බටහිර රටවල් ලංකාවේ ගෙල සිරකරද්දී ශ්‍රී ලංකාව වෙනුවෙන් පෙනීසිටි ඉරානය..

Mar 1, 2026 at 03:58 PM

|

Lanka Leader

ශ්‍රී ලංකාවේ 2009ට පෙර ජාතිවාදී අන්තවාදී කුරිරු ත්‍රස්ත මෙහෙයුමක් දියත් වෙමින් තිබුණා. 

👉 මේ මෙහෙයුම වෙලාවේ අමෙරිකාව ප්‍රමුඛ බටහිර රටවල් පෙනී සිටියේ ශ්‍රී ලංකාවට එරෙහිව ඒ අන්තවාදී ජාතිවාදී සංවිධානයේ ආරක්ෂාව වෙනුවෙන්. 

👉 හැබැයි ඒ මොහොතේ ඉරානය, ලිබියාව වැනි මුස්ලිම් රටවල් ශ්‍රී ලංකාවේ ත්‍රස්තවාදය පැරදවීමේ සටනට විශාල සහයෝගයක් ලබාදුන්නා. 

👉 ඉරානය එහිදී ලංකාවට අවශ්‍ය තෙල් සහ ණය පහසුකම් ලබාදෙන්න කටයුතු කළා වගේම අමෙරිකාව ප්‍රමුඛ රටවලින් එල්ල වූ මානව හිමිකම් තර්ජන හමුවේත් දිගින් දිගටම ලංකාව වෙනුවෙන් පෙනී සිටියා.

👉 බටහිර රටවලින් ලංකාවේ ගෙල සිරකරමින් සිටි මොහොතක ඉරානයේ සහයෝගය අපට විශාල ශක්තියක් වුණා.

👉 එදා ජාතිවාදය අන්තවාදය වෙනුවෙන් පෙනී සිටියේ අමෙරිකාව. ඉරානය තමයි ඊට එරෙහිව එය පරාජය කිරීමේ සටනට සහයෝගය ලබාදුන්නේ. 

👉 හැබැයි අද ලංකාවේ බොහෝ දෙනාට ත්‍රස්තවාදය පැරදවීම වෙනුවෙන් දිවි පිදූ රණවිරුවන් අමතක වී ඇති ආකාරයටම ඉරානයත් අමතකව ගොස් තිබෙනවා.

👉 එවැනි ඇතැම් පිරිස් අද අමෙරිකාව ඉරානයට එරෙහිව දියත් කර ඇති ම්ලේච්ඡ යුද්ධය ආගමික අන්තවාදයකින් ඉරාන ජනතාව මුදාගැනීමට කරන මහා මෙහෙවරක් විදිහට අර්ථ දක්වමින් සිටිනවා. 

👉 මෙය ලෝක දේශපාලනයේ හැසිරීම පිළිබඳ අවම හෝ අවබෝධයකින් තොරව හුදු ළාමක මුස්ලිම් විරෝධය මත පමණක් ගොඩනගන මුග්ධ තර්කයක්. 

👉 අමෙරිකාවට කිසිදු රටක අන්තවාදයන් පරාජය කිරීමට හෝ ඒවායින් ජනතාව මුදාගැනීමට ඇති රුදාවක් නැහැ. ඔවුන් සියල්ල කරන්නේ පරිහානියට යමින් තිබෙන තමන්ගේ අධිරාජ්‍යයේ පැවැත්ම වෙනුවෙන් පමණයි. 

👉 ඒ වෙනුවෙන් ඔවුන් ඕනෑම මොහොතක අන්තවාදයන්, ජාතිවාදයන් පෝෂණය කිරීමට කටයුතු කරනවා වගේම තමන්ට ඕන වුණාම අන්තවාදී ලේබල් අලවමින් තමන්ගේ ප්‍රතිවාදීන්ට පහරදීමත් සිදුකරනවා. 

👉 අමෙරිකාවේ මැදිහත් වීමෙන් මේ විදිහට විනාශ කළ ලිබියාව, ඉරාකය, සිරියාව වැනි කිසිදු රටක් ආගමික අන්තවාදයෙන් නිදහස් වී නැහැ. ඇත්තටම සිදුවුණේ ඒ රටවල ආගමික අන්තවාදී ක්‍රියාකාරකම් බරපතළ ලෙස වර්ධනය වී ඒ රටවල් අමු සොහොන් පිටි බවට පත්වීම පමණයි. 

👉 ලෝකයේ කිසිම රටක කිසිදු පාලන ක්‍රමයක් පරමාදර්ශී නැහැ. ඉරානය තුළ පැවති ක්‍රමයේත් ප්‍රබලතා වගේම දුබලතාත් තියෙන්න පුළුවන්. 

👉 හැබැයි ලංකාව වැනි රටවල බොහෝ දෙනා දන්නේ ඉරානය පිළිබඳ බටහිර මාධ්‍ය විසින් අපට මවා පෙන්වන කළු පැතලි පින්තූරය ගැන පමණයි. 

👉 ඒ පින්තූරය හැර වෙන කිසිවක් නොදන්නා අය තමයි ඉස්ලාම් විප්ලවයට පෙර අඩ නිරුවතින් සිටි කාන්තාවන්ගේ පින්තූර සමාජ මාධ්‍යවල පළ කරමින් ඉස්ලාම් විප්ලවයට පෙර පැවති නිදහසේ සුරපුරයක් ගැන සරල තර්ක ගොඩනගන්නේ.

👉 හැබැයි ඉස්ලාම් විප්ලවයෙන් පසු මැදපෙරදිග කලාපයේ ස්වාධීන බලවත් රටක් ලෙස නැඟී සිටිමින් ඉරානය අත්කරගත් දැවැන්ත ප්‍රගතිය, විද්‍යාත්මක දියුණුව, ඉහළ ජීවන තත්ත්වය, ඒ තුළ කාන්තාවන් ඇතුළු රටේ සමස්ත ජනතාවට අත්වූ ජයග්‍රහණ ආදිය ගැන ලංකාවේ බොහෝදෙනා තුළ කිසිදු අදහසක් නැහැ. 

👉 ඒ ගැන මීට පෙර නොයෙක් අවස්ථාවල මා අදහස් පළ කොට තිබෙනවා. මේ ලිපියේ පළමු කොමෙන්ටුව යටතේ පළ කර ඇති මිලියනයක් නැරඹූ වීඩියොව ඒ සඳහා එක් උදාහරණයක්. අවශ්‍ය අයට එය නරඹන්න පුළුවන්. 

👉 ඉරානය මේ සියලු ජයග්‍රහණ අත්කරගත්තේ තමන්ගේ රටට එරෙහිව පැනවූ සම්බාධක කන්දරාවක් මැද බවත් අප අමතක නොකළ යුතුයි. 

👉 ඉරානයේ ඇත්තටම අන්තවාදයක් ක්‍රියාත්මක වුණත් අමෙරිකාවට ප්‍රශ්නය තිබෙන්නේ අන්තවාදයක් ගැන නොවෙයි. ඉරානයට වඩා අන්තවාදී රටවල් මැදපෙරදිග තිබුණත් ඒ රටවල් තමන්ට අවනත නම් එවැනි රටවල රෙජීම් චේන්ජ් සඳහා අමෙරිකාව කිසි විටක මැදිහත් වන්නේ නැහැ. 

👉 ඔවුන්ට ඇත්තේ ඔවුන්ගේ බලයට නතු නොවී ස්වාධීනව නැගී සිටිමින් ජයග්‍රහණ රාශියක් අත් කරගත් ස්වෛරී රාජ්‍යයක් විනාශ කිරීමේ අවශ්‍යතාව පමණයි. එමෙන්ම මේ ඔස්සේ තමන්ගේ ප්‍රධාන සතුරෙකු වන චීනය වැනි රටවල් දුර්වල කිරීමටද ඔවුන් බලාපොරොත්තු වෙනවා. මොකද ඉරානය කියන්නේ චීනයේ ප්‍රධානතම බලශක්ති සැපයුම්කරුවෙක්. 

👉 එවැනි රටක් බිඳ වැට්ටවීම වෙනුවෙන් තමයි ඔවුන් ආගමික අන්තවාදය, ඊනියා න්‍යෂ්ටික අවි ගැන චෝදනා, ත්‍රස්තවාදී චෝදනා ආදි සියල්ල ඉස්මතු කරන්නේ. 

👉 එදා ලිබියාවට එරෙහිව අමෙරිකාව මේ ආකාරයෙන් ප්‍රහාර එල්ල කරන අවස්ථාවේ ලංකාවේ වාමාංශිකයන් ඇතුළු විශාල පිරිසක් ඒ වෙනුවෙන් පෙනී සිටියා. ලිබියානු කම්කරු පන්තියේ නැගිටීමෙන් ලිබියාවේ සිදුවන්නට යන සමාජවාදී විප්ලවයක් සිහින දකින තත්ත්වයට ඒ පෙනී සිටීම දුරදිග ගියා. 

👉 එදා මා ඒ සම්බන්ධව පුවත්පත් ඔස්සේ කරුණු දක්වන විට  Slavoj Zizek    වැනි මහා වාමාංශික චින්තකයන් පවා ලිබියාවේ නැගිටීම ගැන සුබවාදී දෙයක් ලෙස දකින විට මා දන්නේ මොනවාදැයි  එදා ලංකාවේ වාමාංශිකයන් ප්‍රශ්න කළා. 

👉 හැබැයි ඒ ඊනියා ජනතා නැගිටීමෙන් පසු බිහිවුණේ ත්‍රස්ත කල්ලි ආයුධ ඔසවාගෙන රට පුරා සැරිසරන, අයිඑස් වැනි අන්තවාදීන් මහ දවාලේ මග මග මිනිසුන් පෙළ ගස්වා බෙලි කපන, රටින් පැන යන මිනිසුන් බෝට්ටු පිටින්  මුහුදේ ගිලී මරණයට පත් වන ඛේදජනක ලිබියාවක්.

👉 අද ඉරානයේ සිදුවන දෙයට අත්පොලසන් දෙමින්, මෙය ආගමික අන්තවාදී මුල්ලාවරුන්ගේ පාලනයෙන් ඉරානය නිදහස් කිරීමට කරන සටනක් ලෙස අර්ථදක්වන නොදරුවන්ට අනාගතයේදී ලිබියාවට අත් වූ ඉරණමට සමාන ඉරණමක් ඉරානයටත් අත් වන ආකාරය දැකබලා ගැනීමට හැකිවේවි. 

👉 අද ඉරාන අධ්‍යාත්මික නායකයා ජීවිතයෙන් සමුගත්තත් ඔහු නික්ම යන්නේ අමෙරිකානු අධිරාජ්‍යවාදයට එරෙහිව දැවැන්ත සටනක් කරමින් එහි ජයග්‍රහණ තම ජනතාවට දිනා දුන් ශ්‍රේෂ්ඨ නායකයෙක් විදිහට. අද ඔහුගේ මරණයත් සමග එරට ජනයා දහස් ගණනින් වීදි බැස ශෝකය පළ කරන ආකාරය ඕනෑම කෙනෙකුට බලන්න පුලුවන්. 

👉 පසුගිය දිනවල ඉරාන රජයට එරෙහිව එරට විරෝධතා දියත් වන විටත් ඊට වඩා විශාල පිරිසක් රජයට පක්ෂව පාරට බැස්සා. හැබැයි ලෝක මාධ්‍යවලින් අපි වැඩිපුර දකින්නේ රජයට  එරෙහි විරෝධතාවල ජවනිකා පමණයි. 

👉 මේ සටනින් අමෙරිකාව ජයග්‍රහණය කළහොත් තවදුරටත් ශ්‍රී ලංකාව වෙනුවෙන් පෙනී සිටින ඉරානයක් අනාගතයේදී අපට දැකගන්නට බැරිවෙන්නට තිබෙන ඉඩකඩත් ඉතා විශාල බව අවසාන වශයෙන් සඳහන් කළ යුතුයි. 

- ඉසුරු ප්‍රසංග