අනුරගේ ගජමිතුරු කල්ලිය..

Mar 10, 2026 at 10:48 AM

|

Lanka Leader

ෆිට්ස් එයා (Fits Air) ශ්‍රී ලංකාවේ ප්‍රමුඛතම පුද්ගලික ගුවන් සේවය බවත්, එහි සම හිමිකරුවන් දෙදෙනෙක් සිටින බවත් ෆිට්ස් එයා ආරම්භ කළේ එක්ස්පො එයා නමින් බව සහ එය ආරම්භ කළේ ඕමාර් කසීම් සහ හනීෆ් යුසූෆ් විසින් පවත් සමාජ මාධ්‍යයේ තොරතුරු අනාවරණය කරයි.

හනීෆ් යූසුෆ්  මාලිමා ආණ්ඩුවේ බස්නාහිර පළාත් ආණ්ඩුකාරවරයා බවත් ෆිට්ස් එයා ගුවන් සේවය ගුවන් මගීන්ගෙන් අයකරන එම්බාර්කේෂන් ටැක්ස් (Embarkation tax) කියලා හඳුන්වන  බද්ද සිවිල් ගුවන් සේවා අධිකාරියට තවමත් ගෙවා නැති බවත් මෙමගින් හෙළිදරව් කරයි.

මේ සම්බන්ධයෙන් චන්දන රොහාන් නිෂ්ශංක ගේ මුහුණු පොතින් උපුටා ගත්  අනාවරණය පහළින්..

ශ්‍රී ලංකාවෙන් පිටත් වෙන හැම ගුවන් මගියෙක්ම ගෙවීමට අවශ්‍ය බද්දක් තියෙනවා.

එම්බාර්කේෂන් ටැක්ස් (Embarkation tax) කියලා හඳුන්වන මේ බද්ද සෑම ගුවන් ටිකට් පතකටම ඇතුලත් කරලා තියෙන්නේ.

ඔබ ශ්‍රී ලංකාවෙන් මොන රටට ගියත්, ඔබ ගන්න ගුවන් ටිකට් පතට දැනටම මේ සල්ලි ඇතුලත් කරලා තියෙනවා.

මැදපෙරදිග ගෘහ සේවිකාවො, කොරියාවේ  ජපානේ යන කොල්ලො, ඕස්ට්‍රේලියාවේ යන කට්ටිය, සිංගප්පෝ බිස්නස් වලට යන කට්ටිය හැමෝම මේ බද්ද ගෙවනවා.

ශ්‍රී ලංකන් ගුවන් සේවය, ෆිට්ස් එයා ආදී සෑම ගුවන් සේවයකම ගුවන් ටිකට් පතට එම්බාර්කේෂන් ටැක්ස් එක ඇතුල් කරලා තියෙන්නේ.

2026 වසරේ දී මේ බදු මුදල ඩොලර් 60 ක්. ඔබගේ සෑම ගුවන් ටිකට් පතකම සැබෑ අගය ඊට ඩොලර් හැටක් (රු 18,500) අඩුයි. ඩොලර් හැටක් ඔබ ගෙවනා බද්ද.

මේ බද්ද එකතු කරන්නේ මහා භාණ්ඩාගාරය වෙනුවෙන් ශ්‍රී ලංකා සිවිල් ගුවන් සේවා අධිකාරිය (CAASL).

මේ බදු මුදලෙන් 30% ක් සෘජුවම මහා භාණ්ඩාගාරයට.

12% - 15% ක් අතර මුදලක් ගුවන් තොටුපළ සමාගමට (Airport and aviation authority of sri lanka). 

ඉතිරි 55% ක ආසන්න මුදල සංචාරක ප්‍රවර්ධන මණ්ඩලයට. (මන්ද මෙයින් විශාල කොටසක් සංචාරකයන් ලබා ගන්නා පිටත් වීමේ ගුවන් ප්‍රවේශ පත්‍ර මත පැනවෙන බදු නිසා) 

............. ............... ................. ...........

ෆිට්ස් එයා (Fits Air) ශ්‍රී ලංකාවේ ප්‍රමුඛතම පුද්ගලික ගුවන් සේවය.

එහි සම හිමිකරුවන් දෙදෙනෙක් ඉන්නවා.

ෆිට්ස් එයා ආරම්භ කළේ එක්ස්පො එයා නමින්. එක්ස්පො ලංකා සමාගමේ ගුවන් සේවයක් විදියට.

එක්ස්පෝ ලංකා ආරම්භ කළේ ඕමාර් කසීම් සහ හනීෆ් යුසූෆ්.

හනීෆ් යූසුෆ් තමයි මාලිමා ආණ්ඩුවේ බස්නාහිර පළාත් ආණ්ඩුකාරවරයා.

මාලිමාවේ ප්‍රධානපෙළේ සාමාජිකයෙක්.

ඕමාර් කසීම් සහ හනීෆ් යුසූෆ් කියන්නේ එකම පවුලේ මස්සිනාලා (First cousins)

ඇබර්ඩීන් හෝල්ඩිංග්ස් කියන්නේ ඕමාර් කසීම්ගේ ව්‍යාපාරය. ඇබර්ඩීන් හෝල්ඩිංග්ස්, එක්ස්පෝ ලංකා පවුලේ බිස්නස්.

දැන් ෆිට්ස් එයා පාලනය කරන්නේ ඕමාර් කසීම්ගේ පුතුන් දෙන්නා, ශෆීක් කසීම් සහ අම්මාර් කසීම්.

කරළිය ඉදිරියේ ශෆීක් සහ අම්මාර් හිටියට තාම මේ ව්‍යාපාර ජාලයම පාලනය කරන්නේ ඕමාර් සහ බස්නාහිර ආණ්ඩුකාර හනීෆ් යුසූෆ්.

කතාව ඒක නෙවෙයි.

ෆිට්ස් එයා ගුවන් සේවයත් මේ බද්ද ඔවුන්ගේ ගුවන් ටිකට් පත්‍ර වලින් අය කරනවා.

නමුත් ෆිට්ස් එයා ගුවන් සේවය විසින් සිවිල් ගුවන් සේවා අධිකාරියට තවමත් මේ පිටත්වීමේ බද්ද ගෙවා නැහැ.

මේ බද්ද දැනටම ෆිට්ස් එයා පාවිච්චි කරපු පාරිභෝගිකයො, ගුවන් ටිකට් පත්‍රයක් මිලට ගනිද්දිම ෆිට්ස් එයා එකට ගෙවලා ඉවරයි.

මේ ෆිට්ස් එයා ලාභයෙන් ගෙවන බද්දක් නෙවෙයි.

ඔවුන් එකතු කරපු බද්දක්.

නමුත් ෆිට්ස් එයා ඒ එකතු කරගත්තු බදු මුදල  පවා සිවිල් ගුවන් සේවා අධිකාරියට ගෙවා නැහැ.

දැනට ෆිට්ස් එයා සමාගම එම්බාර්කේෂන් ටැක්ස් රුපියල් ඩොලර් බිලියන 4 ක මුදලක්, ආණ්ඩුවට ගෙවීමට තියෙනවා.

රුපියල් බිලියන හතරක්. එනම් කෝටි 400 ක්. අති විශාල බදු මුදලක්.

මේ බිලියන හතරෙන් 30% ක් සෘජුවම මහා භාණ්ඩාගාරයට යා යුතු, රටේ මිනිස්සුන්ගේ මුදල්.

එනම් රුපියල් බිලියන 1.2 ක සෘජු මුදලක් මහා භාණ්ඩාගාරයට ගෙවිය යුතුයි.

නමුත් මේ බදු එකතු කිරීමේ බලය හිමි ශ්‍රී ලංකා ගුවන් සේවා අධිකාරිය දිනෙන් දින ලියුම් ගසමින්, ෆිට්ස් එයා සමාගමට මේ බදු මුදල නොගෙවා සිටීමට සහන කාල ලබා දෙමින් ඉන්නවා.

ඒ ක්‍රියාව පසුපස දෙදෙනෙක් ඉන්නවා.

එක් අයෙක් මේ මහා බදු වංචාවට දේශපාලනික නායකත්වය ලබා දෙන බස්නාහිර ආණ්ඩුකාර හනීෆ් යුසුෆ්.

දෙවැන්නා මේ ආණ්ඩුව යටතේ සිවිල්  ගුවන් සේවා අධිකාරියේ (CAASL) ප්‍රධාන විධායක නිළධාරියා සහ අධ්‍යක්ෂක ජනරාල් ලෙස පත් කළ දමින්ද රඹුක්වැල්ල.

දමින්ද දිගින් දිගටම ෆිට්ස් එයා ආයතනයෙන් අයවිය යුතු රුපියල් බිලියන හතර නොගෙවීමට සහන කාල ලබා දෙමින් ලිපි යවමින් සිටිනවා.

මේ මැදපෙරදිග රස්සා කරන්න ගියපු, මේ මොහොතෙත් යුද්ධයට බයේ ජීවත් වෙන, ජපානයේ කොරියාවේ දුක් විඳින , යුරෝපයේ සීතලේ ගැහි ගැහි ඉන්න අහිංසක ශ්‍රී ලංකාවේ මිනිස්සු සහ මෙරටට පැමිණි සංචාරකයන් ගෙවපු මුදල්.

ඒ බදු මුදල් අනීතිකව ෆිට්ස් එයා සමාගම තමන් ලඟ තබාගෙන ඉන්නවා.

ආණ්ඩුවෙන් සිවිල් ගුවන් සේවා අධිකාරියට පත් කරපු නිළධාරියා මේ මහා බදු වංචාවට උදව් කරනවා.

සිවිල් ගුවන් සේවා අධිකාරියේ අධ්‍යක්ෂක ජෙනරාල් දමින්ද රඹුක්වැල්ල ගැන අප වෙනම සාකච්ඡා කළ යුතුයි.

ඔහු තනතුරට පත් කරන්නේ ආරක්ෂක ලේකම් තුයියකොන්තා.

ඔහු සිවිල් ගුවන් සේවා අධිකාරියේ DG බවට පත් වීමට කිසිඳු සුදුසුකමක් ඇති පුද්ගලයෙක් නෙවෙයි.

ඔහු සිවිල් ගුවන් සේවයේ නියමු පරීක්ෂණ අසමත් වූ පුද්ගලයෙක්. නමුත් ඔහු 'කැප්ටන්' නාමය භාවිතා කරනවා. හරියට ආචාර්ය අශෝක රන්වල වගෙයි. එය වෙනම කතාවක්.

මේ දූෂිත ගණුදෙනුව වෙනුවෙන් දමින්ද රඹුක්වැල්ලට විවිධ වරප්‍රසාද හිමිවෙනවා.

මුදල් තෑගි වලට අමතරව, ඔහු සිවිල් ගුවන් සේවා අධිකාරියෙන් ඉවත් වූ දාට ෆිට්ස් එයා රැකියාවක් ඔහුට සුරක්ෂිතයි.

කොහොම වුනත් මේ රටේ අහිංසක මිනිස්සුන්ට කෝටි 400 ක් තබා රුපියල් 400 ක් හෝ බදු නොගෙවා ඉන්නට බැහැ.

ඔවුන් පාන් රාත්තලට පවා බදු ගෙවනවා. 

ඔබට ක්‍රෙඩිට් කාර්ඩ් එකක රුපියල් මිලියනයක ණය වාරිකයක් ඇත්නම්, ඔබට බැංකුවෙන් කොපමන පීඩනයක් දෙනවද ?

ඒ ඔබට පමණයි. 

ඒ අතරේ නිර්ප්‍රභූ ආණ්ඩුවක් බලයේ සිටිද්දී මහා පරිමාණ කෝටිපති ව්‍යාපාරිකයන්, රජයට කෝටි 400 ක බදු පොලු තබා නිදැල්ලේ සිටිනවා.

- sachin rathwatta -