අමානා ටකාෆුල් සමාගමට එරෙහිව පීපල්ස් ලීසිං ඉදිරිපත් කළ ඇමරිකානු ඩොලර් 700,000ක රක්ෂණ හිමිකම් ඉල්ලීම ශ්‍රේෂ්ඨාධිකරණය ප්‍රතික්ෂේප කරයි..

Nov 1, 2026 at 07:53 AM

|

Lanka Leader

2009 වසරේදී ගිලීගිය ‘M.V. Medhufaru’ නැමැති නෞකාව වෙනුවෙන් ඇමරිකානු ඩොලර් 700,000ක රක්ෂණ වන්දියක් අයකර ගැනීම සඳහා පීපල්ස් ලීසිං ඇන්ඩ් ෆයිනෑන්ස් PLC සමාගම විසින් අමානා ටකාෆුල් PLC සමාගමට එරෙහිව ඉදිරිපත් කර තිබූ අභියාචනයක් ශ්‍රේෂ්ඨාධිකරණය විසින් නිශ්ප්‍රභ කර තිබේ. 

විනිසුරු මහින්ද සමයවර්ධන, ආචාර්ය සෝභිත රාජකරුණා සහ සම්පත් කේ.බී. විජේරත්න යන ත්‍රිපුද්ගල ශ්‍රේෂ්ඨාධිකරණ විනිසුරු මඬුල්ල විසින් වාණිජ මහාධිකරණය මීට පෙර ලබාදුන් තීන්දුව මෙලෙස තහවුරු කර ඇත.

2009 මැයි 31 වන දින මාලදිවයින් කොඩිය යටතේ සේවයේ යෙදී සිටියදී ඉන්දියාවේ සිට මාලදිවයින බලා යාත්‍රා කරමින් තිබූ මෙම නෞකාව අයහපත් කාලගුණය හේතුවෙන් ගිලීගිය බව පවසමින් පීපල්ස් ලීසිං සමාගම රක්ෂණ වන්දිය ඉල්ලා තිබුණි. එහෙත් නෞකාව යාත්‍රා කිරීමට සුදුසු තත්ත්වයේ නොතිබූ බවත්, අවශ්‍ය වර්ගීකරණ සහතිකය පවත්වාගෙන ගොස් නොමැති බවත් පවසමින් අමානා ටකාෆුල් සමාගම එම ඉල්ලීම ප්‍රතික්ෂේප කර ඇත.

වසර 33ක් පැරණි මෙම නෞකාව ගිලී යෑමට පෙර එහි බඳ කොටස් දිරාපත්වීම, සිදුරු හටගැනීම සහ ජලය කාන්දුවීම් සිදුව තිබූ බව ශ්‍රේෂ්ඨාධිකරණය නිරීක්ෂණය කළ අතර, නෞකාවේ භෞතික තත්ත්වය ගිලී යෑමට ප්‍රධාන වශයෙන් බලපා ඇති විට අයහපත් කාලගුණය පමණක් වගකීමට හේතුවක් කරගත නොහැකි බව අධිකරණය පෙන්වා දී තිබේ.එසේම, නෞකාවේ IRS වර්ගීකරණ සහතිකය 2008 සැප්තැම්බර් මාසයේදී කල් ඉකුත් වී ඇති අතර එය අලුත් කර නොමැත.

රක්ෂණ ඔප්පුවේ කොන්දේසි කඩකිරීම මගින් වන්දි ඉල්ලීම ප්‍රතික්ෂේප කිරීමට ස්වාධීන පදනමක් ලැබෙන බව විනිසුරු මඬුල්ල තීන්දු කළේය. තවද, ඉස්ලාමීය ‘ටකාෆුල්’ රක්ෂණ ක්‍රමවේදයේ ප්‍රතිපත්ති මත පිහිටා ගිවිසුම්ගත කොන්දේසි මඟහැරීමට පීපල්ස් ලීසිං සමාගමට නොහැකි බවත්, දෙපාර්ශ්වය එකඟ වූ ගිවිසුම්ගත වගකීම් යටපත් කිරීමට ටකාෆුල් ප්‍රතිපත්තිවලට නොහැකි බවත් තීන්දුව ප්‍රකාශයට පත්කරමින් සෝභිත රාජකරුණා විනිසුරුවරයා සඳහන් කර ඇත.   

ඒ අනුව, වාණිජ මහාධිකරණයේ 2018 ඔක්තෝබර් තීන්දුව තහවුරු කරමින් ශ්‍රේෂ්ඨාධිකරණය මෙම අමානා ටකාෆුල් සමාගමට එරෙහිව පීපල්ස් ලීසිං ඉදිරිපත් කළ ඇමරිකානු ඩොලර් 700,000ක රක්ෂණ හිමිකම් ඉල්ලීම ශ්‍රේෂ්ඨාධිකරණය ප්‍රතික්ෂේප කරයි අභියාචනය මෙලෙස නිශ්ප්‍රභ කර තිබේ.