සද්ද කළොත් අපි යනවා!..

Apr 25, 2026 at 02:25 PM

|

Lanka Leader

අපේ රට තමයි ථෙරවාදයේ මහගෙදර. මියන්මාව, තායිලන්තය, කාම්බෝජය, ලාඕසය, චම්පාව (දැන් දකුණු වියට්නාමය), චීනයේ ශි-ෂුවන්-පන්නා ප්‍රදේශය, බංග්ලාදේශයේ චිතගොං ප්‍රදේශය ඇතුළත් ථෙරවාද කලාපයට බුද්ධ ධර්මය ව්‍යාප්ත වුණේ අපේ රටේ ඉඳලා. ඒ හින්දා, දැන් “සාම පාගමන” රඟ දක්වන්නේ අපේ රටට ථෙරවාද බුදුදහම හඳුන්වාදීම වෙනුවෙන් නොවන බව අමුතුවෙන් කියන්න ඕන නෑ.

“සාම පාගමන” කියලා හඳුන්වන මේ රංගනයට ඇමෙරිකාවේ ඉඳලා වියට්නාම ස්වාමීන්වහන්සේලා හත් නමක් අපේ රටට වැඩම කළා කියලා ප්‍රවෘත්තියක් දැක්කා. ඊට අමතරව, මේ වැඩේට බල්ලෙකුත් ඇරැගෙන ඇවිල්ලා තියෙනවා. මේ කණ්ඩායම ඇමෙරිකාවේ ඉඳලා ලංකාවට ඇවිල්ලා තියෙන්නේ අනුර කුමාර දිසානායක ජනාධිපතිවරයාගේ ආරාධනයෙන් කියලත් කියනවා. මේ වැඩේට මහරාජා මාධ්‍ය ජාලායේ ප්‍රචාරක අනුග්‍රහයත් ලැබෙනවා. “ශ්‍රී ලංකා සාම දූපතේ - සාමය සඳහා ගෝලීය පාගමනක්” (A Global Walk for Peace in the Island of Peace – Sri Lanka) කියලා මේ වැඩේ නිල වශයෙන් නම් කරලා තියෙනවා.

මේ වැඩේට ලොකු ප්‍රචාරයකුත් ලබාදුන්නා. “එහි පස්සිකො” (එව බලව) කියලත් මිනිස්සුන්ට කිව්වා. ඉතින් දැන් අපේ මිනිස්සු පාරට ගිහිල්ලා මේ නාට්‍යය බලනවා.

පුංචි දූපතක් වුනත් අපේ රටේ ජන ඝනත්වය හුඟක් ඉහළයි. ඇමෙරිකාවේ ජන ඝනත්වය වර්ග කිලෝ මීටරයකට 37 ක්. අපේ රටේ ජන ඝනත්වය වර්ග කිලෝ මීටරයකට 372 ක්. මේ 371 හැදෙන්නෙත් අනුරාධපුර, මොණරාගල, වවුනියාව වගේ ජනගහනය අඩු ප්‍රදේශත් එකට දැම්මාම.

පාගමන මහ පාරක යන හින්දා මහ පාර අයිනේ ජන ඝනත්වය රටේ ජන ඝනත්වයට වඩා (372 ට වඩා) හුඟක් ලොකු එකක්. දඹුල්ලේ ඉඳලා නුවර හරහා කොළඹට එන මහ පාරේ දෙපැත්තේ ජීවත්වෙන ජනගහනය ගැන හිතන්න. අපි නිකමට අදාළ දිස්ත්‍රික්කවල ජන ඝනත්ව ගැන හිතමු.

මාතලේ - 310

මහනුවර - 715

කෑගල්ල - 514

ගම්පහ - 1,600

කොළඹ - 3,549

මෙතැන මාතලේ කිව්වාම ලග්ගල, පල්ලේගම විතරක් නෙවෙයි වස්ගමුව කැලේ පවා ඇතුළත්. ඉතින් පාර අයිනේ, මහ පාරේ ඉඳලා කිලෝ මීටරයක් ඇතුළත ඉන්න ජවගහනය ඊට හුඟක් වැඩි එකක්.

අපිට ඇමෙරිකාවට වගේ ලොකු පාරවල් නෑ. අපේ පාරවල් හුඟක් පටුයි. ඒ මදිවට පාර දෙපැත්තේ ම කඩ හදලා. පාරවල් යන වාහන ප්‍රමාණයත් වැඩියි.

ඒ මදිවට, මෙහෙම නාට්‍යය බලන්න යන සංස්කෘතික පුරුද්දකුත් අපිට තියෙනවා. ඉතින් “සාම පාගමන” කියලා රඟ දක්වන නාඩගම බලන්න අපේ මිනිස්සු යනවා. අපේ අය ඕන දෙයක් බලන්න කැමැති මනුස්ස කොට්ඨාශයක්. කෝවිඩ් වසංගතය දවස්වල අලුත් ආසාදිතයෙක් හම්බවුණා කියලා දැනගත්තාම ඒක බලන්න ගිය එවුනුත් මේ රටේ හිටියා. ඉතින් සාම නාඩගම බලන්න අපේ මිනිස්සු වැල නොකැඩි යෑම පුදුමයට කාරණයක් නෙවෙයි.

මේ ඔක්කොම කාරණා සහ තවත් කාරණා මහ ගොඩක් පාගමන් රංගනයට බලපෑම් කරනවා.

ඉතින් බැලූ බැල්මට අපිට පේනේ පාගමන අස්සේ ඇවිස්සෙන මහා ජංජාලයක්. මේ ජංජාලය පාලනය කරන්න පොලිසියට පවරලා. ඉහළ මට්ටමේ පොලිස් නිලධාරියෙක් මිනිස්සුන්ට දොස් කියනවා දවස් දෙකකට කලින් මම දැක්කා. ඊයේ වෙද්දි, වැඩේ තවත් බරපතල වුණා. මිනිස්සු නිශ්ශබ්ද වෙන්නේ නැතිනම් තමන් වේදිකාවෙන් බැහැලා යනවා කියලා නාට්‍යයේ රඟපාන අය කියනවා. ඉතින් මේ නාට්‍යය බලන්න නම් මිනිස්සු පාරට යන්නේ නැතුව ඉන්න ඕන.

මේ ජංජාලයට මිනිස්සුන්ට දොස් කියන්න එපා. මේකට වගකියන්න ඕන අපේ අහිංසක මිනිස්සු නෙවෙයි. මේ මගුල සංවිධානය කරපු එවුන්. මෙහෙම එකකින් සාමයක් ඇති කරන්න බැරි බව පොඩි දරුවෙක්ට වුනත් තේරෙනවා. මේ මැද්දේ බල්ලෙක්ට කරන්න පුළුවන් කිසිම වැඩකුත් නෑ. බල්ලා යොදාගෙන තියෙන්නේ මේ වැඩේට අදාළ ප්‍රචාරක උපක්‍රමයක් විදිහට විතරයි.

- ආචාර්ය වරුණ චන්ද්‍රකීර්ති