ආර්ථිකය වර්ධනය වුවත් ව්‍යාපාර බිඳවැටීමේ අවදානමක්..
ශ්‍රී ලංකාවේ ප්‍රධාන සාර්ව ආර්ථික දර්ශක මේ වන විට ධනාත්මක දිශාවකට ගමන් කරමින් පැවතුණද, එම වර්ධනය රටේ සියලුම ව්‍යාපාර ආයතනවලට එකසේ සුබදායී නොවන බව ප්‍රමුඛ ආර්ථික පර්යේෂණ ආයතනයක් වන Frontier Research අනාවරණය කරයි.
මෙරට දළ දේශීය නිෂ්පාදිතය (GDP) වර්ධනය වන විට සාමාන්‍යයෙන් සියලුම ව්‍යාපාර ස්වයංක්‍රීයව දියුණු වන බවට පැවති සාම්ප්‍රදායික මතය, වර්තමානයේ සිදුවෙමින් පවතින ව්‍යුහාත්මක ආර්ථික පරිවර්තනය හමුවේ බිඳවැටෙමින් පවතින බව එම ආයතනය පෙන්වා දෙයි.
Frontier Research ආයතනයේ සාර්ව ආර්ථික උපදේශක අංශ ප්‍රධානී චයු දම්සිංහ මහතා පෙන්වා දෙන්නේ පසුගිය වසර 70–80 පුරා ශ්‍රී ලංකාව අත්දුටු ආර්ථික චක්‍රවලට වඩා වත්මන් තත්ත්වය සම්පූර්ණයෙන්ම වෙනස් මාවතක ගමන් කරන බවයි.
අතීතයේදී ආර්ථිකය යථා තත්ත්වයට පත් කරගනු ලැබුවේ රජයේ වියදම් ඉහළ නැංවීම, මුදල් අච්චු ගැසීම සහ වෙළෙඳපොළට මුදල් මුදාහැරීම වැනි ක්‍රමවේද හරහා බැවින්, එයින් සෑම ව්‍යාපාරයකටම පාහේ එක හා සමාන වාසි සැලසුණි. නමුත් වත්මන් ආර්ථික රටාව නිර්මාණය වී ඇත්තේ දැඩි මූල්‍ය විනය, උද්ධමනය පාලනය කිරීම සහ පෞද්ගලික අංශය විසින්ම උපයන මුදල් මත පමණක් ආයෝජන සිදුකිරීම යන ප්‍රතිපත්තිමය පදනම මතය.
මෙම ව්‍යුහාත්මක වෙනස නිසා පෙර පැවති පද්ධතියේ පහසුකම් මත යැපුණු ඇතැම් ව්‍යාපාර මාදිලි දැඩි අවදානමකට ලක්ව ඇත.
විශේෂයෙන්ම අඩු පොලී අනුපාත යටතේ ණය ලබාගෙන පමණක් පැවැත්ම තහවුරු කරගත් සමාගම්, සුළු ලාභයක් තබාගෙන විශාල පරිමාවෙන් භාණ්ඩ අලෙවි කරන (Thin Margins, High Volumes) ව්‍යාපාර, සහ තාක්ෂණයට යොමු නොවී අඩු වැටුප් ශ්‍රමය මත පමණක් පදනම් වූ ක්ෂේත්‍ර ඉදිරියේදී දැඩි අර්බුදයකට මුහුණ දෙනු ඇත. මීට පටහැණිව, ප්‍රමාණවත් ලාභාංශ පවත්වාගෙන යන, ප්‍රාග්ධනය ශක්තිමත් සහ තාක්ෂණය මුල් කරගත් සමාගම් වෙළෙඳපොළේ ජයග්‍රහණය කිරීමට වැඩි ඉඩක් පවතී.
තවද, දක්ෂ හා පුහුණු ශ්‍රමිකයන් විශාල වශයෙන් විදේශ රැකියා සඳහා පිටත්ව යාම හේතුවෙන් දේශීය වශයෙන් කුසලතා පූර්ණ ශ්‍රමය ලබාගැනීමේ පිරිවැය ඉහළ ගොස් ඇති අතර, ඇතැම් ක්ෂේත්‍ර සඳහා විදේශීය ශ්‍රමිකයන් පවා ආදේශ වීමේ ප්‍රවණතාවක් දක්නට ලැබේ.
එම නිසා ශ්‍රී ලාංකේය ව්‍යාපාරවලට තවදුරටත් ලාභ ශ්‍රමය මත පමණක් තරග කිරීමට නොහැකි තත්ත්වයක් උදාවී ඇත. ශ්‍රී ලංකා මහ බැංකුව උද්ධමනය පාලනය කිරීමට ප්‍රමුඛතාව ලබාදී ඇති බැවින් රුපියලේ අගය වෙළෙඳපොළ සාධක මත වෙනස් විය හැකි අතර, ව්‍යාපාරවල පැවැත්මට අභ්‍යන්තර මූල්‍ය ශක්තිය අත්‍යවශ්‍ය වේ.
ලෝක වෙළෙඳපොළේ බොරතෙල් මිල උච්චාවචනය සහ ජාත්‍යන්තර භූ-දේශපාලනික අස්ථාවරත්වයන් වැනි බාහිර බාධාවන් තාවකාලික විය හැකි වුවත්, රට තුළ සිදුවන මෙම ආර්ථික ප්‍රතිසංස්කරණ ස්ථිරසාර ඒවා වන බව විශ්ලේෂකයෝ පෙන්වා දෙති. මෙම වෙනස්කම්වලට කඩිනමින් අනුගත වීමට අපොහොසත් වන ඇතැම් ආයතන වැසී යාමට හෝ ප්‍රාග්ධනය ශක්තිමත් විශාල සමාගම් සමඟ ඒකාබද්ධ වීමට (Consolidation) සිදුවනු ඇත.
ශ්‍රී ලංකාව ජාත්‍යන්තර මූල්‍ය අරමුදල (IMF) සමඟ ඇතිකරගත් ඩොලර් බිලියන 2.9ක විස්තීර්ණ ණය පහසුකම (EFF) යටතේ රජයේ බදු ආදායම් ඉහළ නැංවීම, මුදල් අච්චු ගැසීම සීමා කිරීම සහ මූල්‍ය විනය පවත්වාගෙන යාම දැඩි කොන්දේසි ලෙස ක්‍රියාත්මක වේ. ඒ හේතුවෙන් රාජ්‍ය වියදම් සීමා වී ඇති අතර වෙළෙඳපොළ ස්වාධීන ආර්ථික ප්‍රතිසංස්කරණ ඔස්සේ ප්‍රතිව්‍යුහගත වෙමින් පවතී. ඒ අනුව, වත්මන් ආර්ථික වර්ධනයේ ප්‍රතිඵල සියලුම සමාගම්වලට එක හා සමානව නොලැබෙන අතර, ඉදිරි කාලසීමාවේ ව්‍යාපාරික පැවැත්ම තීරණය වන්නේ ලාභදායිත්වය, ඵලදායිතාව සහ තාක්ෂණික ශක්තිය මත පමණි.
සම්බන්ධිත පුවත් | Related News
ප්‍රධාන පුවත්
ආර්ථිකය වර්ධනය වුවත් ව්‍යාපාර බිඳවැටීමේ අවදානමක්..
කෘත්‍රිම බුද්ධි පෙම්වතුන් සහ පෙම්වතියන්ට චීනයෙන් දැඩි සීමා..
නාමල්ට කෝටි 07ක් දුන් ක්‍රිෂ් ගනුදෙනුවේ 2012 සිට 2026 දක්වා දින වකවානු සහිත සම්පූර්ණ විස්තරය..
පෙට්‍රල් 292ට ගෙනත් විකුණන්නේ 414ට.. ඉන්ධනවලින් පාඩු කතාව බොරුවක්.. මිල සූත්‍රය වහා හෙළි කරන්න.. - පාඨලී
ඉරාන නෞකා 19කට සැපයුම් දුන්නොත් සම්බාධක.. අමෙරිකාවෙන් ශ්‍රී ලංකාවට දන්වයි..
ශ්‍රී ලංකාවේ ආයෝජන පරිසරය තවමත් සුදුසු මට්ටමක නැහැ.. නායකයන්ගේ පරස්පර කතා නිසා ආයෝජකයන් දෙගිඩියාවෙන්.. – අමෙරිකානු රාජ්‍ය දෙපාර්තමේන්තුවෙන් වාර්තාවක්
ෆ්ලයි ඩුබායි ගුවන් යානයේ සිදුවීම වැරදුණ කුරුමානමක්ද? - ආචාර්ය ජගත් චන්ද්‍රවංශගෙන් අනාවරණයක්..
SDIG රන්මල් ඇතුළු පොලිස් නිලධාරින් පිරිසකගේ ස්ථාන මාරුවීම් මහාම ක්‍රියාත්මක වන පරිදි පොලිස් කොමිසමෙන් අවලංගු කරයි..
ගෝලීය AI තරගයේ බලතුලනය වෙනස් කිරීමට චීනයෙන් දැවැන්ත පියවරක්.. ජාත්‍යන්තර සහයෝගීතාව සහ ජාතික ආරක්ෂාව එකට ගෙන තීරණාත්මක උපායමාර්ගය එළිදක්වයි..
බ්‍රිතාන්‍යය නැවතත් යුරෝපා සංගමයට එක්වීමේ ඉඩක්.. – අග්‍රාමාත්‍ය ඇන්ඩි බර්න්හැම්ගෙන් පැහැදිලි සංඥාවක්..
"ආණ්ඩුවට 159ක බලයක් තියෙද්දී රාජ්‍ය බලය නෑ කියන්නේ විහිළුවක්" – වෛද්‍ය වසන්ත බණ්ඩාර
සුරේෂ් සලේ රඳවා තබා ගැනීම සම්බන්ධයෙන් UN වෙතින් ශ්‍රී ලංකා රජයට දැඩි ප්‍රශ්නාවලියක්..
ශ්‍රී ලංකාවේ වෙළඳ හිඟය ඩොලර් බිලියන 6.5 පනී - 69%ක සීඝ්‍ර ඉහළ යාමක්!
සාර්ව ආර්ථික ස්ථාවරත්වය මත මීළඟ IMF වැඩසටහන තීරණය වේ
සාර්ව ආර්ථික ස්ථාවරත්වය මත මීළඟ IMF වැඩසටහන තීරණය වේ
ට්‍රම්ප් තීරණයක් ගැනීමට නොහැකිව අර්බුදයකට හසුවෙලා-ඉරාන ශ්‍රේෂ්ඨ ජාතික ආරක්ෂක මණ්ඩලයේ ලේකම් මොහ්සෙන් රෙසායි