අමිත්, ඔහු වෘත්තියෙන් රූපවාහිනි සකසන්නෙක්. ඔහුට දිනක් සුන්දර කාන්තා කටහඬකින් ඇමතුමක් ලැබෙනවා.

“අමිත් කරුණාකරලා හතට කලින් එන්න පුලුවන් ද?”

ඔහු ඒ ඉල්ලීම ඉතා කාරුණිකව පිළි ගන්නවා.

මාර්ගය ඉතා දුෂ්කර එකක්. දුර්ග සහිත මාවතේ පාලම් මතින් සීතල දරාගනිමින් අමිත් සහ ඔහුගේ ආයතනයේ රියදුරා ඒ රූපවාහිනි අලුත්වැඩියාව වෙනුවෙන් ගමනේ යෙදෙනවා.

ප්‍රධාන මාර්ගයට ගසක් කඩා වැටී ඇති බැවින් ඔවුන්ට වඩා අපහසු මාර්ගයක් තෝරා ගන්න සිදු වෙනවා. එහෙත් ඔවුන් ආපසු හැරී යන්නේ නැහැ. අසීරු මාර්ගය ඔස්සේ ඉදිරියට ඇදෙන අමිත්ට නැවත බාධකයක් මුණ ගැසෙනවා.

ඒ සමඟම අර තරුණිය ඔහුට යළි ඇමතුමක් ලබා දෙනවා.

“අමිත්, ඔබ ප්‍රමාද ද?”

ඒ සමඟම බාධාව කුමක්දැයි ඇයට ඇසෙනවා.

” චන්දු මාමාගේ බැටළු රංචුව නේද?”

අමිත් කෝප ගන්නේ නැහැ. බැටළුවන්ගෙන් මඟ හෙළිපෙහෙළි කරගෙන ඔහු යලි ගමනේ යෙදෙනවා. සන්ධ්‍යා කළුවර කෙමෙන් පරිසරය වෙළා ගනිද්දී පවා ඔවුන් ආපසු හැරී යන්නේ නැහැ.ගමනාන්තයට ළගා වෙන ඔහු යන්නේ කුඩා කන්දක් මත පිහිටි පැරණි නිවසක් වෙත.

නිවසේ සීනුවට ප්‍රතිචාර දක්වමින් සුන්දර කටහඬ හිමි තරුණිය ඔහු වෙත පැමිණෙනවා.

අමිත් ඉතා පුදුමයට පත් වන්නේ ඇය අන්ධ තරුණියක වූ බැවින්. අන්ධ තරුණියකට රූපවාහිනියක් කුමටද? නමුත් ඉතා ඕනෑකමින් අමිත්ව රූපවාහිනිය ඇති තැනට කැඳවා යන තරුණිය නියමිත වෙලාවට එය ප්‍රතිසංස්කරණය කළ හැකි දැයි ඔහුගෙන් විමසනවා.

අමිත් එය සකසන තුරු ඇය නොසන්සුන්. ඔහු රූපවාහිනිය සකසා ක්‍රියාත්මක කරද්දී ඉන්දියාවේ ජනප්‍රියම රූපවාහිනි රියැලිටි වැඩසටහනේ ආරම්භක හඬ ඇසෙනවා.

තරුණිය අසුනෙන් නැගිට යන්නේ සතුටින්. ඇය පසෙක වූ සීනුව නාද කරන්නේ ද සතුටින්.

“ඉක්මනින් එන්න.. වැඩසටහන පටන් ගත්තා”

අමිත් දිගින් දිගටම පුදුමයට පත් වෙනවා. පඩිපෙළ බැස පැමිණෙන හැම දරුවෙකුම අන්ධ දරුවන්. එකිනෙකාට වාරු වී පැමිණෙන ඔවුන් ඉතා පිළිවෙලකට සාලයේ අසුන් ගන්නවා.

තරුණිය අමිත්ගෙන් දුරස්ථ පාලකය ඉල්ලාගෙන රූපවාහිනිය ක්‍රියා කරවනවා. රියැලිටියේ ප්‍රථම තරඟකාරියගේ නම ඇසෙන්නේ දරුවන්ගේ ඔල්වරසන් හඬ මැද. ඈ ගී ගයද්දී හැම දරුවෙකුම ඉතා සතුටින් එය විඳ ගන්නවා.

“ඇය අපේ නේවාසිකාගාරයේ. ඒ විතරක් නෙවෙයි. ඒ මගේ හොඳම යෙහෙළිය”.

තරුණිය ඉතා ප්‍රීතිමත් ව අමිත්ට පවසනවා. සියල්ල අදහා ගත නොහැකිව ඔබමොබ බලන ඔහු දරුවන් ඒ ගීතය රස විඳින සතුට ප්‍රීතියෙන් සහ සංවේදීව අත් විඳිනවා.

සබඳතා ගොඩ නැගෙන්නේ අප සිතනවාට වඩා බොහෝ වෙනස් ලෙස. ඒ සංවේදී කතාව ඉතා සුන්දර සහ බොහෝ සංවේදී රූපරාමු පෙළක් ලෙස ලෝකයේ ජනප්‍රියම සමාගමක් වූ සැම්සුන් සමාගමේ වෙළඳ දැන්වීමක් ව නිකුත් වන්නේ 2016 දෙසැම්බර් තිස් වැනිදා.

එය 2017 වසරේ ලෝකයේ වැඩිම පිරිසක් නැරඹූ වෙළඳ දැන්වීමයි. ඒ මිනිත්තු හතර ඔබට කියන්නේ අනෙකා වෙනුවෙන් කැපවීම, රැකියාවට අවංක වීම,මානුෂිකත්වය ගැන පමණක් නෙවෙයි.

අපේ සමීපතමයන් විඳ ගන්නට කුමන බාධාවක් යටතේ වුවත් අපට හැකි විය යුතුයි. ඔවුන් වෙනුවෙන් අත්පොළොසන් නගන්නට අවශ්‍ය වෙන්නේ අපට ඔවුන්ව හදවතට දැනීම පමණයි.

- Nibandhika Wanninayake

(අන්තර්ජාලයෙන් උපුටාගන්නා ලදී.)