අන්තඃපුරයක් තියාගෙන 
මගෙ පතිවත හොයපු 
රාමාත්....

සුපර්ණිකා කෙලෙසපු 
ලක්ෂමනුත්..... 

අද වීරයන් වෙලා 
හොර දෙටූ 
වාල්මිකීගේ රාමායණය 
නිසාවෙන්.....

නුඹව රාමාට පාවා දීලා 
ලක්දේශය ම වනසපු
නුඹේ මලණු විභීෂණ 
අද දේවත්වයෙන් 
පිදුම් ලබද්දී....

ලංකාපුරය ම 
ගිනිබත් කොට 
වනසාලූ හනුමාට 
නුඹේ මිනිසුන් 
වන්දනාමාන කරද්දී.....

මන්දෝදරිට පමණක් පෙම් බැදී
නුඹව
ගැහැණියකගේ අගය ලක්මණයන්ට
පහදා දීමට මා ලක් දේසයට රැගෙන ආ නුඹව
අද සල්ලාලයෙකු ලෙස නම් පට බැඳලා.....

එක ම එක වදනකින් 
විසඳාලිය හැකි ව තිබූ දෙය 
මහ යුද්ධයකට
ගෙන ගියේ ඔවුන් මය...

එහෙත් අවසන 
නිර්මාංශ වූ
නුඹ 
ලොවටම 
මිනීමරුවෙකු විය....

තවමත් භාරතය ම බයයි
රාවණා නුඹට

ඒකයි අදටත් උන් 
" දුසේරා " උත්සව තියලා
නුඹව පුච්චන්නේ.....

ඒක භාරත වැසියන්ට
මහ ලොකු 
වීරකමක් වෙන්න ඇති....

හැබැයි උන් දන්නේ නෑ
රාවණා 
නුඹව පිච්චෙනකොට
මාත් දැවෙනවා 
කියලා......

නුඹෙයි මගෙයි කතාවේ
හරියටම උන් කිව්වෙ
එකම එක දෙයක් 
විතරම යි....

ඒ 
"නුඹ මට පෙම් කරාලු"....

ඔව්.... 
ඇත්ත නුඹ තරම් 
මට කවුරුවත් ම 
ආදරේ කරෙත් නෑ 
ආදරේ කරන්නෙත් නෑ.....

මොකද....
තාත්තා කෙනෙක්ට තරම්
දුවෙක්ට
ආදරේ කරන්න
සෙනෙහස දෙන්න
රැකවරණයක් දෙන්න
කාටවත් ම බෑ
රාවණා.....

කෙතරම් වුවද රාමාගේ ආලය
නුඹේ පිය සෙනහස 
අබියස මට  
වැලි කැටයකඳූ 
අගයක් නොමැති සේය.....

නුඹ එදා නක්ෂස්ත්‍රයන්ගේ
බසට එකඟ ව
මා අතහැර දැමුවේ
ලක් දේශයේ මෙන් ම 
ලක් වැසියන්ගේ අනාගතය 
වෙනුවෙන්....

පැසක හොවා මා
මුහුදේ පා කර හැරිය දා
නුඹට නුඹව ම 
නැති වුණා වග 
මං තරම් ‌
කවරෙකු දනී ද
පියතුමනි..........

නක්ෂස්ත්‍රකාරයන්ට වැරදුණා 
පිය රජතුමණි.....

මම ඔබ ලග රැදුණහොත් මුළු ලංකා පුරය ම වැනසේවිලු......

මම නුඹ ළග හිටියා නම් 
ලංකා පුර සුරැකෙන්න තිබූණා පියාණෙනි....

මේ සා විසල් යුද්ධයක් ඇති නොවෙන්න තිබුණා.....
ඉර හද පවත්නා තුරු නුඹේ නාමය පමණක් නොව නුඹද ‌‌‌‌‌‌අමරණීය වන්නට තිබුණා......

එක ම‌ එක පාරක් ඇවිත් 
ලොවට ම රහසක්  වුණ
නුඹයි මමයි විතරක් දන්න රහස 
කියන්න......

ඔව්.....

මම නුඹේ දෙටු දියණිය වග
මම මේඝනාදයන්ගේ නිවුන් සහෝදරිය වග
ලොවම දැනගන්නට දැන්නම් කාලය එළඹි ඇත....
රාමාගේ පතිනිය ලෙසවත් 

ජනක රජුන්ගේ 
දෙටු දියණිය ලෙසවත්
නොව

රාවණා රජුන්ගේත් මන්දෝදරී මෑණියන්ගේත් 
දියණිය ලෙස කිරුළු දරන්න යි දැන් මට අවැසි......

මම නුඹේ දෙටු දියණි සීතා....

(අන්තර්ජාලයෙන් උපුටාගන්නා ලදී)