෙන්නකෝන් මහතා පවසයි. 

කොළඹදී පැවැති මාධ්‍ය හමුවකදී අදහස් දක්වමින් ඒ මහතා සඳහන් කළේ මෙවර මාස් කන්නයේදී හෙක්ටයාර් 853,000 කට ආසන්න භූමි ප්‍රමාණයක වගා කිරීමට සැලසුම් කර ඇති බවයි.

කෘෂිකර්ම දෙපාර්තමේන්තුව සහ ගොවිජන සංවර්ධන දෙපාර්තමේන්තුව අතර කාලාන්තරයක් තිස්සේ පවතින දත්ත පිළිබඳ මතභේද මෙවරද විසඳී නොමැති වීම හේතුවෙන් රටට අවශ්‍ය සැබෑ පොහොර ප්‍රමාණය නිසි ලෙස ගණනය කර නොමැති බව ඒ මහතා පෙන්වා දෙයි. 

මේ යටතේ මඩ පොහොර (TSP) මෙට්‍රික් ටොන් 8,000 කට ආසන්න ප්‍රමාණයක් සහ යූරියා පොහොර මෙට්‍රික් ටොන් 200,000 කට අධික ප්‍රමාණයක් අවශ්‍ය වුවද, රේගු වාර්තා අනුව පසුගිය ජූනි මාසයේ සිට ඔක්තෝබර් මස දක්වා දිවයිනට ගොඩබා ඇත්තේ ඉතා සුළු පොහොර ප්‍රමාණයකි. 

හෝමුස් සමුද්‍ර සන්ධියේ පවතින තත්ත්වයන් හමුවේ පොහොර නැව් පැමිණීම ප්‍රමාද වී ඇති අතර, රජය විසින් පෞද්ගලික අංශයට මෙට්‍රික් ටොන් 80,000 ක් ගෙන්නීමට කැබිනට් අනුමැතිය ලබා දුන්නද තවමත් අවශ්‍ය තරම් පොහොර ප්‍රමාණයක් රට තුළ නොමැති බව හෙතෙම අනාවරණය කළේය.

"ඇමැතිවරුන් සහ නිලධාරීන් පොහොර ඕනෑ තරම් තියෙනවා කිව්වට මහ පොළොවේ ඒ තත්ත්වය නෑ. රුපියල් 15,000 ක් වෙනකම් පොහොර හොණ්ඩරයක මිල ඉහළ ගිහින්. ඊට අමතරව ඩීසල් මිල වැඩිවීම සහ බීජ වී හිඟය නිසා වගාව පටන් ගන්නකොටම ගොවියා අසරණ වෙලා" යැයි තෙන්නකෝන් මහතා සඳහන් කළේය. 

රජය විසින් ලබාදෙන රුපියල් 25,000 ක පොහොර සහනාධාර මුදල වගා කටයුතු ආරම්භ කරන මුල් සති දෙක ඇතුළත ගොවීන්ගේ ගිණුම්වලට බැර විය යුතු බවත්, පසුගිය යල කන්නයේ අස්වැන්න විකුණා ගැනීමට නොහැකිව අම්පාර, අනුරාධපුර සහ පොළොන්නරුව වැනි දිස්ත්‍රික්කවල ගොවීන් තවමත් අසීරුතාවයෙන් පසුවන බවත් හෙතෙම පෙන්වා දුන්නේය.

මෑත කාලයේ පැවැති වර්ෂාපතනය සහ පවතින කාලගුණික තත්ත්වයන් හමුවේ සිදුවන වගා හානි සඳහා තවමත් වන්දි ගෙවනු ලබන්නේ 2017 වසරේ චක්‍රලේඛ අනුව බව පෙන්වා දුන් ඒ මහතා, වත්මන් නිෂ්පාදන පිරිවැයට ගැලපෙන පරිදි එම වන්දි මුදල් සහ චක්‍රලේඛ වහාම සංශෝධනය කළ යුතු බවද අවධාරණය කළේය.

මීට අමතරව, අනුරාධපුර පූජනීය නගරයේ භෞතික සැලැස්ම සම්බන්ධයෙන් මෑතකදී ඇතිව තිබෙන සංවාදය පිළිබඳව අදහස් දැක්වූ ඒ මහතා, ඓතිහාසික හා පුරාවිද්‍යාත්මක නටබුන් ආරක්ෂා කරමින් පූජා භූමිය සංවර්ධනය කළ යුතු බව කියා සිටියේය. 

අනුරාධපුර අටමස්ථානය සහ රුවන්වැලි මහා සෑය ඇතුළු පූජනීය භූමි පද්ධතියේ පරිසර පද්ධතිය සහ බෞද්ධ උරුමයේ ගෞරවය සුරක්ෂිත වන පරිදි සියලු සංවර්ධන කටයුතු සිදුවිය යුතු අතර, පූජනීය නගරය ආශ්‍රිතව කුඹුරු හා රක්ෂිත ඉඩම් අනවසරයෙන් අත්පත් කරගනිමින් ගොඩකිරීමේ සිදුවීම් සම්බන්ධයෙන් නිසි පරීක්ෂණ පවත්වා ගොවිජන සංවර්ධන හා වැව් සංරක්ෂණ පනත්වලට අනුකූලව ක්‍රියා කළ යුතු බවද අවධාරණය කෙරිණි. අවස්ථාවාදී දේශපාලන අරමුණු වෙනුවෙන් නොව, බුද්ධ ශාසනයට සහ පූජනීය නගරයට හානියක් නොවන පරිදි විනිවිදභාවයෙන් යුතුව අදාළ සංවර්ධන කටයුතු සිදු කිරීමට රජය මැදිහත් විය යුතු බව එම සංවිධානය වැඩිදුරටත් පෙන්වා දෙයි