සෞදි අරාබියේ අගනුවර වන රියාද් හි අමෙරිකානු තානාපති කාර්යාලයේ ඇති වූ පිපිරීමකින් පසු ගින්නක් ඇතිව තිබෙන බව විදෙස් මාධ්‍ය වාර්තා කරයි.

ඉරානය ඉතිහාසයේ පළමු වතාවට පැය 24 ක කාලයක් තුළ රටවල් 15 කට (සෘජුව හෝ වක්‍රව) හෝ ඔවුන්ගේ හමුදාවන් වෙත ප්‍රහාර එල්ල කළ පළමු රට ලෙස මේ වන විට පත්ව තිබේ.

මැදපෙරදිග කලාපය පුරා යුදමය වාතාවරණයක් ව්‍යාප්ත වෙමින් පවතින පසුබිමක, අමෙරිකානු සහ ඊශ්‍රායල ප්‍රහාර හමුවේ ඉරානය තමන්ව ආරක්ෂා කර ගැනීමට ගන්නා පියවරයන් සඳහා චීනයේ සහාය හිමිවන බව චීන විදේශ අමාත්‍ය වැන්ග් යී ප්‍රකාශ කර තිබේ.

ඉරාන ඉස්ලාමීය විප්ලවවාදී ආරක්ෂක බලකාය නිකුත් කළ ප්‍රකාශයට අනුව, ඊශ්‍රායල අගමැති බෙන්ජමින් නෙතන්යාහුගේ කාර්යාලය ඉලක්ක කර ගුවන් ප්‍රහාරයක් එල්ල කර තිබේ.

දරුණු ගැටුම් මධ්‍යයේ, කුවේටයට ඉහළින් පියාසර කරමින් තිබූ F-15 වර්ගයේ ප්‍රහාරක යානයක් බිම හෙලීමට තමන් සමත් වූ බව ඉරානය ප්‍රකාශ කළේය. පියාසර කරමින් තිබූ යානය ගිනිගෙන පහළට කඩා වැටෙන ආකාරය දැක්වෙන වීඩියෝ දර්ශන ද ඉරාන බලධාරීන් විසින් ප්‍රසිද්ධ කර තිබේ.

ඉරානයේ නව නායකත්වය සමඟ න්‍යෂ්ටික අවි හරණය පිළිබඳ සාකච්ඡා නැවත ආරම්භ කිරීමට එකඟ බව එක්සත් ජනපද ජනාධිපති ඩොනල්ඩ් ට්‍රම්ප් ඉයේ(01) පැවසීය.

ලෙබනනයේ නගර රැසක ජනතාවට ඉන් ඉවත් වන ලෙස ඊශ්‍රායලය දැනුම්දී ඇති අතර, විදෙස් මාධ්‍ය වාර්තා කර ඇත්තේ ලෙබනනයේ නගර 50කට අධික ප්‍රමාණයක සිටින ජනතාවට මෙලෙස ඉවත්වීම සඳහා ඊශ්‍රායලය දන්වා ඇති බවය.

ඉරානයට තමන්ව ආරක්ෂා කර ගැනීමට "සෑම අයිතියක්ම" ඇති බවත්, සටන් කිරීම දිගටම කරගෙන යාමට ශපථ කරන බවත් ඉරාන විදේශ අමාත්‍ය සෙයිද් අබ්බාස් අරග්චි ඊයේ(01) ABC ප්‍රවෘත්ති සේවය වෙත අදහස් දක්වමින් පැවසුවේය.

ඉරානයේ උත්තරීතර නායක අලි කමේනි සහ ඔහුගේ පවුලේ සාමාජිකයින්ගේ ඝාතනය සම්බන්ධයෙන් රුසියානු ජනාධිපති ව්ලැඩිමීර් පුටින් ඉරාන ඉස්ලාමීය ජනරජයේ ජනාධිපති මසූඩ් පෙසෙෂ්කියන් වෙත සිය බලවත් ශෝකය පළ කර තිබේ.