හරිශ්චන්ද්‍ර විජයතුංග මහතා ගැන..

Nov 14, 2025 at 06:42 AM

|

Lanka Leader

හරිශ්චන්ද්‍ර විජයතුංග මහතා මුල් වරට  භෞතිකව හමු වූයේ ගුණදාස අමරසේකර මහතාගේ සභ්‍යත්ව රාජ්‍යය කරා පොත එළි දැක්වූ මොහොතේ දී ය. ඔහුගේ අභාවය දැනගන්නට ලැබුණේ අද ගුණදාස අමරසේකර ප්‍රත්‍යවලෝකනයට සම්බන්ධ වූ අවස්ථාවේ ය.

හරිශ්චන්ද්‍ර විජයතුංග මහතා සමඟ කතා කිරීමට මට යම් විශේෂ මාතෘකාවක් විය. කුමාරතුංග මුනිදාස මහතා සිංහල භාෂාවේ අනාගත කාලයක් නැති බවට පෙන්වූ මතය ඉදිරියට ගෙන ගිය අයකු වූයේ හරිශ්චන්ද්‍ර විජයතුංග මහතා ය. පැතලි පොළව පිළිබඳ විශ්වාසය සමඟ මෙහි සම්බන්ධතාව ගැන ඔහු යම් මතයක් ගොඩනඟා පොතක් ලියා තිබිණි. ("කාලය වර්තමානය හා පැතලි ලෝකයේ විශ්වාසය")

මගේ අදහස වූයේ සිංහල භාෂාවේ අනාගත පමණක් නොව අතීත හෝ අනතීත හෝ කාල ද නැති බවයි. එනම් කාලභේදයක් ම නැති බවයි. හරිශ්චන්ද්‍ර විජයතුංග මහතා සමඟ බොහෝ විට මා කතා බහ කළේ මේ මාතෘකාව ය.

හරිශ්චන්ද්‍ර විජයතුංග මහතා අපට කිහිප ආකාරයකින් වැදගත් වේ. එක් අතකින් ඔහුගේ  "මහා සිංහල ශබ්දකෝෂය" හා ව්‍යවහාරික, පාරිභාෂික හා ප්‍රායෝගික ශබ්ද කෝෂ ආදී සිංහල ශබ්දකෝෂ ඉතා වැදගත් කාර්යභාරයන් ය. නාම පද වෙනුවට නාම ප්‍රකෘති සිරස් පද කිරීමේ ක්‍රමය එතුමා අවධාරණය කළේ ය.

සිංහල භාෂාවේ ක්‍රියා පද නිර්මාණය නොවීමේ ප්‍රශ්නය ගැන ඔහු වැදගත් අදහස් පළ කොට ඇත. නාම ප්‍රකෘති මඟින් ක්‍රියා ධාතු සෑදුණු දුර්ලභ අවස්ථා ගැන අවධානය යොමු කළ ඔහු එවැනි දේ පුළුල්ව යොදා ගැනීමේ හැකියාවක් තිබේ දැයි යන්න විමසා බැලී ය.

බටහිර විද්‍යාව හා නීතිය සිංහලෙන් ඉගැන්වීම සම්බන්ධව ඔහුගේ කාර්යභාරය අතිමහත් ය.

රසායන විද්‍යාව උගන්නා සිසුන් අතර ප්‍රචලිත 

බ්‍රවුනිං හා ජෝසප්ගේ ප්‍රායෝගික රසායන විද්‍යාව පොත මෙන් ම ඩරන්ට්ගේ කාබනික රසායනය පොත සිංහලට පරිවර්තනය කළේ එතුමා ය. පැරණි සිංහල නීතිය ගැන ද ඔහු අධ්‍යයනය කළේ ය.

සිංහලයේ මහා සම්මත භූමි පුත්‍ර පක්ෂය නිර්මාණය කළ එතුමා ජාතිකවාදී දේශපාලනය වෙනුවෙන් පෙනී සිටියේ ය. ව්‍යාජ දෙමළ නිජබිම් ඉතිහාසයට විරුද්ධව කරුණු දැක්වී ය. යූඑන්පීය හා චන්ද්‍රිකා අතර දේශපාලනය බෙදී ගිය මොහොතක එතුමාගේ ජනාධිපතිවරණ අපේක්ෂකත්වය ජාතිකත්වය වෙනුවෙන් යම් සංකේතාත්මක ප්‍රකාශනයක් කිරීම සඳහා වැදගත් විය.

හරිශ්චන්ද්‍ර විජයතුංග මහතාට නිවන් සුව!

(මුහුණුපොතෙන් උපුටාගන්නා ලදී)