තල් වවලා පොල් කඩන්න බැහැ

Oct 25, 2024 at 10:25 AM

|

Lanka Leader

මිස් ,මගෙ වයිෆ් මන් එපා කියද්දිම එයාගෙ තාත්තව වැඩිහිටි නිවාසෙක නැවැත්තුවා ,

මන් බඳිනකොටම එයාගෙ අම්ම නැති වෙලා ,එයා කොළඹ බෝඩ් වෙලා හිටියෙ ඔෆිස් යන නිසා , බැඳපු දවසෙ ඉඳල ගමේ ගිහින් එමු කියල කොච්චර කිව්වත් මගෙ  වයිෆ් අමාලි කැමති වුනේම නැහැ ,

එක දවසක් බලෙන්ම වගේ තමා මම මෙයාව ගමේ එක්කන් ගියෙ ,ඒ ගියාම එයාගෙ තාත්ත එයාලගෙ නෑයෝ වෙන ගෙදරක  දුක් විඳ ඉන්නව බලන්න බැරි කමට මන් මැදිහත් වෙලා තමා ඒ තාත්තව අපේ ගෙදර ගෙනාවෙ ,

එදා ඉඳල අමාලිගෙ හැසිරීම ටිකක් අමුතුයි ,හුඟක් තරහ යනවා අපේ පුතාව වත් තාත්ත ලඟට යවන්නෙ නැහැ ,එයාගෙම තාත්තා වුනත් කිසිම ආදරයකින් සලකනවා මන් දැකල නැහැ ,

ගිය සතියෙ මම ගෙදර එනකොට හැමෝටම හොරෙන් එයා තාත්තව වැඩිහිටි නිවාසෙකට ගිහින් දාලා , ඒ ගැන ඇහුවම අමාලි මුකුත් කියන්නෙ නැහැ ,

අමාලි මගෙ දෙමව්පියන්ට හුඟක්  හොඳට සලකනවා ,එහෙම එකේ එයාගෙ මේ හැසිරීම මට දරාගන්න අමාරුයි ,මෙයාට මොකක් හරි මානසික ලෙඩක්වත්ද ?

මේ ඊයෙ සෙෂන් එකකදී කෙනෙක් ගෙනාපු ගැටළුවක් ,

ඉතින් ,මේකේ අනිත් පැත්ත ගැන බලන්න අමාලිට කථා කළා,

ආර්ථික හයිය තියෙද්දිත් ,මහත්තයා මෙච්චර කියද්දීත් ඔයා ඔයාගෙ තාත්තව වැඩිහිටි නිවාසෙක නවත්තන්න හිතුවෙ ඇයි ?

පැය බාගයක් විතර තිස්සෙ මේ ප්‍රශ්නෙ එක එක විදිහට අහල අහල අන්තිමට අමාලි මට  උත්තරේ දුන්නා ,

 ඇත්තම කිව්වොත් ඔය මනුස්සයව සල්ලි ගෙවල නිවාසෙකට දැම්මෙත් හස්බන්ඩ් බනියි කියල බයට ,හරිනම් එයාට එහෙමවත් කරන්න වටින්නෙ නැහැ මිස් ,

මගෙ කරුමෙටද කොහෙද  මට අවුරුදු තුන හතරෙදි වෙච්ච දේවලුත් තාම මතකයි ,

නමට තාත්ත උනාට ඔය මනුස්සය අම්මටයි අයියටයි මටයි දස වද දුන්නා ,

මන් ඉස්සරහම අම්මට ලාම්පුතෙල් හලලා ගිණි තියන්න හදල තියනවා ,පොඩි කාලේ හැමදාම රෑට මන් ඉන්නෙ පේර ගහ උඩ ගුටිකන්න බයට ,දවසක් ගහේම නින්ද ගිහින් නින්දෙන් ගහෙන් වැටිලා දවස් ගානක් ඉස්පිරිතාලෙත් හිටියා ,

එයා බීලා ඇවිත් කුණු හරප නොකියපු දවසක් නෑ ,එක වේලක් අපිට කන්න දීල නැහැ ,අම්මා ගෙවල් වල වැඩ කරල අපිට කන්න දුන්නෙ 

ඒ ඔක්කොමත් හරි ඉස්සර ඔය තාත්ත කියන මිනිහා මායි අයියයි ඉස්සරහම අම්මව බලෙන් ඇදගෙන අම්ම එක්ක අහවල් වැඩේ කරනවා 

අම්මා වැඳ වැඳ කියනවා අනේ මගෙ දරුවෝ දකියි කියල ,ඒත් ඒ මිනිහට ගානක් වත් නෑ ,

අය්ය මේව දරාගන්න බැරිම තැන පොඩි වයසෙන්  හමුදාවට බැඳිලා අවුරුදු 24 න් මැරිලා ගියා ,

මට අවුරුදු 19 දී අම්මා මරුනා ,දුක් විඳලා විඳලා පපුවෙ අමාරුව හැදිලා ,ඔය තාත්ත කියන මිනිහා මිනිය උස්සන වෙලාවෙත් බීලා රණ්ඩු කළා ,මිනියටත් ගල් වලින් ගැහුවා ,මාව එදා රෑම ගෙදරින් එලෙව්වා ,

සංසාරෙ පිනකට ලොකු අම්මා ඒක දැකල උඹ යමන් මන් එක්ක කියල මාව කොළඹ ගෙනත් පුළු පුළුවන් විදිහට ඉගැන්නුවා ,මායි ලොකුඅම්මයි බෝඩිමේ ඉඳන් බත් පැකට් විකුණුවේ ,අපිදස දුක් වින්දා ,

තාත්ත කරපු දේවල් අමතක කරගන්න බැරුව මට කාලයක් සිහිය විකල් වෙලා වගෙත්  හිටියා ,අවුරුදු ගානක් බෙහෙත් බීල ගොඩ ආවේ ,

විඳපු දුක් වැඩි නිසාම වෙන්න ඇති මන් කොහොම හරි ඉගන ගත්තා ,

පස්සේ තමා රසිකව මට හම්බුනේ ,රසික නිසා මන් ආයෙ ඉපදුනා ,හැබැයි තාත්තා කරපු දේවල් මතක් වෙද්දී අදටත් මට බයයි ,

මේවා මට රසිකට වත් කියන්න බෑ ,

එයාගෙ බලකිරීමට සමාව දෙන්න කියල හිත හදාගෙන තාත්තව ගෙදර ගෙනාවට මගෙ දරුවව් වත් එයා ලඟට දෙන්න මට හිතෙන්නෙ නැහැ ,මන් කොච්චර උත්සහ කලත් ඒ මනුස්සය් අම්මට මට අයියට දීපු වද කන්දරාව මට අමතක කරන්න බැහැ ,අම්ම මරුන විදිහ අමතක කරන්න බැහැ ,

ඇත්තම කිව්වොත් තාත්ත උනාට ඒ වැඩිහිටි නිවාසෙකටවත් ගිහින් දාන්න හොඳ මිනිහෙක් නෙමෙයි ,

ඊයෙ එතන ඉන්න මිස්ගෙන් ඇහුවමත් කිව්වෙ මෙතැන හොඳ දෙමව්පියෝත් ඉන්නවා ,හැබැයි මෙතනට එන දරුවෝ කියන විදිහට මේ  ඉන්න හුඟක් මිනිස්සු දැන් හොඳයි වගේ පෙනුනට පුළුවන් කාලෙ එච්චර හොඳ මිනිස්සු වෙන්න බෑ කියල ..

පිට ඉඳන් බලනකොට මන් වැරදි ඇති ,හැබැයි මන් දන්නවා මන් වැරදි නැහැ ,අමාලි කිව්වෙ එහෙම ,

                        .......................

මගෙ උපදේශන ජීවිතේ මට මෙහෙම කථා ගොඩක් හම්බෙනවා ,අම්මා තාත්ත කියන නම ඇහුන ගමන් අපෝ මොන දේ උනත් දෙමව්පියන්ට සලකන්න ඕනෙ කියන සමාජයක්‌ ඇතුලෙ වැඩිපුර කථා නොකලට දෙමව්පියෝ නිසා විනාශ වුන දරුවන්ගෙ ජීවිත ඕන තරම් තියනවා ,

දෙමව්පියො නිසා අසරණ වුනු මානසිකව ලෙඩ වුනු ජීවිතත් ඕන තරම් ඉන්නවා ,

ඒ නිසා කවුරු හරි කෙනෙක්  මගෙ අම්මා තාත්ත මට මෙහෙම කරදර කළා කියද්දී අනේ කවදාවත් එහෙම කියන්න එපා අම්මල තාත්තල කවදාවත් දරුවන්ට එහෙම කරන්නෙ නැහැ කියන අන්තයට යන්න එපා ,

ඔබේ අම්මා තාත්ත හොඳ වුනු පමණින්ම මේ ලෝකෙ ඉන්න හැම අම්මා තාත්තම හොඳයි කියල තීරණය කරන්න බැහැ .

අම්ම තාත්ත කියන නම හම්බුන පමණින් ඒ මිනිස්සු දෙමව්පියෝ වෙන්නෙ නැහැ වගේම ,

දරුවො දෙමව්පියන්ට නොසලකු පමණින් ඒ දරුවො අපරාධකාරයො වෙන්නෙත්  නැහැ ..

දෙමාපියෝ විදිහට පුළුවන් කාලෙ දරුවන්ට දස වද දීලා වයසට ගියාම අනේ අපේ දරුවො සළකන්නේ නෑ කියනවනම් ,කියන්න තියෙන්නෙ මෙච්චරයි ,

තල් වවලා පොල් කඩන්න බැහැ ,එච්චරයි ..

වැව්වේ තල් නම් කඩන්න වෙන්නෙත් තල් ම තමයි ...!!

අනිශා ජයකොඩි ✍️

Anisha Jayakody

(Psychological counsellor )