ජනතා හඬ යටපත් කිරීමට ගෙනෙන මර්දනකාරී නීතිවලට එරෙහිව සියලු දෙනා එක්විය යුතුයි.. – ජ්‍යෙෂ්ඨ නීතිඥ කල්‍යානන්ද තිරාණගම

Nov 12, 2026 at 05:40 AM

|

Lanka Leader

ජාතික සංවිධාන එකමුතුව විසින් පවත්වන ලද මාධ්‍ය සාකච්ඡාවකට එක්වෙමින් ජ්‍යෙෂ්ඨ නීතිඥ කල්‍යානන්ද තිරාණගම මහතා පෙන්වා දුන්නේ, ආණ්ඩුවට අවශ්‍ය වී ඇත්තේ ජනතාවගේ විරෝධතා සහ හඬ යටපත් කරමින් මූලික අයිතිවාසිකම් උල්ලංඝනය කිරීමට බවයි.

බුද්ධ ශාසනයට, මහා සංඝරත්නයට මෙන්ම රටට බරපතළ අනතුරක් සිදුකෙරෙමින් පවතින බවත්, පොලිසිය සහ රාජ්‍ය නිලධාරීන් බලය අයුතු ලෙස යොදා ගනිමින් රටේ ජනතාවගේ මූලික අයිතිවාසිකම් පැහැරගනිමින් සිටින බවත් ඒ මහතා සඳහන් කරයි.

මෑතකදී අනුරාධපුරය ඇතුළු ප්‍රදේශවලදී බෞද්ධ භික්ෂූන් වහන්සේලා සහ මහජනතාව විසින් සංවිධානය කරන ලද සාමකාමී විරෝධතා සහ උද්ඝෝෂණ මැඩපැවැත්වීම සඳහා පොලිසිය විසින් අත්තනෝමතික ලෙස අධිකරණ නියෝග ලබාගනිමින් ක්‍රියා කළ බව ඔහු සඳහන් කළේය.

මෙලෙස නීතිවිරෝධී ලෙස ක්‍රියා කරන පොලිස් නිලධාරීන්ට එරෙහිව මානව හිමිකම් කොමිෂන් සභාවට සහ පොලිස් කොමිෂන් සභාවට පැමිණිලි කිරීමට පීඩාවට පත් පාර්ශ්වයන්ට සහ නීතිඥ ප්‍රජාවට හැකියාව ඇති බවත්, මූලික අයිතිවාසිකම් රැකගැනීම සඳහා අධිකරණමය ප්‍රතිපාදන උපරිමයෙන් භාවිත කළ යුතු බවත් හෙතෙම අවධාරණය කළේය.

තවද, ආණ්ඩුව විසින් ගෙන ඒමට සූදානම් වන ත්‍රස්තවාදයෙන් රාජ්‍ය ආරක්ෂා කිරීමේ පනත සහ සංවිධානාත්මක අපරාධ මැඩලීමේ පනත මගින් රටේ ජනතාව ආරක්ෂා කිරීමක් සිදු නොවන බව තිරාණගම මහතා පෙන්වා දුන්නේය.

විවිධ ජාත්‍යන්තර බලපෑම්වලට හා රජයේ ඇතැම් ක්‍රියාමාර්ගවලට එරෙහිව ජනතාව නගන හඬ සහ විරෝධතා සම්පූර්ණයෙන්ම මැඩපැවැත්වීම මෙම පනත්වල මූලික අරමුණ වී ඇති බවත් ඔහු වැඩිදුරටත් කියා සිටියේය.

සවිස්තරාත්මක වීඩියෝව නරඹන්න..