ඉන්දියාව, චීනය, අමෙරිකාව තරහ කරගන්නේ නැතුව අපි අපේ ගමන යනවා.. IMF එක්ක යන ගමනත් ඒ වගේ තමයි.. - ටිල්වින් සිල්වා

Nov 12, 2026 at 04:36 PM

|

Lanka Leader

ජාතික ජන බලවේග රජයේ කිසිදු දේශපාලනඥයකු හෝ නිලධාරියකු යම් වරදක් සිදු කළහොත් ඔවුන් කිසිම අවස්ථාවක ආරක්ෂා කිරීමට පක්ෂයක් ලෙස හෝ රජයක් ලෙස කටයුතු නොකරන බවත්, එවැනි අවස්ථාවලදී තරාතිරම නොබලා දැඩි නීතිමය හා පක්ෂ මට්ටමින් ක්‍රියාමාර්ග ගන්නා බවත් ජනතා විමුක්ති පෙරමුණේ ප්‍රධාන ලේකම් ටිල්වින් සිල්වා මහතා අවධාරණය කරයි.

Lanka Voice යූටියුබ් නාලිකාව සමඟ පැවති විශේෂ සාකච්ඡාවකට එක්වෙමින් ඒ මහතා මේ බව සඳහන් කළ අතර, එහිදී වත්මන් දේශපාලන හා සමාජීය තත්ත්වය සම්බන්ධයෙන් අදහස් දක්වමින් කියා සිටියේ අතීතයේ මර්ධනීය පනතක් ලෙස හැඳින්වූ වත්මන් ත්‍රස්තවාදය වැළැක්වීමේ පනත අහෝසි කරන බවට දුන් ප්‍රතිපත්තිය මත පිහිටා කටයුතු කරන බවයි. එමෙන්ම, අලුතින් ගෙන ඒමට යෝජිත පනත කිසිදු අවස්ථාවක මර්දනීය මෙවලමක් ලෙස අවභාවිත නොවීමට වගබලා ගන්නා බවද ඔහු පැවසීය.

අතීතයේ සිටම වෘත්තීය සමිති ක්‍රියාමාර්ග, වැඩවර්ජන හෝ උද්ඝෝෂණ සඳහා පක්ෂයක් ලෙස කිසි දිනක බාධා කර නැති බව පෙන්වා දුන් සිල්වා මහතා, රට අරාජික වීමට ඉඩ නොදී නිදහස සමඟ නීතිය හා සාමය පවත්වාගෙන යාම රජයක වගකීම බවද සඳහන් කළේය. 

ඇතැමුන් පවසන පරිදි චීනය වැනි තනි පක්ෂ පාලන ආකෘතියකට යාමේ කිසිදු සූදානමක් නොමැති බව පැවසූ ඒ මහතා, රජයේ ඉදිරි ගමනට සහ රටේ සංවාදයන්ට ශක්තියක් වන බුද්ධිමත් විපක්ෂයක අවශ්‍යතාව තදින්ම පවතින බවද ප්‍රකාශ කළේය.

තවදුරටත් අදහස් දැක්වූ හෙතෙම, ජාත්‍යන්තර මූල්‍ය අරමුදල (IMF) සමඟ මෙන්ම ඉන්දියාව, චීනය, එක්සත් ජනපදය සහ රුසියාව වැනි රටවල් සමඟ කිසිදු ගැටුමකට නොගොස්, රටේ ආර්ථිකය ගොඩනැඟීමේ ජාතික අරමුණු වෙනුවෙන් සියලු රටවල් සමඟ සාර්ථකව කටයුතු කරන බව වැඩිදුරටත් කියා සිටියේය.

සවිස්තරාත්මක වීඩියෝව නරඹන්න..