බොරු කියන්නේ රවීද, නන්දලාල්ද?

Feb 13, 2026 at 06:47 AM

|

Lanka Leader

ඉදිරියේදී ඇතිවෙන්න නියමිත අර්බුදය සහ අරගලය ගැන සමාජය සංවාදයක් නිර්මාණය වෙලා තියනවා.ඒ අරගලයත් 2022ක පන්නයේ බල පෙරලියක් දක්වා යයිද කියන සාකච්ඡාවත් ඒ අතර තියනවා.ඒ ගැන විවිධ පුරෝකථනයන් තියනවා.රටේ රාළ දිගටම කිව්වේ 2026 අධි අර්බුදකාරී අවුරද්දක් සහ 2027 පලවෙනි කාර්තුව පෙරලිකාරී කාලපරිච්ඡේදයක් කියලයි.බල පෙරලියක් සම්බන්ධව සළකුණක් දැනට නැති උනත් දැවැන්ත අර්බුදයක් සහ අරගලයක් ගැන නං පෙරනිමිති හතර වටෙන් පහල වේගෙන එනවා.

මේ අවුරද්ද ආරම්භයත් එක් අර්බුද ගණනාවක් කරලියට ආවා. හරිනිගේ අධ්‍යාපන ප්‍රතිසංස්කරණ ක්‍රියාත්මක කරන්න තිබුණේ ජනවාරි 06 වෙනිදා උනත් ඊට ඉස්සෙල්ලා රටේ දැවැන්ත විරෝධයක් මතුවුනා.ඒක නිසාම 06 ශ්‍රේණියට ගෙනාව අධ්‍යාපන ප්‍රතිසංස්කරණ අකුල ගන්න ආණ්ඩුවට සිද්ධවුනා.හැබැයි හරිනි නං තවමත් කයිවාරු ගහන්නේ වැඩේ කරනවාමයි කියලා.ඊළඟට සෞඛ්‍ය ක්ෂේත්‍රයේ සටන තවම ඇදි ඇදී යනවා. 

ඊට අමතරව මතුවුන පාසැල් සංවර්ධන නිළධාරීන්ගේ සටන තවත් බොරුවක් කියලා තාවකාලික කල්දාගන්න අනුරට පුළුවන් වුනා.

දැන් මාදැල් ධීවරයන්ගේ සටනක් ජනාධිපති ලේකම් කාර්යාලය ඉස්සරහට ඇවිල්ලා.ඊට අමතරව ආණ්ඩුව ගෙනාපු පදිංචිකරුවන් ආරක්ෂා කිරීමේ පනත අකුලගෙන තියනවා.ත්‍රිකුණාමල සම්බුද්ධත්ව ජයන්ති විහාරස්ථානයේ බුද්ධ ප්‍රතිමා වහන්සේ නමක් තැන්පත් කිරීමට එරෙහිව පොලිය මැදිහත් කරලා ආණ්ඩුව ආරම්භ කරපු සිංහල බෞද්ධයන්ගෙන් පලිගැනීමට එරෙහි සටන තවමත් අවසන් නෑ.

ඒක නිසා බෞද්ධ භික්ෂුන් වහන්සේලා සහ බෞද්ධ ජනතාව ආණ්ඩුව එක්ක ලොකු ආරෝවක ඉන්නවා.කොයි මොහොතක හරි බෞද්ධ සමාජය ඇතුලේ ලොකු පිපිරීමක් වෙන්න පුළුවන්.ඒ වගේම මේ ආණ්ඩුව කොටි ඩයස්‌පෝරාවේ සහය ඇතිව බෙදුම්වාදය පෝෂණය කරනවා සහ ඒ වෙනුවෙන් දෙමල ජාතිවාදය අවුස්සනවා කියන සැකයත් සමාජයට කාන්දුවෙලා තියනවා.

ඊට අමතරව මේ මාසේ 28 වෙනිදා දක්වා මහජන අදහස් ගන්න කියලා කොලේ වහලා තියන ත්‍රස්තවාදය වැලැක්වීමේ පනත වෙනුවට එන්න නියමිත ත්‍රස්තවාදයෙන් රාජ්‍යය ආරක්ෂා කර ගැනීමේ පනත ගෙනාවොත් තවත් ලොකු සටනක් ඇවිලෙන්න පුළුවන්.මේ ආණ්ඩුවේ බැරිකම විසින් හෙට දවසේත් තවත් රණ්ඩු ගොඩක් වැටෙන්න පුළුවන්.ඇත්තටම ගත්තොත් අර්බුදය නිර්මාණය වෙන්න බලපාන ප්‍රධාන හේතුව ආර්ථිකය.

ආර්ථික අර්බුදය තමයි දේශපාලන අර්බුදයක් බවට හැරෙන්නේ. මේ වෙනකොට ආර්ථික ගැන කරන විවිධ පුරෝකථන අපට නිතර අහන්න ලැබෙනවා.අද ආණ්ඩුවට වාසිදායක පුරෝකථන කරන කෙනෙක් විදිහට මහ බැංකු අධිපති නන්දනලාල් වීරසිංහ ගන්න පුළුවන්.නන්දනලාල් කියන්නේ මාලිමා ආණ්ඩුව ආපු ගමන් එලවන්න හිටපූ කෙනෙක්.කොහොම හරි නන්දලාල් 360° ක් අනිත් පැත්ත හැරිලා ආණ්ඩුවට සුදුහුණු ගාන කෙනෙක් බවට පත්වෙලා.

රටේ රාළගේ විග්‍රහයට අනුව නං ආණ්ඩුව නන්දලාල් දිනාගත්තා නෙවෙයි.නන්දලාල් තමන්ට ඕනි තැනට ආණ්ඩුව ගෙනවා. නන්දලාල්ට ඕනි තැන කියන්නේ වෙන මොකවත් නෙවෙයි IMF එකට ඕනි තැනයි.අද තියෙන්නේ IMF එකට පූර්ණ වශයෙන් යටත්වුන ආණ්ඩුවක්.නන්දලාල් කියන්නේ IMF Agent කෙනෙක්ද කියන සැකය කාටත් තියනවා.නන්දලාල් දැන් කියන්නේ " 2028 දී ණය ගෙවාගන්න බැරිවෙයි කීම කිසිම පදනමක් නැති කතාවක්. ඔය කතාව කියලා ආයෝජකයෝ අධෛර්යමත් කරන්න එපා " කියලයි.

2028දි ණය ගෙවන්න බැරිව රට ආපහු අර්බුදයකට යයි කියන කතාවේ කිසිදු පදනමක් නෑ.එහෙම කීමෙන් වෙන්නේ ආයෝජකයන් තුළ සැක සංකා මතුවෙලා අපට ණය දෙන්න කැමැත්තෙන් ඉන්න රටවල් පවා අධෛර්යමත් වීමලු.නන්දලාල් කියන විදිහට 2025 අවුරුද්දේදී අපි ඩොලර් බිලියන 2.5 ක මුදලක් විදේශීය ණය සේවාකරණය සදහා වැයකරලා තියනවා.

ඉදිරි කාලය පිළිබදව සලකා බැලීමේ දී ණය සේවාකරණය සදහා වාර්ෂිකව අවශ්‍යවන ඩොලර් ප්‍රමාණය ඩොලර් බිලියන 3.5 ක් වගේලු.ඉදිරි වසර දෙක තුළ ඩොලර් බිලියන අටත් දහයත් අතර ප්‍රමාණයක විදේශ සංචිත ප්‍රමාණයක් රැස්කර ගැනීමට රජය අපේක්ෂා කරන බැවින්,ආයෙත් ණය ප්‍රතිව්‍යුහගතකරණයකට යන්න ඕනි නෑ කියලයි නන්දලාල් කියන්නේ.දැන් නන්දලාල් කියන්නෙත් අනුර කියන ජාතීයේම කතාවක්.නන්දලාල් අනුරගෙන් ඉගෙන ගෙනද නැත්තං අනුර නන්දලාල්ගෙන් ඉගෙනගෙනද කියලා කියන්න දන්නේ නෑ. 

මෙතනදී එජාප මන්ත්‍රී රවී කරුණානායක කියන අදහසත් සලකා බලන්න ඕනි.මොකද මහ බැංකුවේ ක්‍රියා කලාපය සම්බන්ධව රවී දිගටම විවේචනයක් ගේනවා.එකක් මහ බැංකුව ස්වාධීන වීමෙන් රටට ඇතිවුන ප්‍රයෝජන මොකද්ද කියලා රවී දිගටම ප්‍රශ්න කළා. ඒ වගේම මහ බැංකුවේ භූමිකාව ගැනත් රවී දිගටම ප්‍රශ්න කරනවා.රවී දිගටම කිව්වේ අපේ ආයෝජකයන් සහ ව්‍යාපාරිකයන් හම්බකරලා දෙන ඩොලර් ටික වාහන ගේන්න යොමු කිරීමෙන් රුපියල් කඩා වැටෙන්න පුළුවන් කියලයි.

එහෙම උනොත් රුපියල බාල්දුවීමට සාපේක්ෂව අපට උන ලාබ සහ පාඩුව හරියට ගණනය කරන්න ඕනි කියන කතාව රවී දිගටම මතු කරනවා.රවී හැබැයි දිගටම කිව්වා ඔය වැඩෙන් රුපියල් කඩා වැටෙන්න පුළුවන් කියලා.ඒ වගේම රුපියල කඩා වැටිලා තියනවා?රවී කියන විදිහට ගිය අවුරද්දේ අපි ඩොලර් බිලියන 905 ක ආදායමක් උපයලා තියනවා.ඒ බිලියන 905 උපයන්න අපි ඩොලර් බිලියන 2.1 ක් වියදම් කරලා තියනවා.

හැබැයි ඒ ආදායම ඉපයිම ඇතුලේ 292 ට තිබුණ ඩොලර් එකේ වටිනාකම අද වෙනකොට රුපියල් 314ට ගිහින් තියනවා. රුපියලේ මේ කඩා වැටීමත් එක්ක අපේ තියන තොග ණය ප්‍රමාණය ඩොලර් බිලියන 884කින් වැඩිවෙලා.ඩොලර් බිලියන 905 ක ආදායමක් හොයද්දී ඩොලර් බිලියන 884ක් ණය සංචිතයට එකතු වෙනවා කියන්නේ අපේ ඇත්ත ආදායම ඩොලර් බිලියන 21යි.නිකං හිතන්නකෝ මේ යන විදිහට ඩොලර් එක රුපියල් 350 කට විතර ගියොත් අපේ ණය බර කීයකට යයිද?

එතකොට නන්දනලාල් කියන සුන්දර කතා ඔක්කොම ඉවරයිනේ. නන්දලාල්ට රුපියල් කඩා වැටීම නතර කරන්න බැරිවීමෙන් අපේ ණය බර තොග පිටින් වැඩි වෙනවා.රුපියල් කඩා වැටීම පාලනය කරන්න ඕනි මහ බැංකුව.හැබැයි මේ දක්වා ඒක කරන්න මහ බැංකුව අසමත් වෙලා තියනවා.න්දනලාල් කරන්නේ අපේ ණය තව තව තවත් වැඩි කරලා IMF ඇතුළු මූල්‍ය සංවිධාන සහ ණය දෙන රටවල්වලට විශාල ලාභ අරන් දෙන එකද කියන සැකය එනවා. 

ඇත්තටම මේක ආර්ථික ඝාතක වැඩක්ද කියන සැකය රටේ රාළට නං තියනවා.එක පැත්තකින් ආදායම වැඩිකරගෙන තියෙන්නේ අනිත් පැත්තෙන් රුපියල් පාවාදීලා.මේ කතාව රවී දිගටම කිව්වා. දැන් නන්දලාලා කියන කතාවයි,රවී කියන කතාවයි ගත්තම වඩාත් ප්‍රායෝගික රවී කියන එක බව ඕනිම පොඩි ලමයෙකුට උනත් තේරෙනවා.රටේ රාළ කියන්නේ නන්දලාල්ට මේක නොතේරෙනවා වෙන්න බෑ.

ඒක නිසා නන්දනලාල්ගේ ක්‍රියාකලාපය ඇතුලේ hidden Agenda එකක් තියනවද කියන ප්‍රශ්නය මතුවෙනවා.

හරි එහෙනම් ගිහින් එන්නම්.

ජයවේවා.

මිට

රටේ රාළ.