ජපානයටත් චීන සරණ!..
ජපානය චීනයත් එක්ක සම්බන්ධකම් යහපත් කරගන්න උත්සාහ කරමින් ඉන්නා බව කියන ප්‍රවෘත්ති වාර්තා ඉස්සරහට ඇවිල්ලා. මේක මහ අමුතු වැඩක් වගේ පෙනුනත්, ඉතිහාසය දිහා හොඳින් බැලුවාම මේක “ස්වභාවික ආපහු යෑමක්” (natural reversal) කියලා තේරුම්ගන්න පුළුවන්.
ඉස්සර චීනය සහ ජපානය අතර ඉතාමත් හොඳ සම්බන්ධයක් තිබුණා. එක් කාලයක ජපානයේ මුදල් පවා චීනයේ නිෂ්පාදනය කරපු බව ඉතිහාසයේ සනිටුහන් වෙලා තියෙනවා. ඒ තරමට ම ම එදා මේ රටවල් දෙක අතර සංස්කෘතික සහ ආර්ථික සම්බන්ධකම් ගොඩනගාගෙන තිබුණා.
ඒත්, 1894–1895 කාලයේ ඇවිලිච්ච පළමුවැනි ජපන්-චීන යුද්ධයෙන් පස්සේ, චීනය සහ ජපානය අතර සම්බන්ධය පළුදුවුණා. 1931 දී ජපානය විසින් මංචූරියාව ආක්‍රමණය කිරීමත් එක්ක ම චීන - ජපන් සම්බන්ධය බිමට ම කඩාගෙන වැටුණා. ඉතින්, “ජපානය” කියන නම අහන්නත් අකමැති තරමේ අප්පිරියාවක් සහ තරහක් චීන ජනතාව තුළ ඇතිවුණා.
දෙවැනි ලෝක මහා යුද්ධයෙන් පස්සේ, ජපානය ඇමෙරිකාව ප්‍රමුඛ බටහිර කඳවුරත් එක්ක එකතුවුණා. ඒ හරහා තමන්ගේ ආර්ථිකය ඉතාමත් ශක්තිමත් අන්දමින් වර්ධනය කරගන්න ජපානයට පුළුවන් වුණා. මේ ගනුදෙනුත් එක්ක, ජපානය ආසියාවේ බටහිර අධිරාජ්‍යවාදයේ සෘජු ඒජන්තයෙක් (Proxy රාජ්‍යයක්) බවට පත්වුණා.
1980 දශකයේ අග, ජපානයේ දේපොළ මිල බුබුලක් (Bubble එකක්) විදිහට පිම්බිලා 1990 ගණන් මුල් කාලේ ඒක පුපුරලා යාමත් එක්ක ජපානයේ ආර්ථිකය එක තැන පල්වෙන්න පටන්ගත්තා. මේ දිගු කාලීන පල්වීම “නැතිවෙච්ච දශක” (Lost Decades) කියලයි හැඳින්වෙන්නේ. මේක ඉතාමත් අඩු ආර්ථික වර්ධනයක්, මිල මට්ටම් පහළ වැටීමේ අවධමනකාරී (Deflation) තත්ත්වයක් සහිත කාලපරිච්ඡේදයක්. මේ කාලයේ දී, වැටුප්වල වැඩිවීමත් මන්දගාමී එකක් බවට පත්වුණා.
දැන් ලෝකයේ සංවර්ධිත රාජ්‍යයන් අතර වැඩි ම රාජ්‍ය ණය අනුපාතයට කරගහන රට බවට ජපානය පත්වෙලා. ජපානයේ රාජ්‍ය ණය ප්‍රමාණය යෙන් ට්‍රිලියන 1,342 කටත් (ආසන්න වශයෙන් ඩොලර් ට්‍රිලියන 8.6 කටත්) වඩා වැඩියි. මේ ප්‍රමාණය ජපානයේ දළ දේශීය නිෂ්පාදිතයෙන් (GDP එකෙන්) සීයට 230 – 235 ක් විතර ඇති. ඒ කියන්නේ රටේ ආර්ථිකයේ සමස්ත ප්‍රමාණය වගේ දෙගුණයකටත් වඩා වැඩි මුදලක් ජපන් ආණ්ඩුව ණයට ඇරැගෙන. පොලී අනුපාතික ඉහළ යාමත් බැඳුම්කර ප්‍රතිලාභ ඉහළ යාමත් හින්දා ජපානයේ ණය සේවා පිරිවැයත් වාර්තාගත මට්ටමකින් ඉහළ ගිහිල්ලා තියෙනවා. එළැඹෙන මුදල් වර්ෂය වෙනුවෙන්, තවත් යෙන් ට්‍රිලියන 36.6 ක් (ඩොලර් බිලියන 220 ක්) විතර හොයාගන්න ජපානයේ මුදල් අමාත්‍යාංශය සැලසුම් කරනවා.
ඉතින්, දැන් ජපානය කියන්නේ පිරිහෙමින් තිබෙන රාජ්‍යයක්. එක පැත්තකින් ආසියාවේ බටහිරට සේවය කරන ආධිපත්‍යයේ ඒජන්තයෙක් (Colonial proxy) විදිහට ජපානය වැඩ කරනවා. ඒ එක්ක ම, තවත් පැත්තකින්, ජපානය අධිරාජ්‍යවාදී බලය පුපුරුවා හරින කාල බෝම්බයක් බවටත් පත්වෙමින් ඉන්නවා. ජපානය විසින් මිල දී ඇරැගෙන තියෙන ඇමෙරිකානු භාණ්ඩාගාර බැඳුම්කර තමයි මේ බෝම්බයේ ඇණේට අත තියාගෙන ඉන්නේ.
ඇමෙරිකානු භාණ්ඩාගාර බැඳුම්කර (US Treasury bonds) වැඩිම ප්‍රමාණයක් මිල දී ඇරැගෙන තියෙන රට තමයි ජපානය. තමන්ගේ ව්‍යවහාර මුදලේ (යෙන් මුදලේ) අගය ආරක්ෂා කරගැනීම වෙනුවෙන් ජපානය ඕනෑම වෙලාවක මේ භාණ්ඩාගාර බැඳුම්කර විකුණලා දාන්න ඉඩ කියෙනවා. එහෙම දෙයක් කරපු ගමන් ම, ඇමෙරිකානු භාණ්ඩාගාර වෙළඳපොළේ විශාල බිඳවැටීමක් ඇතිවෙන එක වළක්වන්න බෑ.
කාර්මික පැත්තෙන් ජපානය අත්පත් කරගෙන හිටිය වාසිය මේ වෙද්දි චීනය විසින් අත්පත් කරගෙන ඉවරයි. ඊට අමතරව, ජපානය ඉතාමත් දරුණු විදිහට ජනගහන කඩාවැටීමක් (Demographic collapse) දක්වාත් තල්ලුවෙලා තියෙනවා.
මේ ඔක්කොම කරුණු කාරණා එකට තියලා බැලුවාම, ජපානයට දැන් ඉතුරුවෙලා තියෙන එක ම විසඳුම තමයි චීනයත් එක්ක තමන්ගේ සම්බන්ධකම් වර්ධනය කරගැනීම. ඒ සම්බන්ධතා වර්ධනය කරගැනීම මූනිච්චාවට කරලා නම් වැඩක් වෙන්නේ නෑ. අධිරාජ්‍යවාදී උණ හැදෙන්න කලින් හිටිය තත්ත්වයට ම ආපහු යන්න ජපානයට සිද්දවෙනවා. ඉස්සර වගේ ම චීනයත් එක්ක ඉතාමත් සමීප, බොක්කෙන් ම බැඳිච්ච ගනුදෙනු කිරීමක් පටන්ගන්න ජපානයට සිද්දවෙනවා. ඒ වෙනුවෙන්, ජපානයට තමන්ගේ බටහිර ඒජන්තකම අත්හරින්නත් සිද්දවෙනවා. දැන් ඉස්සරහට එන වාර්තාවලින් පැහැදිළිවෙන්නේ ජපානය දැනටමත් චීනය පැත්තට හැරෙමින් ඉන්න බවක් තමයි.
මේ කතාව ඉවර කරන්න කලින්, අපේ ශ්‍රී ලංකාවටත් අදාළ කාරණයක් කියන්න ඕනේ. අපේ අවුරුදු 2500 කට වැඩි අපේ ඉතිහාසය තුළ, මේ රටට ගුවනින් බෝම්බ ප්‍රහාර එල්ල කරපු එක ම රට තමයි ජපානය. ඒ විතරක් නෙවෙයි. 1977 අවුරුද්දෙන් පස්සේ, අපේ දේශීය කර්මාන්ත (උදාහරණයක් විදිහට, Unic රේඩියෝව ගැන හිතන්න) විනාශ කරලා, ඒ වෙනුවට තමන්ගේ නිෂ්පාදනවලට (උදාහරණයක් විදිහට, Sony වගේ නිෂ්පාදනවලට) ලංකාවේ වෙළෙඳපොළ අල්ලගන්නත් ජපානය කටයුතු කළා.
ලෝකය දැන් ආපහු තමන්ගේ ස්වභාවික තත්ත්වයට යොමුවෙමින් තියෙන බව හොඳට ම පැහැදිළියි. ඉතින් අවුරුදු 80 ක් විතර, බටහිර අධිරාජ්‍යවාදී කඳවුරේ ඉතාමත් සුවච කීකරු ඒජන්තයෙක් විදිහට කටයුතු කරපු ජපානයටත් තමන්ගේ ම ආර්ථික ලෙඩ රෝග මැද්දේ තමන් විසින් ඉතිහාසයේ පවත්වාගෙන ගිය පරණ අසල්වැසි සම්බන්ධකම (චීන සම්බන්ධකම) නැවතත් ගොඩනගාගැනීමට බල කෙරෙන වාතාවරණයක් මේ වෙද්දිත් උදාවෙලා අවසානයි.
- කසුන් කාරියවසම්
(සමාජ මාධ්‍යයෙන් උපුටා ගන්නා ලදී)
සම්බන්ධිත පුවත් | Related News
ප්‍රධාන පුවත්
නව ත්‍රස්ත පනතෙන් මානව හිමිකම් දැඩි ලෙස උල්ලංඝනය වීමේ අවදානමක්.. - ඇම්නෙස්ටි ඉන්ටර්නැෂනල්
පොලිස්පතිවරයා අධිකරණයට අපහාස කළ බව ප්‍රකාශ කරමින් ගම්පහ මහේස්ත්‍රාත්වරයා අදාළ ලිපිගොනු අභියාචනාධිකරණයට ඉදිරිපත් කරයි..
ශ්‍රී ලංකන් ගුවන් සේවයේ පද්ධතිවලට අනවසරයෙන් රිංගූ හැකර්ලා ඩොලර් 50,000ක කප්පමක් ඉල්ලලා.. - දයාසිරිගෙන් හෙළිදරව්වක්..
ප්‍රංශය ඇතුළු යුරෝපා රටවල උග්‍රවන ආර්ථික අර්බුදය සහ ජනතා විරෝධය ගැන ආචාර්ය ජගත් චන්ද්‍රවංශගෙන් අනාවරණයක්..
බුද්ධ ශාසන ඇමති අනුරාධපුර පූජා නගරය පිළිබඳ අර්ධ සත්‍යය මගින් විනාශකාරී මහා සත්‍යය සඟවනවා.. - ජාතික සංවිධානවලින් චෝදනා
භික්ෂූන් වහන්සේලා පාගමන පැවැත්වූවේ ආණ්ඩුව පෙරළන්න නෙවෙයි.. බුදු දහම, බුද්ධ චීවරය සහ මෙරට ඓතිහාසික වටිනාකම රැකගැනීම වෙනුවෙන්.. - මහාචාර්ය පූජ්‍ය කොටපිටියේ රාහුල හිමි
"විධායකයට විශාල බලයක් ලබාදීලා.. මහෙස්ත්‍රාත්වරයා රබර් මුද්‍රාවක් වෙලා": ත්‍රස්තවාදයෙන් රාජ්‍ය ආරක්ෂා කිරීමේ පනතට ශ්‍රේෂ්ඨාධිකරණයේදී පෙත්සම්කාර පාර්ශ්වයෙන් දැඩි විරෝධතා
අනුරාධපුර බුලන්කුලම වැව් රක්ෂිතයෙන් අක්කර 200ක් නිලධාරීන් අතර බෙදාදීමේ ක්‍රියාවලිය ප්‍රශ්න කරමින් දේශහිතෛෂී ජාතික ව්‍යාපාරයෙන් කෘෂිකර්ම ඇමති ලාල් කාන්තට ලිපියක්
ඉරානය නව වෙළෙඳ මාර්ගයේ ප්‍රධාන දුම්රිය සම්බන්ධතාවක් සම්පූර්ණ කරයි (වීඩියෝ)
කියුබාවේ හිටපු ජනාධිපති රාවුල් කස්ත්‍රෝ අත්අඩංගුවට ගැනීමට ඇමෙරිකානු ප්‍රාන්තයකින් වරෙන්තුවක්
ඇමරිකානු ජනපති ට්‍රම්ප් සහ රුසියානු ජනපති පුටින් අතර පැවති විනාඩි 90ක රහස් කතාබහේ ඇතුළාන්තය.. - ශ්‍රී ලංකා කොමියුනිස්ට් පක්ෂයේ ප්‍රධාන ලේකම්ගෙන් විශේෂ අනාවරණයක්..
මහ සඟරුවනට නින්දා අපහාස කරන නිරාගමික යූටියුබ් කරුවන්ට එරෙහිව අපරාධ පරීක්ෂණ දෙපාර්තමේන්තුවෙන් පරීක්ෂණයක්..
මුහුද යට කේබල් සහ AI මධ්‍යස්ථාන ඉලක්ක කර ගනිමින් ඉරානයෙන් දැවැන්ත යුද සූදානමක්!..
ඥානසාර හිමියන්ගේ සිවුර ගලවා ආණ්ඩුව රටට දෙන පණිවිඩය ගැන ප්‍රවීන මාධ්‍යවේදී ධර්මශ්‍රී ගෙන් අනාවරණයක්..
බෝධිසත්ව ගුණ නොමැති පුද්ගලයන් රජ නොවිය යුතුයි.. රජකම ලැබෙන්නේ චීවරය රකින්නයි..- අස්ගිරියෙන් ප්‍රකාශයක්..
මහානායක අතිපූජ්‍ය ඕමාරේ කස්සප නායක හිමියන් විපක්ෂ නායක හිරවෙන ප්‍රශන 3ක් අහලා..