අනුරාධපුර පූජාභූමි සංවර්ධනයට අදාළව උපදේශක සභාවක් පත් කිරීම ගැන ප්‍රසාදය පළ කරනවා.. - දේශහිතෛෂී ජාතික ව්‍යාපාරයේ මහ ලේකම් වෛද්‍ය වසන්ත බණ්ඩාරගෙන් ජනපතිට ලිපියක්..

Nov 5, 2026 at 02:14 PM

|

Lanka Leader

අනුරාධපුර පූජාභූමි සංවර්ධනයට අදාළ පාර්ශ්වකරුවන් නියෝජනය වන ලෙස උපදේශක සභාවක් පත් කිරීම පිළිබඳ ප්‍රසාදය පළ කරන බව දේශහිතෛෂී ජාතික ව්‍යාපාරයේ මහා ලේකම් වෛද්‍ය වසන්ත බණ්ඩාර මහතා ජනපති අනුර කුමාර දිසානායක මහතා වෙත ලිපියක් යවමින් සඳහන් කර තිබේ.   

අනුරාධපුර පූජා නගර සංවර්ධන ක්‍රියාවලිය ආශ්‍රිතව පැන නැගී ඇති ගැටලු සහ මහජන විරෝධය නිරාකරණය කිරීම යනුවෙන් වූ එම ලිපියේ වැඩිදුරටත් දැක්වෙන්නේ, භෞතික සැලසුම් දෙපාර්තමේන්තුව සහ නාගරික සංවර්ධන අධිකාරිය විසින් දොරවල් වසාගෙන සහ මහා සංඝරත්නය ප්‍රමුඛ මහජනයාගේ අදහස් ලබා නොගෙන සකස් කළ ව්‍යාපෘති යෝජනාවක් මත පදනම්ව සහ එම යෝජනාව රහසිගතව තබා ගනිමින් එය ක්‍රියාත්මක කිරීම සඳහා ගැසට් නිවේදනයක් නිකුත් කිරීමේ වරද නිවැරදි කිරීම සඳහා ජනාධිපතිවරයා විසින් මූලික පියවරක් ගැනීම, එනම් පූජාභූමි සංවර්ධනයට අදාළ පාර්ශ්වකරුවන් නියෝජනය වන ලෙස උපදේශක සභාවක් පත් කිරීම පිළිබඳ පළමුවෙන්ම ප්‍රසාදය පළ කරන බවයි.   

රටක සංවර්ධනයට අදාළව අනාගත භෞතික පහසුකම් යෝජනා කිරීම සහ සැලසුම් කිරීම යනු පාර්ශ්වකරුවන් රාශියකගේ සහභාගිත්වයෙන් සහ මහජනතාවගේ දැනුවත්භාවය සහිතව සිදුකළ යුත්තක් වුවද, අප රටේ 2000 වසරේදී ඊට අදාළ නීතිමය බලතල එක් ආයතනයකට ලබාදීම මගින් බලවත් වරදක් සිදු කර ඇති බවත්, එවැනි නීතිමය රාමු සකස් කිරීම බාහිර බලවේගවල වුවමනාව මත සිදුවන බවට ලෝකය පුරා සාක්ෂි ඇති බවත් එම ලිපියේ පෙන්වා දී තිබේ. 

පසුගිය කාලය තුළ අදාළ දෙපාර්තමේන්තුව කටයුතු කළ ආකාරය අනුව ජාත්‍යන්තරව පවතින එම මතවාදය තහවුරු වන බව පවසමින්, 2011 දී කිසිදු පාර්ශ්වකරුවෙකුගේ දැනුවත්භාවය නොමැතිව ඒකපාර්ශ්විකව ඉන්දියානු ව්‍යාපෘතියක් වන හනුමාන් පාලම සහ ත්‍රිකුණාමලය දක්වා දුම්රිය මාර්ගය සහ මන්නාරම දක්වා මහා මාර්ගය ඉදිකිරීම සඳහා භෞතික සැලසුමක් ඉදිරිපත් කිරීම මෙන්ම, 2018 දී ඇමෙරිකානු එම්.සී.සී. ගිවිසුම අත්සන් කිරීමටත් පෙර ඊට අදාළ එක් ව්‍යාපෘතියක් වන ත්‍රිකුණාමලයේ සිට කොළඹ දක්වා ආර්ථික කොරිඩෝවක් සඳහා වන සැලසුම් ඒකපාර්ශ්විකව ඉදිරිපත් කිරීම උදාහරණ ලෙස එහි සඳහන් කර ඇත. 

ඒ අනුව ජනාධිපතිවරයා විසින් බහුපාර්ශ්වීය උපදේශක සභාවක් පත් කිරීම යනු එම වරද නිවැරදි කිරීම සඳහා වූ මූලික කොන්දේසියක් සැපිරීමක් බව ද සඳහන් කර තිබේ.

අප රටේ මහා සංඝරත්නය ප්‍රමුඛ බහුතර ජනතාව සහ ජාතික සංවිධාන පූජාභූමි සංවර්ධනයට පොදු විරෝධතාවක් නොදක්වන අතර, යම් විරෝධතාවයන් මතුවන්නේ අදාළ ක්‍රියාවලිය තුළ දක්නට ලැබෙන මූලධාර්මික වැරදි නිසා බව ගැඹුරින් අධ්‍යයනය කළහොත් වැටහෙනු ඇති බව වෛද්‍ය වසන්ත බණ්ඩාර මහතා පෙන්වා දෙයි. ඊට උදාහරණයක් ලෙස දඹුල්ල පූජාභූමි සංවර්ධන ක්‍රියාවලිය තුළ නීති විරෝධීව විහාර දේවාලගම් ඉඩම් පුද්ගලික ව්‍යාපාර සඳහා ලබා දී තිබීම පෙන්වා දී ඇති අතර, නීතියට අනුව එම ඉඩම් භාවිතා කළ හැක්කේ පොදු පහසුකම් සඳහා පමණක් බව අවධාරණය කර ඇත.

ඊට අමතරව ඉන්දියානු රජය වැනි බාහිර පාර්ශ්වවල මූල්‍ය දායකත්වය සහ මැදිහත්වීම පිළිබඳව මහජනයා සැක පහළ කිරීමද සාධාරණ වන අතර, පසුගිය කාලයේදී ශ්‍රී ලංකා රජය සහ ඉන්දියානු රජය අත්සන් කළ ගිවිසුම් 10ක් පාර්ලිමේන්තුවට හෝ රටේ ජනතාවට ඉදිරිපත් නොකරන ලෙස බලපෑම් කළ බවට හෙළිදරව් වී තිබීම ඊට හේතුවී ඇත. 

එබැවින් විරෝධයට ලක් වී ඇති අනුරාධපුර පූජාභූමි සංවර්ධන සැලසුම හෙවත් ව්‍යාපෘති යෝජනාව පළමුවෙන්ම ඉන්දියානු තානාපති කාර්යාලයේ අනුමැතිය සඳහා ඉදිරිපත් කිරීම පිළිබඳවද මහජනයා විසින් සැක පහළ කිරීම සාධාරණ බව පිළිගන්නා මෙන් දන්වා සිටින ඒ මහතා, අනාගතයේදී ගැටලු ඇති නොවන ලෙස අනුරාධපුර පූජාභූමි සංවර්ධන ව්‍යාපෘතිය ක්‍රියාත්මක කිරීම සඳහා මූලධාර්මික අවශ්‍යතාවයන් ඉටුකරන ලෙස ඉල්ලා සිටී.

- දිවයින