ආණ්ඩුවේ කෙසෙල් කැන හොරාට කලින් වැට පැනීම.. HSBC හි CEO ගේ ප්‍රකාශයට CPC දුන් උත්තරයෙන් අතේ මාට්ටු වූ දේ..

Apr 18, 2026 at 07:36 AM

|

Lanka Leader

HSBC ප්‍රධාන විධායක ජෝර්ජ් එල්හෙඩරි ජාත්‍යන්තරය ඉදිරියේ ලංකාව ගැන පහත කතාව කීවේය (පිංතූර බලන්න).

"The highest I've seen is $286 for a barrel of oil that reached Sri Lanka." 

එනම් බොරතෙල් මිල ලෝක වෙළඳපොලේ බැරලයක් ඩොලර් 110-115 ක් වන අවස්ථාවේ, එයට රක්ෂණ මුදල් සහ අනෙකුත්  සාධක ඇතුලත්ව ඩොලර් 130-140 වාගේ අගයකට අනෙකුත් ආසියානු රටවල් තෙල් මිලදී ගනිද්දී ලංකාවේ කවුරුන් හෝ (එනම් එක්කෝ ලංකා ඛනිජ තෙල් සංස්ථාව එනම් CEYPETCO හෝ සිනොපෙක් හෝ IOC හෝ RM Parks) බැරලයකට ඩොලර් 286 ක් ගෙවා ඇති බවයි. 

මෙය ජාත්‍යන්තර මාධ්‍ය (Bloomberg, Reuters වැනි) සහ ලංකාවේ මාධ්‍ය වාර්තා කල විගසම මේක බොරුවක් යැයි පෙන්වන්නට කලබල වූ ඛනිජ තෙල් සංස්ථාව (CPC) මාධ්‍ය නිවේදනයක් දමා කියා සිටියේ ඔවුන් යුද්ධයෙන් පසු තෙල් නැව් වලට ගෙවීමට පොරොන්දු වී ඇත්තේ ඩොලර් 71 - 113.29 ත් අතර මිලක් බවයි (පිංතූර බලන්න).

මෙය කලබලේ වැඩිකමට කරගත් නැවත හැරවිය නොහැකි “ලොකු” නස්පැත්තියකි. මේ නිවේදනයත් සමග ඔවුන් නොදැනුවත්වම තමන්ගේම මර උගුලක පැටලී අවසන්ය. ඒ ඇයි කියා කියවා බලන්න 👇.

දැන් මේ  පහත දක්වා ඇති අවස්ථාවන් දෙකෙන් එකක් අනිවාර්යයෙන්ම ඇත්ත විය යුතුය. මේ CPC ලිපිය විසින් එය ස්ථීර කර ඇත.

(01)

මාර්තු 21 රටේ තෙල් මිල ඉහළ දැමූ අවස්ථාවේ, ලෝක වෙළඳපොලේ බොර තෙල් මිලෙහි සාමාන්‍ය අගය ඩොලර් 95 මට්ටමේ තිබුනි. 

එහිදී ඩීසල් ලීටරයකට රු. 100 ක් සහ ප්‍රෙට්‍රල් ලීටරයකට රුපියල් 20 ක් පාඩු පිට විකුණන බවට ආණ්ඩුව කියා සිටියේය. අප මිල සූත්‍රය අනුව ගණනය කර පෙන්වූයේ එසේ නම් ආණ්ඩුව බොරතෙල් බැරලයක් $95 ට නොව ආසන්න වශයෙන් $250 කට මිලට ගත යුතු බවයි. (අපගේ ඒ ගණනය කල කොටසේ පින්තූරයක් මෙහි ඇත. සම්පූර්ණ ලිපියට ලින්ක් එක කමෙන්ට් එකක ඇත.)

එනම් එක්කෝ බැරලයක් $250 කට වඩා ගෙවා මිලට ගෙන ඇත. නැත්නම් අඩු මිලට මිලදී ගෙන, යුද්ධය මුවාවෙන් මිල වැඩි කර අති දැවැන්ත ලාභයක් ආණ්ඩුව ලබමින් සිටින බවයි.

දැන් එහි කුමන අවස්ථාව හරියාවි දැයි බලමු 👇.

(ආණ්ඩුවට වාසිදායක වන ලෙස, අපි ඩොලරයේ අගය රු. 315 ලෙස උපකල්පනය කරමු).

ඔවුන් කියන උපරිම මිල වන ඩොලර් 113.29 කට බැරලයක් ගෙනාවා නම් මිල සූත්‍රයට ආදේශ කල විට ආණ්ඩුව ලබන ලාභය විය යුත්තේ:

• Auto Diesel: ලීටරයකින් රු. 113 ක ලාභයක්!

• Super Diesel: ලීටරයකින් රු. 169 ක ලාභයක්!

• Octane 92: ලීටරයකින් රු. 134 ක ලාභයක්!

• Octane 95: ලීටරයකින් රු. 186 ක ලාභයක්!

උපරිම ගාණ වන ඩොලර් 113 ට ගෙනාවත් තත්ත්වය මේක නම්, ඔවුන් කියන විදිහට ඩොලර් 71 ක් නම් ගෙවන්නේ මේ ලාභය තවත් වැඩි වෙන එක අහන්න දෙයක් නෑනේ!

😂එවිට දැන් තියෙන ප්‍රශ්නය මේකයි:

අවස්ථාව 01 

ඔවුන් ඇත්තටම තෙල් ගෙනාවේ ඩොලර් 113 ට (හෝ 71 ට) නම්, මාර්තු 21 ඉන්ධන මිල ඉහළ දමමින් "අපි ඩීසල් ලීටරයකින් රු. 100 ක් පාඩු ලබනවා" යැයි ජනතාවට කීවේ අමුම අමු බොරුවකි. පාඩු ලබනවා වෙනුවට ඔවුන් සුපර් ඩීසල් ලීටරයකින් රු. 169 ක දැවැන්ත ලාභයක් ලබමින් සිටී! එසේනම් පාඩුවක් පියවීමට යැයි කියමින් මිල වැඩිකර, මේ සාමාන්‍ය ජනතාව මහ දවල් කොල්ලකන්නේ ඇයි? මිල වැඩි කිරීම රටේ සමස්ථ ආර්ථිකයට කොපමණ හානිදායකද යන්න අමුතුවෙන් කියන්න උවමනා නැත.

අවස්ථාව 02

 "රු. 100 ක පාඩුවක් පියවා ගැනීමට ජනතාවට මිල වැඩිකළා" යන්න සත්‍යයක් නම්, ඒ සඳහා, අප පෙන්වා දුන් පරිදි තෙල් බැරලයක් අනිවාර්යයෙන්ම ඩොලර් 250 කට වඩා වැඩි මුදලකට ගෙන තිබිය යුතුය!

එය හරියටම HSBC බැංකුවේ CEO කියූ ඩොලර් 286 ක ගනුදෙනුව සමග සියයට සියයක් පෑහේ. ලෝකයේ වැඩිම මිල වන ඩොලර් 286 කට බොරතෙල් බැරලයක් ගෙන අනුරගේ ආණ්ඩුව ලෝක වාර්තාවක් තිබ්බාද?

එය එසේනම් උපරිමයෙන් 150 කට ගත හැකිව තිබූ බැරලයකට ඩොලර් 286 ක් ගෙව්වෙ ඇයි? එය සත්‍යයක් නම් මෙම backdoor deals හරහා තෙල් ගෙන, ඔවුන් ඩොලර් මිලියන ගණනින් මහජන මුදල් කොල්ලකා හෝ නාස්ති කර ඇත්ද?

මේ කුමන අවස්ථාව ගත්තද, ආණ්ඩුව සහ ජනාධිපතිවරයා ජනතාව ඉදිරියේ සම්පූර්ණයෙන්ම නිරුවත් වී හමාරය. එක්කෝ මොවුන් ලාභ තබාගෙන ජනතාවට බොරු පාඩුවක් පෙන්වා පොම්පයේදී සාක්කුවට විද ඇත. 

නැත්නම් ඩොලර් 286 කට තෙල් මිලට ගෙන අප රටේ තියා ලෝකේ වෙනත් කිසිම රටක නොවූ ලෝක වාර්තාවක් තබා ඇත. දිසානායක ජනාධිපති ලෝක මට්ටමේ නායකයෙක් කියා කොහෙදෝ, කවුදෝ කියා තිබෙනු දුටිමු. ඒ සමහරවිට මේ ලෝක වාර්තාව නිසා විය හැක?

මෙහි විශාල අවුලක් ඇති බව දැන් ගණිතමය වශයෙන් ඔප්පු වී අවසන්ය. The math doesn't lie, even if the government does! යනුවෙන් ප්‍රසිද්ධ ඉංග්‍රීසි කතාවක්ද ඇති බව මතක් කල යුතුය.

- Sarathi Ratnayake

(සමාජ මාධ්‍යයෙන් උපුටා ගන්නා ලදී)