"උතුරට වැඩියෙන් ආදරෙයි.. ගොඩක් තුවාල වෙලා තියෙන නිසා" - බිමල් රත්නායක

Sep 11, 2025 at 09:13 AM

|

Lanka Leader

උතුරු පළාතට ගොඩක් තුවාල වී ඇති නිසා උතුරට වැඩියෙන් වැඩ කරන බව අමාත්‍ය බිමල් රත්නායක මහතා පවසයි.

යුද්ධයෙන් දරුණුවටම තුවාල සිදුවුනේ උතුරට පමණක් දැයි, දකුණේ සිදුවූ විනාශය සුළුවෙන් ලඝුකොට දැක්විය හැකි දැයි මෙම ප්‍රකාශය සම්බන්ධයෙන් අදහස් පළ කරමින් විවිධ පාර්ශව සමාජ මාධ්‍ය තුළ ප්‍රශ්න කර තිබේ.

එම එක් අදහස් පළ කිරීමෙක් පහළින් දැක්වේ. 

එතකොට...,

➡️ ආරක්ෂක අංශ විරුවන් 28,703 ක් ඝාතනය කිරීමෙ තුවාලය පුංචිද...?

➡️ ආරක්ෂක අංශ විරුවන් 60,000 කට වඩා අර්ධ සහ පූර්ණ ආබාධිත වීමෙ තුවාල පොඩියිද...?

➡️ දකුණෙ ගමින් ගම ගෙයින් ගෙට සීල් කරලා ආපු මිනී වල වේදනාවෙ තුවාල ඒ අම්මලා, තාත්තලා, බිරින්දෑවරු සහ දරුවන්ට පොඩිද..?

➡️ දළදා මාළිගාව, ශ්‍රී මහ බෝධිය ලඟ කරපු නින්දිත ඝාතන වල තුවාල පොඩියිද..?

➡️ මහ බැංකුවට, කටුනායක ගුවන් තොටුපොලට පහර දිලා රටේ ආර්ථික මර්මස්ථාන විනාශ කරපු තුවාල පොඩියි ද..?

➡️ මහ දවල් ඉස්කෝලෙ ඇරෙන වෙලාවෙ මරදාන පාලම යට බෝම්බ පුපුරවලා මරා දැමුණු අහිංසක පාසල් දරුවන්ගෙ දෙමව්පියන්ගෙ හිත් වල තුවාල පොඩියි ද..?

➡️ කොළඹ ස්ටේෂන් එකේ ඝාතනය කරපු ඩී. එස් එකේ බේස් බෝල් ටීම් එකේ දරුවන්ගේ දෙමව්පියන්ගෙ තුවාල පොඩිද...?

➡️ බස් වල, කෝච්චි වල ඝාතනය කරපු සිය දහස් ගනන් අහිංසක මිනිස්සුන්ගෙ තුවාල වල වේදනාව පොඩිද..?

➡️ මායිම් ගම්මාන වල ඉවක් බවක් නැතිව තොග පිටින් කපලා කොටලා මරලා දාපු මිනිස්සුන්ගෙ වේදනාවෙ තුවාල පොඩියි ද..?

➡️ රටේ ජනාධිපතිවරයෙක්, ආරක්ෂක ඇමතිවරයෙක් ඇතුළු මැති ඇමතිවරුන් රාශියක් මහමග අමු ඇමුවේම ඝාතනය කළ තුවාල පොඩිද..?

➡️ දොරෙඅප්පා, අමිර්තලිංගම්, නීලන් තිරුචේලම්, ලක්ෂ්මන් කදිරගාමර් වැනි ද්‍රවිඩ දේශපාලඥයින් ඝාතනය කළ තුවාල පොඩිද...?

මේ අවුරුදු 30 ක ශාපලත් යුද්ධයක අංශු මාත්‍රයක මතකයන් විතරයි...?

ඔයාලාට ඒ මිනිස්සු ගැන ආදරෙ හිතෙන්නෙ නැද්ද...? වැඩිපුර ආදරෙ දැනෙන්නෙ උතුරේ ජනතාව ගැන විතරයිද..?

ඩයස්පෝරා ඩොලර් ඒ ආදරය,ඒ සංවේදිතාව උතුරට පමණක් කොටු කරාද..?

යුද්ධයෙන් ඇති වූ තුවාල උතුරේ වේවා දකුණේ වේවා එසේ සීමා මායිම් දමා නිශ්චිතව වෙන් කරන්න පුළුවන්ද...?

රණවිරුවන් සාමාන්‍ය සොල්දාදුවන් වූ රටක ත්‍රස්තවාදීන් සටන්කරුවන් යැයි පවසන රටක මේ වගේ තුට්ටු දෙකේ දේශපාලඥයින්ගෙන් සමාජ සාධාරණත්වයක් බලාපොරොත්තු වෙන්න පුළුවන් ද..?

කරුණාකරලා මේ උතුර සහ දකුණ කියන වර්ගවාදී බෙදීම තමන්ගේ තක්කඩි දේශපාලනය වෙනුවෙන් පාවිච්චි කරන්න එපා. ඔය වචන ඇතුළෙම තියෙන්නෙ බෙදීම විතරමයි..

කරුණාකරලා ශාපලත් යුද්ධයක ජනතාවගෙ දුකේ, වේදනාවෙ කඳුළු සහ හැඟීම් අඩු වැඩි වශයෙන් බෙදා වෙන් කරන තුප්පහි දේශපාලනය නවත්තන්න.

උතුරු - නැගෙනහිර කියන වචන විශේෂිකරණය කිරීම නවත්වන්න. මේක සමස්ත රටක් විදියට හිතන්න ජනතාවගෙ මනෝභාවය සකස් කරන්න...

ඩොලර් ටිකකට, චන්ද ටිකකට මිනිස්සුන්ගෙ හැඟීම් හා සංවේදිතාව උඩින් දේශපාලනය කරන තුප්පහි, කුපාඩි දේශපාලනය දැන්වත් නවත්තන්න..

යුද්ධයෙ භෞතික පාඩුව සහ මිනිස්සු ආධ්‍යාත්මිකව විඳවන වේදනාව භූගෝලීය සීමා මායිම් මත වර්ගීකරණය කරන්න එපා. ඒක හරි ගෝත්‍රිකයි, ම්ලේච්ඡයි.

- නිලන්ත සත්සර ගමගේ ✍️