පසුගිය ඔක්තෝබර් 07 වනදා හමාස් සංවිධානයේ සටන්කාමීන් විසින් ඊශ්‍රායල සිවිල් ජනයා ඉලක්කකර ප්‍රහාර එල්ල කිරීමෙන් පසු ඊශ්‍රායලය ගාසා තීරයට කඩා වැදී සාමාන්‍ය වැසියන්ගේ ජීවිත හානි නොතකා හමාස් සංවිධානයේ සාමාජිකයින් ඉලක්ක කර ප්‍රහාර එල්ල කරනු ලැබුවා. ගැටුමේ ප්‍රතිඵලයක් ලෙස මේ වන විට ඉරානයද ගැටුමට මැදිහත්වන තත්වයක් නිර්මාණය වී තිබෙනවා. ලංකා ලිඩර් වෙබ් අඩවිය දේශ හිතෛෂී ජාතික ව්‍යාපාරයේ මහලේකම් වෛද්‍ය වසන්ත බණ්ඩාර මහතාගෙන් මැදපෙරදිග කළාපයේ උද්ගතව ඇති තත්වය සම්බන්ධයෙන් ඔහුගේ මතය විමසනු ලැබුවා.

මේ ඔහු දැක්වූ අදහස්,

" ඊශ්‍රායලයේ සිවිල් පුරවැසියන් ඉලක්ක කර ප්‍රහාර එල්ල කළ හමාස් සංවිධානය අමෙරිකානු සහ ඊශ්‍රායල ඔත්තු සේවා විසින්ම නඩත්තු කර තිබෙන බවට පැහැදිලි සාක්ෂි තිබෙනවා. අප මේ පවසන දේ හිටපු ඊශ්‍රායල අගමැතිවරයෙකු වූ එහුඩ් ඔල්මෙට් මහතා කන්ෆ්ලික්ට් සෝන් ( Conflict Zone ) නම් අන්තර්ජාල නාලිකාවකට එක් වෙමින් ඊශ්‍රායලයේ වත්මන් අගමැති බෙන්ජමින්  නෙතන්යාහු මහතා වසර ගනනාවක පටන් හමාස් සංවිධානයට ඩොලර් මිලියන ගණනින් ආධාර කර තිබෙන බවට චෝදනා කළා. ඊශ්‍රායල ගුවන් ආරක්ෂක පද්ධතිය අතිශය දියුණු තාක්ෂණයක් භාවිත කර නිර්මාණය කළ එකක්. එලෙසම මොසාඩ් ඔත්තු සේවය නොදැන එම පහරදීම් කළ නොහැකියි. ඒ අනුව  ඉතා පැහැදිළියි  අමෙරිකාවේ වුවමනාව මත හමාස් සංවිධානය ඊශ්‍රායලයට පහර දුන් බව.

ඉරාකයට අමෙරිකානු ප්‍රහාර එල්ල වීමට පෙර ඉරාකය කුවේටය ආක්‍රමණය කළා. අවසන් ප්‍රතිඵලය අමෙරිකාව මැදිහත්වී සදාම් හුසේන් මරා දැමීම දක්වා ගොස් ඉරාකය සමතලා කර දමා ඉවරයි. ලිබියාවත් එලෙස විනාශ කළා. හමාස් සංවිධානයේ ක්‍රියාකාරකම් වල අරමුණ ඉරානය ඊශ්‍රායලය සමඟ යුද්ධයකට පටලවා ගැනීමයි. එවිට පමණයි අමෙරිකාවේ අභිලාශය වන ඉරානය සමතලා කිරීමට හැකියාව ලැබෙන්නේ. අමෙරිකානු යුරෝපා බල ද්‍රැවයන් වියැකී ගොස් ගොඩ නැගීමට නියමිත අනාගත බහු ද්‍රැවීය ලෝකයේ ඉරානය යනු තවත් එක් බලවත් බල ද්‍රැවයක්. ඒ අනුව ඉරානයට පහසුවෙන් තමාගේ අභිලාශයන් ඉෂ්ඨ කරගැනීමට අමෙරිකා එක්සත් ජනපදය ඉඩ දෙන්නේ නැහැ.  ඉරානය ප්‍රකෝප කරවන ක්‍රියාමාර්ග ඊශ්‍රායලය විසින් ඉදිරියේදී තව තවත් ගනු ලැබීමට නියමිතයි.

අනෙක් අතට හමාස් සංවිධානය සහ හිස්බුල්ලා සංවිධානය ඉරානය ගැටුමට තල්ලු කරන ක්‍රියාමාර්ග වල නියැලීමටත් ඉදිරියේදී කටයුතු කරාවි. ඉරානය තම දීර්ඝ ඉතිහාසය තුළ දරුණුතම උභතෝකෝටිකයට මුහුණ දී සිටිනවා කියායි අපගේ විශ්වාසය. ඉරාන නායකයින් උපක්‍රමශීලී වන තරමට ඉරානයේ පැවැත්ම තහවුරු වේවි."