අනුරාධපුර සිදුවීම සහ හතේ අපේ පොත - රැඩිකල් සීයලාගේ කෝකටත් තෛලය

May 26, 2026 at 02:21 PM

|

Lanka Leader

👉 පල්ලේගම හිමියන්ට එල්ල වී ඇති චෝදනාව සමග භික්ෂූන් නිසා ලංකාවට ලිංගික අධ්‍යාපනය අහිමි වී ඇතැයි කියන කිසිදු පදනමකින් තොර විකාර සහගත සංවාදය නැවත කරළියට පැමිණ තිබෙනවා. 

👉 මේ තියෙන්නේ ඊට අදාළව පළ වූ බොහෝ දෙනා අනුමැතිය පළ කළ එක සටහනක්. 

👉 බොහෝ දෙනා සුපුරුදු ලෙස මේ චෝදනාවට පදනම් කරගන්නේ යහපාලන ආණ්ඩු සමයේ ගෙන ආ හතේ අපේ පොත නම් පොතට විරුද්ධව භික්ෂූන් වහන්සේලා දෙනමක් අදහස් පළ කිරීමේ සුපුරුදු හා එකම සිදුවීම. 

👉 මේ පොත පාසල්වලට බෙදාදීම නතර වූයේ මේ අදහස් පළ කිරීම නිසා බවට ප්‍රකට මතයක් පවතිනවා. එහි ඇත්ත නැත්ත කුමක් වුවත් අදාළ භික්ෂූන් දෙනම විරුද්ධ වූයේ මේ නිශ්චිත පොතේ තිබූ ග්‍රාම්‍ය භාෂාවෙන් ලියවුණු ඇතැම් වගන්තිවලට මිස සමස්ත ලිංගික අධ්‍යාපනයට  නොවෙයි. 

👉 භික්ෂූන් ලිංගික අධ්‍යාපනයට විරුද්ධ බව කියන මේ ව්‍යාජ චෝදනාව පිළිබඳ කරුණු සහිතව මා මීට පෙර ලියූ ලිපියක ලින්ක් එක පළමු කොමෙන්ටුවේ පළ කොට තිබෙන නිසා අවශ්‍ය අයෙකුට එය කියවා බලන්න පුළුවන්. 

👉 මේ සටහන ලියන්නේ හතේ අපේ පොත ලංකාවේ රැඩිකල් මහත්වරුන්ට මහා මැජික් එකක් වීමේ විහිළුව ගැන පැහැදිලි කිරීමට පමණයි. 

👉 ඒ හැර පල්ලේගම හිමියන්ගේ සිදුවීම ගැන කතා කිරීම මෙහි අරමුණ නොවෙයි. එවැනි වරදක් සිදුවී ඇත්නම් එයට නීතිය ක්‍රියාත්මක වීම ගැන කිසිදු ගැටලුවක් නැහැ. 

👉 ඉතින් මොකක්ද මේ කියන අරුම පුදුම හතේ අපේ පොත...? 

👉 හතේ අපේ පොත කියන්නේ කතා කරන භාෂාවෙන් ලියපු විශාල පින්තූරත් සහිත පිටු විසි හතක ඉතාම කුඩා ප්‍රමාණයේ පොතක්. මේ පොතේ ටෙක්ස්ට් එක වෙන් කරලා ගත්තොත් ඒෆෝ පිටු දෙක තුනකට වඩා නැහැ. 

👉 මේ පොතේ තියන සියලුම දේවල් අවුරුදු ගාණකට කලින් ඉඳන් ලංකාවේ පාසල්වල ඉගැන්නුවා. අදටත් උගන්වනවා.  

👉 ඇත්තටම මේ පොතේ තියෙන්නේ ඉතාම පුංචි සරල කරුණු ප්‍රමාණයක් විතරයි. ලිංගිකත්වයට අදාළ ඊට වඩා බොහෝ කරුණු කන්දරාවක් සෞඛ්‍යය, විද්‍යාව, ජීව විද්‍යාව වැනි විෂයන් තුළ දැනුත් තිබෙනවා. ඉස්සරත් තිබුණා. 

👉 ඒ වගේම උදා වූ යෞවනය, ගුරු හදින් යොවුන් හදට වගේ ලිංගික අධ්‍යාපනය වෙනුවෙන් සම්පාදනය කළ වෙනත් පොත් අදත් පාසල් පුස්තකාලවල තිබෙනවා. 

👉 ඒ නිසා හතේ පොතේ කිසිදු අමුතු මැජික් එකක් නැහැ. මොන හේතුවක් නිසා මේ පොත බෙදා හැරීම නතර වුවත් මේ පොත නැති වීම නිසා සිසුන්ට කිසිදු දැනුම අහිමි වීමක් සිදුවී නැහැ. 

👉 අදාළ භික්ෂූන් වහන්සේලා දෙනම විරෝධය පළ කළේ මේ පොතේ ඇති ග්‍රාම්‍ය ඕලාරික භාෂා විලාසයකින් රචිත ඇතැම් වගන්ති සම්බන්ධව පමණයි. එය කිසිසේත්ම රටට සමස්ත ලිංගික අධ්‍යාපනය අහිමි කිරීමක් නොවෙයි. 

👉 ලිංගික අධ්‍යාපනය නමින් විෂයක් නොතිබුණත් අදටත් ඊට අදාළ සියලු මූලික දේවල් පාසල් තුළ දැනටත් ඉගැන්වෙනවා. ඒවාට කිසිදු භික්ෂුවක් විරෝධය පළ කොට නැහැ. 

👉 ඒ ඉගැන්වෙන දේවල් මදි යැයි යමෙකුට සිතෙනවා නම් ඔහු කළ යුත්තේ ඒ මදි කොටස ඉගැන්වීම පිළිබඳ යෝජනා ගෙන ඒමයි. ඒ ගැන අපට ප්‍රශ්නයක් නැහැ. 

👉 ඒත් මේ රැඩිකල් මහත්වරුන්ගේ අපූරු යෝජනාව වී ඇත්තේ හතේ අපේ පොත නැවත බෙදාදීම. ඒ ගැන පළ වූ අදහස් ගණනාවක් පහුගිය දිනවල සමාජ මාධ්‍යවල සංසරණය වුණා.  

👉 ඇත්තෙන්ම මේ හතේ පොතෙන් එහාට ලෝකයක් ඔවුන්ට නැහැ. ඔවුන්ට අනුව ලිංගිකත්වය ගැන මේ තුන් ලෝකයේ ඇති සකලවිධ ප්‍රශ්නවලට විසඳුම් ඇති කෝකටත් තෛලය තමයි හතේ අපේ පොත.  

👉 ඔවුන්ට අනුව හතේ අපේ පොත බෙදා දුන්නා නම් ලංකාවේ ස්ත්‍රී දූෂණ, ළමා අපචාර සියල්ල එක රැයින් නතර වෙනවා. 

👉 මේ ඇතමුන් කියන විදිහට අද අනුරාධපුරයේ ප්‍රශ්නයට ප්‍රධාන හේතුව වී ඇත්තේත් එදා හතේ අපේ පොත ළමයින්ට බෙදා නොදීම. 

👉 මෙය කොයි තරම් බරපතළ විහිළුවක්දැයි තේරුම් ගැනීමට අවශ්‍ය නම් ඕනෑම අයෙකුට මේ කියන පිටු විසි ගණනේ පොත අන්තර්ජාලයෙන් බාගත කරගෙන කියවන්න පුළුවන්. 

👉 මෙය කොපමණ තරමේ විහිළුවක් වුණත් ඇතමුන්ට හතේ අපේ පොත මේ සා අරුමයක් වී ඇත්තේ එය පදනම් කොට ගෙන භික්ෂූන්ට පහරදීමට ඔවුන්ට අවස්ථාවක් පෑදී තිබීම නිසා පමණයි. 

👉 ඒ වුවමනාව අනුව ඔවුන් ගොඩ නඟන තර්ක කොයි තරම් ළාමක ළදරු පාසල් තර්ක වුවත්, ලිංගිකත්වය ගැන කිසිදු විද්‍යාත්මක හෝ සමාජ අවබෝධයක්, කියවීමක් නොමැති, හීනමාන පිරිස් අතර මේ තර්කවලට විශාල ඉල්ලුමක් පවතිනවා. 

👉 ලිංගිකත්වය පිළිබඳ ලෝකයේ කිසිදු තැනක වලංගුතාවක් නොමැති මිත්‍යා මත කන්දරාවක ගිලී සිටින ලංකාවේ රැඩිකල් චරිත තමන් ලිංගිකත්වය පිළිබඳ සියල්ල දන්නා මහදැනමුත්තන් යැයි සිතා සිටිනවා.

👉 හතේ අපේ පොත නොවෙයි, ලෝකයේ කුමන හෝ රටක ඇතැයි කියන කුමන මට්ටමේ සුපිරි යැයි කියන ලිංගික අධ්‍යාපනයක් ලබා දුන්නත්, එයින් ස්ත්‍රී දූෂණ, ළමා අපචාර සපුරා නතර වන්නේ නැහැ. 

👉 බල්ලන්ට බළලුන්ටවත් නැති තරමේ ලිංගික නිදහසක් මිනිසාට දුන්නත්, එයින් ලිංගිකත්වයට අදාළ සමාජ ගැටලු, අපරාධ සපුරා අහෝසි කරන්න බැහැ. 

👉 සමාජ වගකීම්, බැඳීම්වලින් තොර අසීමිත වල්බූරු නිදහසකින් සිදුවිය හැක්කේ ඊට අදාළ ප්‍රශ්න තවදුරටත් වැඩි වීම මිස නතර වීම නොවෙයි කියන එක ජීව විද්‍යාත්මකව මෙන්ම සමාජ විද්‍යාත්මකවත් සනාථ කළ හැකි ඇත්තක්. 

👉 මෙහි ඉතා කෙටියෙන් සඳහන් කරන මේ කාරණය ගැන මා මේ පිළිබඳ මීට පෙර නොයෙක් තැන්වල කරුණු දක්වා තිබෙන බැවින් නැවත මෙහි ඒවා සඳහන් කරන්නේ නැහැ. 

👉 මේ ගැන කරුණු දැනගැනීමට අවශ්‍ය අය කළ යුත්තේ ඔවුන් තමන්ගේ සිහින දේශයන් ලෙස සලකන ඕනෑම රටක ලිංගික අපරාධ, ලිංගිකත්වයට අදාළ සමාජ ගැටලු, විකාර සහගත සිදුවීම් කොයි තරම් බරපතළ ලෙස පවතිනවාද යන්න හිතලු පසෙක තබා කරුණු සහිතව අධ්‍යයනය කර බැලීම පමණයි.

- Next page