නිදහස් පක්ෂ ලේකම් ධුරය පිළිබඳ ඉදිරි පියවර අධිකරණ තීන්දුව අනුව ගත යුතුයි.. - මැතිවරණ කොමිසම කියයි

Nov 14, 2026 at 09:47 AM

|

Lanka Leader

ශ්‍රී ලංකා නිදහස් පක්ෂයේ ලේකම් ධුරය සම්බන්ධයෙන් මතුව ඇති අර්බුදය අධිකරණය හමුවේ නීත්‍යනුකූලව විසඳා ගැනීම සුදුසු බව මැතිවරණ කොමිෂන් සභාව දැනුම් දී තිබේ.

ඒ සම්බන්ධයෙන් පැතිර යන ඇතැම් ප්‍රකාශ පිළිබඳව පැහැදිලි කිරීමක් සිදුකරමින් මැතිවරණ කොමිෂන් සභාව ඊයේ (13) නිකුත් කළ මාධ්‍ය නිවේදනයක මේ බව සඳහන්.

ශ්‍රී ලංකා නිදහස් පක්ෂයේ ලේකම් ධුරය සම්බන්ධයෙන් මතුව ඇති ගැටලුව සාකච්ඡා කිරීම සඳහා එම පක්ෂයේ සභාපති නීතිඥ නිමල් සිරිපාල ද සිල්වා, වත්මන් ලේකම් ලෙස කටයුතු කරන දුමින්ද දිසානායක, භාණ්ඩාගාරික ලසන්ත අලගියවන්න සහ පාර්ලිමේන්තු මන්ත්‍රී නීතිඥ දයාසිරි ජයසේකර පසුගිය නොවැම්බර් 6 වැනිදා මැතිවරණ කොමිෂන් සභාව හමුවේ පෙනී සිට තිබේ.

එහිදී දෙපාර්ශ්වය විසින් අධිකරණයේ පවතින නඩු කටයුතු සම්බන්ධයෙන් කරුණු ඉදිරිපත් කිරීමෙන් අනතුරුව, අදාළ අර්බුදය අධිකරණය මඟින් විසඳා ගැනීම සුදුසු බවට තීරණය කර ඇති බව සඳහන්.

මේ අතර, ශ්‍රී ලංකා නිදහස් පක්ෂය පිළිගත් දේශපාලන පක්ෂයක් නොවන බවට මැතිවරණ කොමිෂන් සභාව ප්‍රකාශ කර ඇති බවට පළවන තොරතුරු අසත්‍ය බවද එම කොමිසම අවධාරණය කරයි.

ශ්‍රී ලංකා නිදහස් පක්ෂය පිළිගත් දේශපාලන පක්ෂයක් වන අතර, පවතින ගැටලුව එහි ලේකම් ධුරයට පමණක් අදාළ බවයි මැතිවරණ කොමිෂන් සභාව පැහැදිලි කරන්නේ.

මේ සම්බන්ධයෙන් ශ්‍රී ලංකා නිදහස් පක්ෂයද ඊයේ විශේෂ මාධ්‍ය නිවේදනයක් නිකුත් කර තිබේ.

එම නිවේදනය මඟින් පක්ෂය සඳහන් කරන්නේ, මැතිවරණ කොමිෂන් සභාවේ සාකච්ඡාවෙන් අනතුරුව දයාසිරි ජයසේකර මාධ්‍ය හමුවේ සිදුකළ බව කියන ඇතැම් ප්‍රකාශ සාවද්‍ය බවයි.

එම ප්‍රකාශ හේතුවෙන් පක්ෂ සාමාජිකයන් සහ ජනතාව නොමඟ යා හැකි බැවින් නිවැරදි තොරතුරු ප්‍රසිද්ධ කරන ලෙස මැතිවරණ කොමිෂන් සභාවෙන් ඉල්ලා සිටි බවද ශ්‍රී ලංකා නිදහස් පක්ෂය පවසයි.