“කැරපොත්තන් සහ ඊනියා දෙමළ ඊලාම් විමුක්ති කොටි” – 1 කොටස

Jul 30, 2026 at 03:22 PM

|

Lanka Leader

විරුද්ධත්වය යන්නෙන් සැමවිටම අදහස් කරන්නේ සන්නද්ධ ප්‍රචණ්ඩත්වය, තුවක්කු සටන්, සමූලඝාතන, මරාගෙන මැරෙන බෝම්බ ප්‍රහාර හෝ පුපුරණ ද්‍රව්‍ය සිටුවීම නොවේ. එම කාචයෙන් පමණක් ප්‍රතිරෝධය බැලීමට පුරුදු වී සිටින එල්ටීටීඊ සහ එහි ආධාරකරුවන් ඉන්දියාවේ කැරපොත්ත ජනතා පක්ෂයෙන් (සීජේපී) ඉගෙන ගත යුත්තේ ප්‍රචණ්ඩත්වයෙන් ඔබ්බට දේශපාලන විරෝධතා සඳහා වඩා නිර්මාණාත්මක හා ඵලදායී ආකාර ඇති බවයි.

කෙනෙකුගේ හිසට තුවක්කුවක් නොතබමින්, පුපුරණ ද්‍රව්‍ය පැළඳ නොගෙන අහිංසක සිවිල් වැසියන් සිය ගණනක් සමඟ තමන්වම මරා නොගෙන, බලයේ සිටින අයට විරුද්ධත්වය සන්නිවේදනය කිරීමට ගිණිය නොහැකි තරම් ක්‍රම තිබේ. එල්ටීටීඊයේ සහ තවදුරටත් ඉතිරිව සිටින එහි ආධාරකරුවන්ට මෙම “කැරපොත්තන්ගෙන්” බොහෝ දේ ඉගෙන ගත හැකිය.

ඉතිහාසය පෙන්නුම් කරන්නේ ලොව පුරා සිටින මිනිසුන් ඉතා නිර්මාණශීලී, සංකේතාත්මක සහ අහිංසාවාදී විරෝධතා උපත්‍රම සාර්ථකව භාවිතා කර ඇති බවයි. එවැනි ක්‍රම රාශියක් පවතින බවත් ඒවායේ ඵලදායී බව ඔප්පු වී ඇති බවත් එල්ටීටීඊය සහ එහි ආධාරකරුවන් තේරුම් ගැනීම වැදගත් වේ.

ඉන්දියාවේ දේශපාලන ඉතිහාසයේ, කැරපොත්තන් ජනතා පක්ෂය (CJP) සාම්ප්‍රදායික මැතිවරණ දේශපාලනයට එපිටින් මතුවූ උපහාසාත්මක දේශපාලන ව්‍යාපාරයක් සඳහා හොඳම උදාහරණවලින් එකක් ලෙස මම දකිමි.

පක්ෂයේ වෙබ් අඩවියට අනුව, ව්‍යාපාරයට සම්බන්ධ වීමේ සුදුසුකම් අතරට පහත සඳහන් දෑ ඇතුළත් විය:

1.⁠ ⁠අධික සුදුසුකම් / අන්ත විරැකියාව

උපාධි, ඩිප්ලෝමා හෝ සහතික තිබියදීත් රැකියා අවස්ථා කිසිවක් නොලැබීම.

පළමු සුදුසුකම නම්, ඔබ සතුව කොපමණ උපාධි, ඩිප්ලෝමා හෝ සහතික තිබුණත්, ඔබ දැනට රැකියා විරහිත විය යුතුවීමයි.

වෙනත් වචන වලින් කිවහොත්, ඔබ ඉහළ සුදුසුකම් තිබියදීත් රැකියා සම්මුඛ පරීක්ෂණයකට ආරාධනා කරන ඇමතුමක් කිසිදා නොලැබූ කෙනෙකු විය යුතුය.

එනම්, ඔබ අධි සුදුසුකම් ලැබීම නිසා ඇති වන විරැකියාවෙන් පෙළෙනවා විය යුතුය.

සටහන: මෙම සුදුසුකම යාපනයේ සහ ශ්‍රී ලංකාව පුරා රැකියා සොයමින් දිගටම අරගල කරන බොහෝ රැකියා විරහිත උපාධිධාරීන්ට හොඳින් ගැලපේ.

හිටපු LTTE සාමාජිකයින් සහ LTTE ආධාරකරුවන් සාමාන්‍යයෙන් මෙම විශේෂිත මතවාදය නොදරයි. මගේ අදහස නම්, එල්ටීටීඊය අධ්‍යාපනය අගය නොකළ අතර, එහි නායක වේළුපිල්ලේ ප්‍රභාකරන් උගත් පුද්ගලයින්ට ඇලුම් නොකළ බවයි. එබැවින්, LTTE සංවිධානය තුළ "අධික සුදුසුකම්" ලැබීම පිළිබඳ ප්‍රශ්නය මතු වූයේ නැත.

2.⁠ ⁠නිදන්ගත කම්මැලිකම / දේශපාලන කලකිරීම

පද්ධතිය හෝ රට වෙනස් කිරීමට ආශාවක් තිබීම, නමුත් ඔබේ ඇඳ හෝ බ්ලැන්කට්ටුවෙන් ඉවත් වීමට පෙළඹවීමක් නොමැති වීම.

දේශපාලන කලකිරීම සමඟ ඒකාබද්ධ වූ නිදන්ගත කම්මැලිකමෙන් ඔබ පීඩා විඳිය යුතුය.

ඔබ රට සහ දේශපාලන ක්‍රමය වෙනස් වීමට දැඩි ලෙස කැමති වුවද, එම වෙනස ගෙන ඒම සඳහා කුඩාම පියවරක් පවා ගැනීමට පෙළඹවීමක් ඔබට නොමැත.

කෙටියෙන් කිවහොත්, ඔබ ජාතිය පරිවර්තනය කිරීමට සිහින දකින අතර ඔබේ ඇඳේ සුවපහසුවෙන් ඉවත් වීමට පවා නොහැකි තරම් කම්මැලිව සිටී.

සටහන: මගේ මතය අනුව, මෙම සුදුසුකම එල්ටීටීඊයට හෝ එහි ආධාරකරුවන්ට අදාළ නොවේ.

ඒ වෙනුවට, ඔවුන් කැමති වන්නේ පද්ධතිය වඩ වඩාත් දූෂිතව හා බලය අනිසි ලෙස භාවිතා කිරීමට ගොදුරු වීමටයි, මන්ද එමඟින් ඔවුන්ට  ශ්‍රී ලංකාවේ දකුණ කේන්ද්‍රගතව පැවති බල මධ්‍යස්ථාන සමඟ දූෂිත අරමුණු සඳහා සාකච්ඡා කිරීමට සහ සහයෝගයෙන් කටයුතු කිරීමට හැකි වන බැවිනි. එබැවින්, එවැනි තත්වයන් ආරක්ෂා කර ගැනීම සඳහා ඔවුන් දවසේ පැය 24 පුරාම, සතියේ දින හතේම වෙහෙස නොබලා වැඩ කරනු ඇත.

3.⁠ ⁠සෑමවිටම අන්තර්ජාලගතව සිටීම (“මාර්ගගත ජීවි”)

ඔබ කොතැනක සිටියත් ඔබේ අන්තර්ජාල සම්බන්ඡධතාවයට 24/7 ඇලී සිටීමට සහ එම අදහස් දැක්වීම සම්බන්ධයෙන් පළකෙරෙන කොමෙන්ටු සමග නිරතුරුව සටන්කරමින් සිටීම.

ඔබ නිරන්තරයෙන් ම අන්තර්ජාලයේ ජීවත් විය යුතුය.

ඔබ ලෝකයේ ඕනෑම තැනක ජීවත් වුවද, ඔබ ඔබේ අන්තර්ජාල සම්බන්ධතාවලට සම්බන්ධ වී සිටිය යුතු අතර, මාර්ගගත අදහස් දැක්වීමේ අවකාශයන්හි නිමක් නැති යුද්ධවල නිරන්තරයෙන් පෙරමුණේ සිටිමින් සටන්කළ යුතුය.

සටහන: මගේ මතය අනුව, මෙම ලක්ෂණය යුරෝපයේ සහ කැනඩාවේ ජීවත් වන බොහෝ හිටපු එල්ටීටීඊ සාමාජිකයින්ට සහ ආධාරකරුවන්ට පරිපූර්ණ ලෙස අදාළ වේ.

සරණාගත ප්‍රතිලාභ, තනි මාපිය දීමනා, රජයේ නිවාස සහ ඔවුන්ගේ සත්කාරක රටවලින් වෙනත් සුභසාධන ආධාර ලබා ගන්නා අතරම, බොහෝ දෙනෙක් රැකියාවක් නොකිරීමට තීරණය කර ඇත. ඒ වෙනුවට, ඔවුන් එල්ටීටීඊයේ නාමයෙන් මුදල් එකතු කර, මත්පැන් සඳහා වියදම් කර, සමාජ මාධ්‍ය අදහස් දැක්වීමේ කොටස් හරහා “ඊලම” සඳහා නිමක් නැතිව සටන් කරති.

4. වෘත්තීය රැවටීම් / ‘මීම්' සෑදීම

දෛනික ප්‍රවෘත්ති, උද්ධමනය හෝ පාලක පද්ධතිය  කෙරෙහි ඇති ජනතා කෝපය, බලධාරීන්ට දෂ්ට කරන තියුණු, වෛරල්වන  'මීම්' බවට පත් කරන්නේ කෙසේදැයි දැන ගැනීම.

ඔබ වෘත්තීයමය වශයෙන් 'මීම්' නිෂ්පාදනය කිරීමට සමත් විය යුතුය.

ප්‍රවෘත්තිවල ආධිපත්‍යය දරන ඕනෑම කරුණක්',  එනම්, උද්ධමනය, දේශපාලන ක්‍රමයේ අඩුපාඩු හෝ වෙනත් ඕනෑම ජාතික ගැටලුවක් වේවා උපයෝගීකරගෙන, බලධාරීන් අපහසුතාවයට පත් කරන හෝ විවේචනය කරන තියුණු, වෛරල් 'මීම්' එකක් ඉක්මනින් නිර්මාණය කිරීමේ විශිෂ්ට හැකියාව ඔබ සතුව තිබිය යුතුය.

සටහන: මගේ මතය අනුව, එල්ටීටීඊයට මේ ආකාරයේ දේශපාලන උපහාසයක් කෙරෙහි එතරම් උනන්දුවක් නැත. ඒ වෙනුවට, ඔවුන් ප්‍රධාන වශයෙන් අවධානය යොමු කරන්නේ ශ්‍රී ලංකාවේ ගැටළු නරක අතට හැරෙන තත්වයන් කෙරෙහි ය. රටට හිතකර කිසිවක් සිදු නොවන බව සහතික කිරීම කෙරෙහි ඔවුන් ප්‍රධාන වශයෙන් සැලකිලිමත් වන බව පෙනේ.

එල්ටීටීඊ හිතවාදීන් ගාලු මුවදොර අරගල විරෝධතා ව්‍යාපාරයට ඇතුළු වූයේ කෙසේද කියා අපි ආපසු හැරී බලමු.

කැරපොත්තන් ජනතා පක්ෂය ලෙස හැඳින්වෙන උපහාසාත්මක දේශපාලන ව්‍යාපාරය ආරම්භ කළ අභිජීත් ඩිප්කේ නම් තරුණයා, ආචාර්ය බී. ආර්. අම්බෙඩ්කාර්ගේ "මගේ ස්වයං චරිතාපදානය" පොත ඔහුගේ හිසට ඉහළින් තබාගෙන සිටියේය.

ගාලු මුවදොර ශ්‍රී ලංකාවේ අරගල විරෝධතා අතරතුර, එල්ටීටීඊ සාමාජිකයෙකු වූ ඉසයිප්‍රියාගේ ඡායාරූපයක් ඔසවාගෙන සිටි තරුණයෙකු මම දුටුවෙමි.

ඉන්ධන, ඉවුම් පිහුම් ගෑස්, විදුලිය සහ අත්‍යවශ්‍ය භාණ්ඩ හිඟය හේතුවෙන් රටම එක තැනක සිරවී සිටි මොහොතක, සාමාන්‍ය ජනතාව දිවි ගලවා ගැනීමට අරගල කරමින් සිටියදී, මෙම අරගල විරෝධතාව ස්වයංසිද්ධව මතු විය.

එසේ නම්, රටේ දිගුකාලීන අර්බුදයට ප්‍රධානතම දායකයෙකු ලෙස මා සලකන LTTE සංවිධානයේ සාමාජිකයෙකුගේ ඡායාරූපයක් එම අරගලභූමියේ ප්‍රදර්ශනය කිරීමට රටේ ආර්ථික බිඳවැටීම පිළිබඳ විරෝධතාවයකට සහභාගී වන අයෙකු තෝරාගත්තේ ඇයි? විශේෂයෙන් ම එම ගැටලුව අදාල  විරෝධතාවයට සෘජු සම්බන්ධයක් නොමැති අවස්ථාවක එවැන්නක් සිදුවූයේ කෙසේද?

ජන්තර් මන්තර් හි කැරපොතු ජනතා පක්ෂයේ විරෝධතාවයට සහභාගී වූ ඉන්දියානු තරුණයෙකු ඉන්දියාවේ තහනම් කර ඇති කාලිස්තාන සටන්කාමී ව්‍යාපාරයේ සාමාජිකයෙකුගේ ඡායාරූපයක් රැගෙන පෙළපාළි ගියේ නම් කුමක් සිදුවේදැයි මට සිතා ගැනීමටවත් නොහැකිය.

ඉන්දියානු තරුණයින් ආචාර්ය අම්බෙඩ්කාර් අගය කළ යුතු නායකයෙකු ලෙස හඳුනා ගනී.

කණගාටුවට කරුණක් නම්, ගාලු මුවදොරදී මෙම තරුණයා සිය පරමාදර්ශී නායකයන් ලෙස, ප්‍රභාකරන් සහ ඉසයිප්‍රියා තෝරාගෙන තිබෙන බව පෙනෙන්නට තිබීමයි.

- අරුන් සිද්ධාර්ථ්