ඉරානය සමඟ පවතින යුදමය තත්ත්වය සඳහා අමෙරිකානු ඩොලර් බිලියන 200 කට වඩා වැඩි මුදලක් අනුමත කරන ලෙස අමෙරිකානු ආරක්ෂක මූලස්ථානය හෙවත් පෙන්ටගනය ධවල මන්දිරයෙන් ඉල්ලා ඇති බව විදෙස් මාධ්‍ය වාර්තා කරයි.

ඉරානය සහ කටාර් එක්ව පවත්වාගෙන යන ඉරානයේ දකුණු පාර්ස් ගෑස් සංකීර්ණයට එල්ල කරන ලද ඊශ්‍රායල ප්‍රහාරය කටාර් විදේශ අමාත්‍යාංශය හෙළා දැක තිබේ. පාර්ස් ගෑස් සංකීර්ණයට එල්ල කළ ප්‍රහාරය “ගෝලීය බලශක්ති ආරක්ෂාවට තර්ජනයක්” බව අමාත්‍යාංශය පැවසීය.

ලොව විශාලතම ස්වභාවික වායු නිධිය ආශ්‍රිතව පිහිටි ඉරාන බලශක්ති මධ්‍යස්ථානයකට එල්ල වූ ගුවන් ප්‍රහාරයත් සමඟ ලෝක වෙළෙඳපොළේ බොරතෙල් බැරලයක මිල අමෙරිකානු ඩොලර් 110 දක්වා ඉහළ ගොස් තිබේ.

ඉස්ලාමීය විප්ලවවාදී ආරක්ෂක බලකාය සෞදි අරාබිය, එක්සත් අරාබි එමීර් රාජ්‍යය සහ කටාර් රාජ්‍යන්හි ඛනිජ තෙල් ආශ්‍රිත පහසුකම් වලින් ඉවත්ව සිටින ලෙස එම රටවල මහජනතාවට අනතුරු අඟවා තිබේ.

ඉරානයට අයත් දකුණු පාර්ස් (South Pars) ස්වභාවික වායු නිධියට එල්ල වූ ඊශ්‍රායල ප්‍රහාරයට ප්‍රතිප්‍රහාරයක් ලෙස, පර්සියානු ගල්ෆ් කලාපයේ පිහිටි තෙල් සහ ගෑස් මධ්‍යස්ථාන වෙත ප්‍රහාර එල්ල කරන බවට ඉරානය ප්‍රකාශ කර තිබේ.

ලොව විශාල ස්වාභාවික ගෑස් නිදිය ලෙසින් සැලකෙන 'South Pars/North Dome Gas-Condensate field' සංකීර්ණයේ ඉරානයේ විසින් පාලනය කරන 'South Pars' ප්‍රදේශයට ගුවන් ප්‍රහාරයක් එල්ල වී තිබේ.

යූඑස්එස් ජෙරල්ඩ් ආර් ෆෝඩ් නෞකාවේ ඇති වූ ගින්නක් හේතුවෙන් අමෙරිකානු නාවික භටයින්ට තුවාල සිදු වී සෙබළුන්ගේ නිදන ඇඳන් 100 ක් විනාශ වී ඇති බවද විදෙස් මාධ්‍ය වාර්තා පවසයි. යුද මෙහෙයුමකදී ලොව විශාලතම ගුවන් යානා ප්‍රවාහන නෞකාවට හානි ගෙන දුන් නවතම අනතුර මෙය බව යුද විශේෂඥයෝ පවසති.

එක්සත් අරාබි එමීර් රාජ්‍යයේ ආරක්ෂක අමාත්‍යාංශයට අනුව, එක්සත් අරාබි එමීර් රාජ්‍යයේ ගුවන් ආරක්ෂක පද්ධති විසින් , මාර්තු 17 වන දින ඉරාන බැලස්ටික් මිසයිල 10 ක් සහ ඩ්‍රෝන යානා 45 ක් විනාශ කරනු ලැබ තිබේ.

ඉරානයේ පළිගැනීමේ ප්‍රහාරයේ විභව ඉලක්ක ඊශ්‍රායල විදුලි බලාගාර පහක් වේ.