පාරම්පරික වෛද්‍යවරුන්ගෙ අවසානය ?

Jul 10, 2026 at 02:40 PM

|

Lanka Leader

[පොදු මහජනතාව සහ බලධාරීන් දැනුවත් කිරීම සඳහා පුරවැසියෙකු විසින් ලියනු ලබන වගකීම් සහගත ලිපියකි. කිසිදු දේශපාලන න්‍යාය පත්‍රයක් හෝ නීති විරෝධී උසිගැන්වීමක් මෙහි අරමුණ නොවේ. ශ්‍රී ලංකා ආයුර්වේද වෛද්‍ය සභාවේ නිල කෙටුම්පත්/චක්‍රලේඛ, 2023 අංක 31 දරන පනත සහ රජයේ 'ජාතික භෞතික සැලැස්ම' ආශ්‍රිත සත්‍ය කරුණු සහ සාක්ෂි පමණක් මෙහි මූලාශ්‍ර ලෙස භාවිත කර ඇත.]

"මේ පරම්පරා වෙදකම නැත්තටම නැති කරන්න, පහුගිය වසර කීපයක් තුළ පරම්පරා වෙදකම නැත්තටම නැති කරන්න පිඹුරුපත් ඇන්දා. පළවෙනියෙන්ම කරපු වැඩේ තමයි 66 පනතෙන් පාරම්පරික වෛද්‍යවරයාගේ දරුවාට විධිමත් අධ්‍යාපනයක් ලබා ගැනීම සඳහා කියලා ස්ථාපිත කරලා තිබ්බ වෛද්‍ය විද්‍යාල ටික වහලා දැම්මා. පළවෙනි කාරණය.

ඊට පස්සේ ගේනවා 2023 අංක 31 දරන පනත. මේ පනතෙන් මොකක්ද කරන්නේ? පාරම්පරික වෛද්‍යවරයාගේ ඉතුරු ශක්තියත් බිඳින්න. මේකෙ අරමුණ තමයි පාරම්පරික වෛද්‍යවරයා තමයි අද ගහෙන්, වැලෙන්, මලෙන්, කොළෙන්, පොත්තෙන් බෙහෙත් ටික අරගෙන බෙහෙත් හදලා ගමේ, රටේ, ගෙදර ඉඳගෙන රෝගීන් සුවපත් කරන වෛද්‍යවරු ඉන්නේ මේ පාරම්පරික වෛද්‍යවරු. අපි කොහෙන්වත් බෙහෙත් හේත් ගන්නේ නෑ. අපිට අවශ්‍ය බෙහෙත් හේත් ටික අපි හදාගන්නවා.

ඉතින් මේ 2023 31 දරන පනතෙන් කියලා තියෙනවා ඖෂධ 400 ගාණකට එහා සංඛ්‍යාවක් පාරෙ ගෙනියන්න බෑ. විශේෂයෙන්ම දෙහි, පාවට්ටා, මුකුණුවැන්න ඔය වගේ ඖෂධ 400 ගාණකට එහා පාරෙ ගෙනියන්න බෑ, ළඟ තියාගන්න බෑ, අඩුම ගානේ පාවට්ටා පැළයක් ගෙදර හිටවගන්නත් බෑ. නිකමට හිතන්න මේක වෛද්‍යවරු විතරක් නෙමෙයි සාමාන්‍ය ජනතාවත් මේකට කතා කරන්න ඕනේ. පොළේ ගิහිල්ලා දෙහි ටික විකුණන වයසක ආච්චි අම්මා කෙනෙක්, මුකුණුවැන්න මිටිය විකුණන වෙළෙන්දාට, මුකුණුවැන්න මිටිය තව ටිකක් කල් යනකොට පාරෙ ගෙනියන්න බෑ. ඒකට ආයුර්වේද දෙපාර්තමේන්තුවෙන් අවසර ගන්න ඕනේ. මේක තමයි, මේ කරේ මොකක්ද? පාරම්පරික වෛද්‍යවරු බෙහෙත් හදන එක නැවැත්තුවා. එතකොට මේක ඖෂධ රැස් කරන්න බෑ, ගෙනියන්න බෑ, ඔන්න මේක අතාරලා දැම්මා. පාවට්ටා ගහක් ගෙදර ඉන්දුවොත්, හිටෙව්වොත්, පැළයක් තිබ්බොත් අත්අඩංගුවට ගන්න පුළුවන් ගානට පනත හදලා දීලා තියෙනවා.

ඊළඟට ගෙනාවා දැන් කෙටුම්පත් හදනවා, දැන් කෙටුම්පත් හදනවා පාරම්පරික වෛද්‍ය ශිෂ්‍යයන් බිහි කරන්න බෑ. වෛද්‍ය ශිෂ්‍යයෙක් බිහි කරනවා නම් තමන්ගේ එක දරුවෙකුට උගන්වන්න පුළුවන්. දරුවෝ දෙන්නෙක් තුන්දෙනෙක් ඉන්න පාරම්පරික වෛද්‍යවරයා එක දරුවෙකුට උගන්වපුවහම අනිත් දරුවෝ ඉල්ලුවොත් මොකද කරන්නේ? උඹලාට දෙන්න බෑ කියන්නද? එහෙම නෙමෙයි, පුංචි කාලේ ඉඳලා අම්මාගේ බඩේ ඉඳලා, උපන් දවසේ ඉඳලා, කිරි බොන දවසේ ඉඳන් බෙහෙත් පැළේ අතගාලා, ඖෂධය අතගාලා, රෝගියා තමන්ගේ ගුරු වෛද්‍යවරයා, පියා හෝ මව නැත්නම් ගුරු වෛද්‍යවරයා සුව කරන විදිහ දැකලා, කළ පුරුද්ද, දැක පුරුද්ද, පළපුරුද්ද කියන එක හොඳටම හදාගෙන උපන් දා ඉඳන් වෙදකමේ ඇලිලා ගිලිලා ඉන්න මේ පාරම්පරික වෛද්‍යවරයා නැත්තටම නැති කරන්න හදනවා.

ඉතින් හත්දෙයියනේ, හරියටම ලෙඩුන් සුවපත් කරනවා නම්, හරියටම වෙදකම කරන්න පුළුවන් නම්, තමන්ගේ රජයට අවශ්‍ය විභාගය තියලා, රජයට අවශ්‍ය නිර්ණායකයන් අනුව විභාගය තියලා ඉදිරිපත් වෙන වෛද්‍ය ශිෂ්‍යයන් විභාගයෙන් පාස් කරනවා නම් ඉවරනේ සුදුසුකම් තියෙනවා නම්. ඕකනේ කරන්න ඕනේ. එතකොට පාරම්පරික වෙදකම යනවා. මේ පාරම්පරික වෙදකම නැත්තටම නැති කරන්න තමයි මේ හදන්නේ.

විශේෂයෙන්ම මේ පාරම්පරික විභාග දැන් අවුරුද්දකට දෙකකට විතර ඉස්සෙල්ලා නැවැත්තලා තියෙන්නේ. පාරම්පරික වෛද්‍යවරුන්ගේ දරුවන්ට තියෙන, ශිෂ්‍යයන්ට තියෙන විභාග ටික නැවැත්තලා තියෙනවා. ඒ හින්දා තැන් තැන් වල එක එක මේ හොර වෛද්‍යවරු වෙදකම එහෙන් මෙහෙන් අහුලා ගත්ත, තැන් තැන් වල ගස් ගල් යට වෙදකම් කරන, ඒ වගේම මේ මේ තැන් තැන් වලට ගිහිල්ලා මේ මේ ජංගම සේවා විදිහට නැත්නම් සායන විදිහට අද එක තැනක, අද අනුරාධපුරේ, හෙට කුරුණෑගල, තව තැනක, තව දවසක මාතලේ, ඊට පස්සේ බෙහෙත් ගත්ත වෛද්‍යවරයා හොයාගන්න බෑ රෝගියාට. මේ වගේ හොර ගුහා ටිකක් හදන්න මේ විදිහට පනත් හැදුණා. මේ විදිහට හදාගත්තා.

මේ විදිහට හදලා දැන් මේ පාරම්පරික වෛද්‍යවරයා නෑ... ඒ කියන්නේ පාරම්පරික වෛද්‍යවරයාට දැනුම නෑ කියලා පෙන්නන්නනේ මේ කරන්නේ වැඩේ. ඒ කියන්නේ මේ පාරම්පරික විභාග ටික තියන්නේ නෑ, නැවැත්තලා දැම්මා. එතකොට අර පාරම්පරික වෙදකම අහුලා ගත්ත තැන් තැන් වලින් ටිකක් එනවා නගලා. ඊට පස්සේ ඒ හින්දා..."

(පාරම්පරික වෙදකම සුරකීමේ සංවිධානය)

වසර දහස් ගණනක් තිස්සේ මේ පොළොවේ මිනිස්සුන්ගේ ජීවිත රැකපු, අපේ රටේ අනන්‍යතාවය වෙච්ච "සිංහල පාරම්පරික වෙදකම" අද ඉන්නෙ තීරණාත්මක කඩඉමක. සරලවම කිව්වොත්, සූක්ෂම නීති රීති මාලාවක් හරහා අපේ පාරම්පරික වෙදකමේ මුල්ම සිඳලා දාන්න ලොකු පිඹුරුපතක් ලෑස්ති වෙමින් පවතිනවා. ව්‍යාජ වෛද්‍යවරුන් පාලනය කරන මුවාවෙන්, ජාත්‍යන්තර "සුවතා සංචාරක ව්‍යාපාරය" (Wellness Tourism) හරහා ඩොලර් සෙවීමේ වාණිජ අරමුණක් වෙනුවෙන් අපේ ගමේ වෙදකම බිලිදෙන්න හදන මේ ක්‍රියාවලිය ගැන රටේ පුරවැසියන් විදිහට අපි හැමෝම ඇස් ඇරලා බලන්න ඕනේ කාලය හරි.

ආයුර්වේද වෛද්‍ය සභාවේ නව රෙගුලාසි සහ පහුගිය කාලේ ආපු පනත් දෙස බැලීමේදී මේ තිත්ත ඇත්ත සාක්ෂි සහිතව ඔප්පු වෙනවා.

🛑 පාරම්පරික වෙදකමේ බෙල්ල හිර කරන නීතිමය උගුල්

🔹ඖෂධ පැළෑටි ළඟ තබාගැනීමේ සහ ප්‍රවාහන තහනම (2023 අංක 31 දරන පනත)

මේ පනතට අනුව ඖෂධ වර්ග 400කට අධික සංඛ්‍යාවක් අවසරයකින් තොරව පාරේ ගෙනියන්න බෑ, ළඟ තබාගන්න බෑ. අඩුම ගානේ පාවට්ටා පැළයක්, දෙහි ගහක් ගෙදර හිටවගත්තොත් අත්අඩංගුවට ගන්න පුළුවන් මට්ටමට නීති හැදෙනවා. ගහෙන්, වැලෙන්, මලෙන්, පොත්තෙන් බෙහෙත් ටික අරන් තමන්ම ඖෂධ හදාගන්න පාරම්පරික වෛද්‍යවරයාට මේකෙන් මොකද වෙන්නේ? ඒ විතරක් නෙවෙයි, පොළේ ගිහින් දෙහි ටිකක්, මුකුණුවැන්න මිටියක් විකුණන අහිංසක ගැමියාටත් ඉස්සරහට මේ නිසා ආයුර්වේද දෙපාර්තමේන්තුවෙන් අවසර ගන්න සිද්ධ වෙන තැනටයි වැඩ සිද්ධ වෙන්නේ.

🔹ගුරු වෛද්‍යවරයාගේ වයස් සීමාව අවුරුදු 70ට සීමා කිරීම

ශිෂ්‍යයෙකුට සහතිකයක් දිය හැකි ගුරු වෛද්‍යවරයාගේ වයස අවුරුදු 70 නොයික්මවිය යුතු බවට නීතියක් එනවා. හත්දෙයියනේ, අපේ දේශීය වෙදකමේ වටිනාම රහස් වට්ටෝරු, මහා ප්‍රඥාව තියෙන්නේ වයස අවුරුදු 70, 80 හෝ 90 ඉක්මවූ ජ්‍යෙෂ්ඨතම වෙද මහත්වරුන් ළඟයි. මේ නීතිය නිසා දක්ෂ ශිෂ්‍යයන් රැසකට තමන්ගේ ගුරුවරුන්ගෙන් සහතික ලබා ගැනීමේ අයිතිය සදහටම නැති වෙනවා.

🔹ශිෂ්‍ය සංඛ්‍යාව දැඩි ලෙස සීමා කිරීම

ගුරු වෛද්‍යවරයෙකුට ශිෂ්‍යයන් පුහුණු කළ හැක්කේ තමන්ගේම එක දරුවෙකුට විතරයි. දරුවන් නැත්නම් බාහිරින් එක වරකට පුහුණුව දිය හැක්කේ එක් (01) ශිෂ්‍යයෙකුට විතරයි. දරුවෝ දෙන්නෙක් තුන්දෙනෙක් ඉන්න පාරම්පරික වෛද්‍යවරයෙක් එක දරුවෙකුට විතරක් උගන්වලා අනිත් දරුවන්ට වෙදකම නොදී ඉන්නද? උපන් දා ඉඳන් වෙදකමේ ඇලිලා ගිලිලා ඉන්න දරුවන්ට මේ කරන අසාධාරණය මොකක්ද?

🔹අධ්‍යාපන සුදුසුකම් සහ වයස් සීමාවන්

කලින් මූලික සුදුසුකම ලෙස සාමාන්‍ය පෙළ තිබුණත්, අලුත් සංශෝධනවලින් එය අ.පො.ස (උසස් පෙළ) ඕනෑම විෂය ධාරාවකින් විෂයන් 3ක් සමත් විය යුතු ලෙස වෙනස් කරලා. වෙදකම කියන්නේ "සංසාර පුරුද්දක්", "දැක පුරුද්දක්" සහ ප්‍රායෝගික කැපවීමක් මිස උසස් පෙළ සහතික මතම තීරණය වන්නක් නෙවෙයි. ඒ වගේම ලියාපදිංචි වීමේ වයස අවුරුදු 18 ත් 28 ත් අතරට සීමා කිරීම නිසා, දැනටමත් වයස 28 ඉක්මවා ප්‍රායෝගිකව වෙදකම් කරන දක්ෂයින්ට තමන්ගේ වෘත්තීය අයිතිය අහිමි වෙලා, ජීවත් වෙන්න වෙනත් සාමාන්‍ය රැකියාවලට (ගාර්මන්ට් යාම වැනි) යන්න සිද්ධ වෙනවා.

🛑 මේ විනාශයේ අවසාන ප්‍රතිඵලය කුමක්ද?

🔹දේශීය වෛද්‍ය ඥානය සදහටම වැලලී යාම

 සර්ප විෂ, කැඩුම් බිඳුම්, ජලභීතිකා, ගෙඩි වණ වැනි විශේෂඥ ක්ෂේත්‍රයන්හි පරම්පරාගත රහස් වට්ටෝරු ඉදිරි පරම්පරාවට දායාද කිරීමට උරුමක්කාරයන් නොමැතිව වඳ වී යනු ඇත.

🔹බටහිර ඖෂධ මාෆියාවට ජනතාව බිලිවීම

 ගමේ සහනදායී වෙද මහතා අහිමි වූ පසු, සෑම පුරවැසියෙකුටම සුළු රෝගයකට පවා අධික මිලක් ගෙවා බටහිර ඖෂධ මතම යැපීමට සිදු වේ. රටේ ආර්ථික අර්බුදයක් හමුවේ බටහිර ඖෂධ හිඟ වන ඕනෑම අවස්ථාවක රටේ ජනතාවගේ ජීවිත සෘජුවම අනතුරේ වැටේ.

🔹හොර වෛද්‍යවරුන් සහ ජංගම සායන බිහිවීම 

පාරම්පරික විභාග අවුරුදු ගණනාවකින් පවත්වා නැති නිසා, සැබෑ දක්ෂයින්ට නීත්‍යානුකූල වීමට ඇති මඟ ඇහිරී ඇත. මෙහි ප්‍රතිඵලයක් ලෙස තැන් තැන්වල ගස් ගල් යට වෙදකම් කරන, අද අනුරාධපුරේ, හෙට කුරුණෑගල ජංගම සායන දමන හොර වෛද්‍යවරුන් බිහි වන අතර ඉන් රෝගීන්ගේ ආරක්ෂාව සම්පූර්ණයෙන්ම නැති වී යයි.

🔹සංස්කෘතික උරුමය විනාශ වීම 

වසර දහස් ගණනක් පැරණි "හෙළ වෙදකම" නමැති ජාතික අභිමානය ලෝක සිතියමෙන් මැකී ගොස්, සියල්ල මහා පරිමාණ වාණිජ හෝටල්වල පවතින "Spa" සංස්කෘතියකට පමණක් සීමා වනු ඇත.

🗣️ අපේ නිහඬතාවයේ අවසානය මෙතැනද?

රජයට අවශ්‍ය නම් කළ යුත්තේ සුදුසු නිර්ණායකයන් මත විභාග පවත්වා, දක්ෂ පාරම්පරික වෛද්‍ය ශිෂ්‍යයන්ට ඉදිරියට යාමට මඟ සකස් කිරීමයි. නමුත් සිදුවන්නේ අනෙකකි. වෙනත් වෘත්තීය ක්ෂේත්‍රවල පිරිස් තමන්ට අසාධාරණයක් වූ වහාම පාරට බැස සටන් කරද්දී, අපේ දේශීය වෛද්‍ය ක්ෂේත්‍රයේ අය තවමත් පසුවන්නේ නිහඬ පිළිවෙතකය. ශාස්ත්‍රීය උපාධි සහතික තිබුණත් ප්‍රායෝගික වෙදකම නොදන්නා නිලධාරීන් විසින්, මහා රෝග සුව කරන පාරම්පරික වෛද්‍යවරුන්ගේ පැවැත්ම තීරණය කරන තෙක් තවදුරටත් නිහඬව බලා සිටිය යුතුද?

අපේ වෙද පරම්පරා, ගුරු වෛද්‍යවරුන් සහ වෛද්‍ය සිසුන් දැන්වත් මේ ව්‍යසනය තේරුම් ගත යුතුය.

🔹බලධාරීන්ගෙන් අප ඉල්ලා සිටින්නේ

මෙම ප්‍රායෝගික නොවන, දේශීය වෙදකමේ මුල් සිඳලන කෙටුම්පත් වහාම සංශෝධනය කරනු! සැබෑ දක්ෂ පාරම්පරික වෛද්‍යවරුන් සහ ශිෂ්‍යයන් ආරක්ෂා වන පරිදි වයස් සීමාවන් සහ අධ්‍යාපන සුදුසුකම් ලිහිල් කරනු!

අපේ දේශීය වෛද්‍ය උරුමය සහ ඔබේ සෞඛ්‍ය අයිතිය සුරැකීම වෙනුවෙන් මෙම පණිවිඩය උපරිමයෙන් Share කර රටම දැනුවත් කරමු!

(මුහුණු පොතින් උපුටා ගන්නා ලදී)