විභාග තිබ්බෙ නැත්තම් කෝ අවස්ථා?.. විභාග අහෝසි කිරීමෙන් රටේ දරුවන් ගොඩ යයිද?..

Dec 15, 2025 at 10:57 AM

|

Lanka Leader

අධ්‍යාපන ප්‍රතිසංස්කරණ තුළ විභාග අහෝසි කිරීම සම්බන්ධයෙන් සමාජය තුළ කථිකාවක් මතුව ඇති පසුබිමක විභාග අහෝසිය මගින් සිදුවන ගැටලු සම්බන්ධයෙන් කරුණු පැහැදිලි කරන සමාජ මාධ්‍යයෙන් උපුටාගත් ලිපියක් පහළින් දක්වා තිබේ..

"මේ ඉහලින් අමුණල තියෙන්නේ මගේ අපොස සා පෙල සහතිකය… 

මම විෂයන් 10ටම A සාමාර්ථ ගත්ත කෙනෙක්…ඒ විෂයන් 12කට ඉල්ලුම් කරලා…එදා ඒ ඇප්ලිකේෂන් එකේ අන්තිමට තිබිබ තීරුවේ අනිවාර්‍ය විෂයන් 10ට අමතරව මම තව විෂයන් දෙකක් චූටි අකුරෙන් ලිවිවා..

ඒ සංවර්ධන අධ්‍යනය සහ දෙමළ කියලයි මට මතක. ඒ මොඩ කමද ඉගෙන ගන්ක තිබ්බ ආසාවද කියලා ඇහුවොත් මම අදත් කියන්නේ ඉගෙන ගන්න තිබිබ ආසාවට කියලා…අතිරේක විෂයන් දෙක මම වෙන ලමයින්ගෙ නෝටිස් කියවලා ඉගෙන ගෙන තිබුනා….

කරන්න පුළුවන් විෂයන් 10 යි යකු…

ඉතිං ඒ ටික කලා…

මට A 9ක් ශුවර්…ඉංග්‍රීසිත් A එකත් ශුවර්…ඒත් පොඩි නලියෑමක් හිතේ තිබුනේ එකක් ගැන…ප්‍රතිඵල ආපු ගමන් මං බැලුවේ ඒක..

ඉංග්‍රීසි සාහිත්‍ය…

හරි…ඒකටත් A….

දන්නවනේ ඉතිං…ඉංග්‍රීසි වගේ නෙවෙයි English Literature…

බිග් කුච්චන් තමයි.

අම්මා අප්පච්චි සතුටු වෙච්ච තරම් මතක් කරලා මට අදත් අඩන්න පුළුවන්…

ඒ අවුරුද්දේ මහනුවර උසස් බාලිකා විද්‍යාලයේ A10 ගත්ත අය 60 දෙනෙක් හිටියා…ඒ සුනාමි, ගංවතුර භූමි කම්පා , බෝමිබ පිපිරීම් නිසා විභාගෙ ලේසි කරලා නෙවෙයි.

එකම පංතියේ එකම පේලියේ ඉදලා සා පෙල හැම විශයටම A ගත්ත අපි හතර දෙනාගේ අද තත්වය ඒකට සාක්ෂි…

Dinithi Rathnayake- දැන් ආචාර්‍ය දිනිති රත්නායක 

USA වල intel process engineer 

Wimalika Thalgaspitiya- දැන් ආචාර්‍ය විමාලිකා තල්ගස්පිටිය 

USA වල intel module engineer කෙනෙක්

Nirodha Senevirathna- අද ආවාර්‍ය නිරෝධා සෙනෙවිරත්න (PhD in plant science )

ඒක තමයි තරගය අපිව ගෙනාපු දුර…..

දිනිතියි, විමාලිකයි මමයි නිරෝධායි අපි හැමෝම රජයේ රස්සාවල් කරපු දෙමව්පියන්ගෙ ලමයි…

පන්තියෙ හිටියා ත්‍රීකුණාමලයෙ ඉදලා ශිෂ්‍යත්වෙ පාස්වෙලා ඇවිත් ඉස්කෝලේ හොස්ටල් නතර වෙලා හිටපු යාළුවෙක්…දැන් විස්තර දන්නෙ නෑ..

ඉතිං විභාග තිබ්බෙ නැත්තම් කෝ මෙහෙම අපිට අවස්ථා? 

අඩුම තරමේ විසි කරන්න සල්ලි නැතත් කවදහරි දවසක සල්ලි වලට වඩා වටින දේවල් අහුල ගන්න පුළුවන් වෙන අනාගතයක් හදා ගන්න පුළුවන් කියලා පොඩි බලාපොරොත්තුවක් හරි තියා ගන්න පුළුවන් පාරක් පෙනුන එකම අපිට සහනයක් නෙවෙයිද? 

ඇයි අපි ට විභාග ලියලා තරග කරන්න වෙලා තියෙන්නේ? 

වර්ග කිලෝමීටර් 65610 ක භූම්ප්‍රමාණයක මිනිස්සු මිලියන 22න් ජීවත් වෙනවා…ජන ඝනත්වය වැඩී…භූමිය, ආහාර ජලය වගේම අවස්ථා ත් සීමිතයි…තරග නොකලොත් අපි පරදිනවා…

ෆින්ලන්තයේ , ඔස්ට්‍රේලියාවේ ලමයි විභාග නැතුව නිදහසේ ඉගෙන ගන්නේ 

සමිපත් බහුල නිසා, 

පොහොසත්

රටවල් නිසා, 

අවස්ථා සුලබ නිසා…

හරියට ඇනලයිස් නොකර ක්‍රමේ කොපි කරන්න ගියොත් අපේ අනාගත දරුවන් වල පල්ලට යනවා…

හොද ප්‍රතිපල නොගත්තොත් ඊලග ට අපොස උ පෙල ඉහලින් සමත් නොවුනොත්, කැම්පස් වලට තෝරා ගන්න ආසන්න වශයෙන් විසි දාහ ඇතුලට රිංග ගන්න බැරි වෙනවා…

විභාග නිසා දරුවන් ට අධික ලෙස පීඩනයක් දරන්න වෙනවා කියලා විභාග අහෝසි කරන්න යනවලු….

මේ විභාග කරලා ගොඩ අාපු දීප ව්‍යාප්ත සේවාවල ගුරු වෘත්තියේ, රාජ්‍ය සේවයේ පුද්ගලික අංශයේ කී දාහක් ඉන්නවද? 

ඊටවඩා පාරවල් අයිනේ රස්තියාදු ගහන ප්‍රමාණය වර්ධනය වෙනවා බලන්න අපි කවුරුත් අකමැතියි…

පීඩනය දියමන්ති නිර්මාණය කරනවා.෴෴

A 10 ක් ගන්ත කියලා ජීවිතේ දිනන්නේ නෑ…හැබැයි ජීවිතේ කිසි දවසක දිනන්න නැතුව ඉන්න තිබ්බ බහුතරයක් අනිවාර්යෙන් දිනන දුර්ලබ අවස්ථාවක් ඒක…

Education is the most powerful tool that can use to change the world…

ලෝකයේ එක චූටි තිතක් වගේ තියෙන මගේ මේ රටේ මිනිස්සුන්ට ලෝකෙ වෙනස් කරන්න තියෙන අවස්ථාව සියයට දශම බිංදු ගානක්…ඒකත් නැති කරලා දාන්න එපා…මේ දූපත ඉන්දියන් සාගරයේම ගිල්ලලා දැම්මා හා සමානයි ඒක…

ලංකාවේ අපේ දරුවො පරාද වෙන්න බෑ…අම්මලා තාත්තලා ගල්වැට ලග වාඩිවෙලා බලාගෙන ඉන්නවා…

එයාලගෙ ලමයි සක්විති පදවිය දිනනකම්…

ලංකාවේ අපිට ඒ ඔටුන්න පලදාගන්න යන්න තියෙන ලේසිම පාර අධ්‍යාපනය….

ඒ නිසා ක්‍රමය මොකක් වුනත් අධ්‍යාපන ප්‍රතිසංස්කරණ වලදි, විභාගය අහෝසි කිරීම, ලංකාව දියණු රටක් වෙලා නොමිලේ උපාධියක් කිරීම , කොල්ලෝ කෙල්ලන්ගේ තීරණයක් මිසක් විභාගයකින් සීමිත පිරිසක් තේරීමක් නොවන දිනයක සිදුවිය යුත්තකි. 

එබැවින් , ඒ දිනය දක්වා ලංකාවේ විභාග අහෝසි කිරීම කල් දමන මෙන්, මා පැමිණි පාරේ ඒමට නියමිත මධ්‍යම පාන්තික අනාගත ශ්‍රී ලාංකික දරුවන් සියලු දෙනා වෙනුවෙන් අදාල බලධාරීන්ගෙන් ඉතා කාරුණිකව අයදිමි.."

මීට, 

දම්ම් වික්‍රමසිංහ

2025.12.12

වෙන්ඩ ආචාර්ය

ඔස්ට්‍රේලියාවේ ඉගෙන ගන්න ගමන්