කවුරු කෑගැහුවත් ආණ්ඩුව PSTA ගේනවා.. - ශමීන්ද්‍ර ෆර්ඩිනැන්ඩුගෙන් බරපතළ අනාවරණයක්

Oct 31, 2026 at 08:48 AM

|

Lanka Leader

ත්‍රස්තවාදය වැළැක්වීමේ පනත (PTA) අහෝසි කරමින් රජය විසින් ගෙන ඒමට යෝජිත "ත්‍රස්තවාදයෙන් රාජ්‍ය ආරක්ෂා කිරීමේ පනත" (PSTA) හිටපු පනතටත් වඩා බරපතල හා දැඩි ස්වරූපයක් ගන්නා බව ප්‍රවීණ මාධ්‍යවේදී ශමීන්ද්‍ර ෆර්ඩිනැන්ඩු මහතා පෙන්වා දෙයි.

"දිවයින" යූටියුබ් නාලිකාව සමඟ පැවති සම්මුඛ සාකච්ඡාවකදී ඔහු මේ බව සඳහන් කළ අතර, මෙහිදී වර්තමාන දේශපාලන තත්ත්වය, යෝජිත නව නීති සහ මාධ්‍ය නිදහස සම්බන්ධයෙන් පුළුල් විශ්ලේෂණයක් ඉදිරිපත් කළේය.

ශමීන්ද්‍ර ෆර්ඩිනැන්ඩු මහතා පෙන්වා දෙන පරිදි, යෝජිත නව පනත යටතේ කිසිදු සාක්ෂියක් නොමැතිව වුවද, සැකපිට පුද්ගලයෙකු මාස දෙකක කාලයක් අධිකරණයට ඉදිරිපත් කිරීමකින් තොරව රඳවා තබා ගැනීමට හැකියාව ලැබේ. 

එමෙන්ම, අවශ්‍ය වුවහොත් එම රඳවා තබාගැනීමේ කාලය වසරක් දක්වා දීර්ඝ කිරීමට ද මෙමඟින් ප්‍රතිපාදන සැලසෙන බව ඔහු කියා සිටී. ජාතික ජන බලවේගය මැතිවරණ සමයේදී ත්‍රස්තවාදය වැළැක්වීමේ පනත සම්පූර්ණයෙන්ම ඉවත් කරන බවට පොරොන්දු වුවද, බලයට පත්වීමෙන් පසු ඊට සමාන හෝ වඩා දැඩි නීති ගෙන ඒම රටේ ප්‍රජාතන්ත්‍රවාදයට සහ මාධ්‍ය නිදහසට එල්ල වන බරපතල අභියෝගයක් බව ඔහු අවධාරණය කරයි.

මෑතකදී හෝමාගම පොලිස් අත්අඩංගුවේදී සිදුවූ පුද්ගල ඝාතනය දැඩි ලෙස දෝෂදර්ශනයට ලක් කළ ඒ මහතා, වර්තමාන රජය යටතේද බන්ධනාගාර සහ පොලිස් භාරයන්හි රඳවා සිටින පුද්ගලයන්ට අත්වී ඇති ඉරණම බරපතල ගැටළුවක් බව සඳහන් කළේය. එසේම, රජයේ මෙම ක්‍රියාමාර්ග සහ ඉදිරි ගමන පාලනය කිරීමට හෝ නිසි ලෙස පියවර ගැනීමට තරම් වත්මන් විපක්ෂය ශක්තිමත් නොවීම රටේ අනාගත දේශපාලනයට බලපාන ප්‍රධාන දුර්වලතාවයක් බව ඔහු පෙන්වා දුන්නේය.

ඉන්දීය ආධාර යටතේ අනුරාධපුර පූජා භූමිය සංවර්ධනය කිරීමේ ව්‍යාපෘතිය සම්බන්ධයෙන්ද ඔහු මෙහිදී අදහස් දැක්වීය. මෙවැනි සංස්කෘතික හා ආගමික වශයෙන් ඉතා සංවේදී කාරණා සම්බන්ධයෙන් රජය වඩාත් කල්පනාකාරී විය යුතු බවත්, අනවශ්‍ය ගැටුම්කාරී තත්ත්වයන් මඟහරවා ගැනීමට බලධාරීන් වගබලා ගත යුතු බවත් ඔහු වැඩිදුරටත් කියා සිටියේය.