AI භීතියකින් වෝල් ස්ට්‍රීට් කැළඹෙයි.. - ගූගල්හි වෙළඳපල අගය ඩොලර් බිලියන 500කින් පහතට..

Oct 30, 2026 at 10:23 AM

|

Lanka Leader

කෘත්‍රිම බුද්ධි (AI) තාක්ෂණය සඳහා අධික ලෙස මුදල් ආයෝජනය කිරීම සහ එහි ප්‍රධාන ආදායම් මාර්ගවලට එල්ල වී ඇති බලපෑම හේතුවෙන් වෝල් ස්ට්‍රීට් (Wall Street) කොටස් වෙළඳපල ආයෝජකයින් අතර ඇති වූ භීතියත් සමඟ ගූගල් හි මව් සමාගම වන ඇල්ෆබෙට් (Alphabet) හි වෙළඳපල වටිනාකම ඩොලර් බිලියන 500කට වඩා පහත වැටී ඇති බව බීබීසී පුවත් සේවය පවසයි.

මෙම වසරේ අවසාන කාර්තුමය මූල්‍ය වාර්තා නිකුත් කිරීමත් සමඟ, ගූගල් හි කොටස් අගය 13%කින් පමණ පහත වැටී මාස හයක අවම මට්ටමට ළඟා වී ඇති බවයි වාර්තා වෙන්නේ.

එහි ප්‍රධාන සෙවුම් යන්ත්‍රයට AI සාරාංශ (AI Summaries) එකතු කිරීම නිසා දැන්වීම් අලෙවිය අඩුවීම සහ ලාභය 25%කින් පහත වැටීම මීට ප්‍රධාන හේතුව වී ඇති බව සඳහන්.

මෙම සතියේම මූල්‍ය වාර්තා ප්‍රකාශයට පත් කළ ඇමසන් (Amazon) සහ මයික්‍රොසොෆ්ට් (Microsoft) යන තාක්ෂණික දැවැන්තයින් ද AI තරගයේ රැඳී සිටීම සඳහා දැවැන්ත ලෙස මුදල් වියදම් කරන බව නිවේදනය කර සිටියේය.

ඒ අනුව, ඇල්ෆබෙට් (Google): සමස්ත ආදායම 25%කින් (ඩොලර් බිලියන 127.6 දක්වා) ඉහළ ගියද, AI වෙනුවෙන් කළ අධික වියදම් නිසා ඩොලර් බිලියන 9කට වැඩි සෘණාත්මක මුදල් ප්‍රවාහයක් (Negative Cash Flow) වාර්තා වී තිබේ.

ඇමසන් (Amazon): විකුණුම් 11%කින් (ඩොලර් බිලියන 201 දක්වා) ඉහළ ගියද, ඩොලර් බිලියන 42ක දැවැන්ත සෘණාත්මක මුදල් ප්‍රවාහයක් වාර්තා වීමත් සමඟ කොටස් අගය 6%කින් පහත වැටී ඇත.

මයික්‍රොසොෆ්ට් (Microsoft): ආදායම 19%කින් (ඩොලර් බිලියන 92.3 දක්වා) වර්ධනය වී, AI භාවිතය 500%කින් ඉහළ ගියද, ආයෝජකයින්ගේ අනාගත අවිනිශ්චිතතාවය හේතුවෙන් කොටස් අගය 1%කට ආසන්න ප්‍රමාණයකින් පහත වැටී තිබේ.

තාක්ෂණික සමාගම් AI වෙනුවෙන් විශාල වශයෙන් මුදල් යෙදවුවද, එමඟින් කෙටි කාලීනව ලැබෙන ලාභය සහ පවතින ප්‍රධාන ව්‍යාපාරවලට වන හානිය පිළිබඳව වෝල් ස්ට්‍රීට් ආයෝජකයින් දැඩි කනස්සල්ලෙන් පසුවන බවයි විශ්ලේෂකයෝ පෙන්වා දෙන්නේ.