අධිකරණ ඇමතිවරයා විසින් මහින්දානන්ද අලුත්ගමගේව දේශපාලන සිරකරුවෙක් කළාද..?

Jun 4, 2025 at 09:53 AM

|

Lanka Leader

1977 ආරම්භ වූ විවෘත ආර්ථිකය සහ නව සමානුපාතික මැතිවරණ නීති  නිසා මජර දේශපාලන සිස්ටම් එකක් බිහි වූ බව රහසක් නොවේ. එය දේශපාලන ක්ෂ්‍රේත්‍රය පමණක් නොව රාජ්‍ය නිලධාරී යාන්ත්‍රණයද අන්ත දූෂිත තත්වයට පත් කළේය.

අල්ලස, හොරකම, ගජමිතුරු සේවනය, රජයෙ චක්‍රලේඛ තුට්ටු දෙකට දැමීම, කප්පම් ගැනීම රාජ්‍ය යාන්ත්‍රණයේ පහළ සිට ඉහළටම පැතිර ගිය පිළිකාවක් විය.

බත් මුට්ටිය උස්සගෙන දිවීමෙ සිට බැංකු කැඩීම දක්වා වූ හොරකම්,, කැරලි ගසා රාජ්‍ය බලය ලබා ගැනීමට තැත් කිරීම, වෘත්තීය සමිති මාෆියාවක් ඇති කර කප්පම් ගැනීම, තම දේශපාලන බල න්‍යායපත්‍රය වෙනුවෙන් වර්ජන සහ උද්ඝෝෂණය කිරීම්ද මෙම මජර දේශපාලන සිස්ටම් එකේම තවත් එක් දිගුවකි.

ජනතාවට මේ මජර ක්‍රමය එපා වී තිබුණි. ඔවුන් පසුගිය ජනාධිපතිවරණයේ දි එයට විසඳුමක් සහ විකල්පයක් යැයි සිතා අනුර කුමාර දිසානායක ජනාධිපති බවට පත් කරේ ප්‍රජාතන්ත්‍රවාදී විප්ලවයකිනි.

දෙයක් නරක නම් අප ඒ වෙනුවට විකල්පයක් ලෙස තෝරා ගත යුත්තෙ ඊට වඩා හොඳ එකකි. එහෙත් ජනතාවට නැවතත් වැරදුනේය. ඔවුන් කබලෙන් ලිපට වැටුණු අතර තවත් වතාවක් මහ දවල්, ඇස් ඇරගෙනම දේශපාලන බොරු වලක වැටී ඇත. 

ජනතාව බලාපොරොත්තු වූයේ සුපිරිසිදු ජනතාවාදී ආණ්ඩුවකි. ගෙවී ගිය මාස 08 ට අනුර සහ ආණ්ඩුව කිරි කලයට ගොම බිඳුවක් නොව ගොම බෙටි පිටින් දමාගෙන ඇත. ඇත්තටම කිවහොත් දැන් එහි කිරි නැත. ගොම පමණි.

පිළුණු බත් එපා යැයි ප්‍රතික්ෂේප කළ ජනතාවකට දැන් කක්කුස්සි වලක් කඩාගෙන කන තත්වයට පත්ව ඇත. වෙනස එතරම් පට්ටය.

අත්දැකීම් රහිත " L " බෝර්ඩ් ආණ්ඩුව මේ වන විට දේශපාලන, ආර්ථික සහ සමාජීය යන සියලු ක්ෂ්‍රේත්‍රයන්හි පට්ට ෆේල් වී ඇති බව රහසක් නොවේ. ඔවුන්ට ජනතාවගෙ ප්‍රසාදය රැකගැනීමට ඇති එකම අවස්ථාව වූයේ ජනතාවට පොරොන්දු වූ පරිදි හොරුන් සහ දූෂිතයන් නීතියෙ රැහැනට හසු කර දීමට උදව් කිරීම පමණි.

මහ බැංකු හොරකමට අර්ජුන මහේන්ද්‍රන්ව පැය 48 ක් ඇතුලත කනෙන් ඇදගෙන එනවා යැයි පාරම් බා බලයට පැමිණි අනුර සහ ආණ්ඩුව මේ වන විට තම දේශපාලන ගජයන්ගෙ රතු ලේබල් කන්ටේනර් 323 ක් රේගුවෙන් පැන්නීම, ඩඩ්ලිගෙ සහල් ජාතක කතා වස්තුව, තම ගජයන්ට අරක්කු පෙරීමෙ බලපත්‍ර ලබා දීම, හාල්, පොල්, ලුණු ප්‍රශ්ණවලදි ආණ්ඩුවෙ සහ වෙළද ඇමති වසන්ත සමරසිංහගෙ සැක සහිත හැසිරීම, අනුර ජනාධිපතිවරයාගෙ නොමේරු රාජ්‍ය තාන්ත්‍රික හැසිරීම, රජයෙ සුඛෝපභෝගී වාහන අඩු මිලට විකිණීම,  නාධිපතිවරයාගෙ සිට ප්‍රාදේශීය සභා මන්ත්‍රීවරයා දක්වා ඉහළ සිට පහළටම බොරු කීම, මැති ඇමතිවරුන්ගෙ උද්දච්ච හැසිරීම යන කාරණා රාශියක් නිසා විශාල වශයෙන් ජනතා අප්‍රසාදයට පත්වෙමින් ඇත.

මේ මා මනැසින් දැක දොඩවන හිතළු නොව මාස 07 කට පෙර පැවැති මහ මැතිවරණයේ දි අනුරගෙ ආණ්ඩුවට ලක්ෂ 68 ක් වූ චන්ද පදනම මෑතකදි පැවති පලාත් පාලන මැතිවරණයේදි ලක්ෂ 45 දක්වා ලක්ෂ 23 කින් පල්ලම් බැස්සේය. එය ඔවුන්ගේ චන්ද පදනම 34% කින් පහත වැටීමකි. වෙනත් විදියකින් කිවහොත් ඔවුන් සමග සිටි ජනතාව 1/3 ක් මාස 07 ක් ඇතුලත ඔවුන්ව අත්හැර ගොස් ඇත. 

බලාපොරොත්තු රාශියකින්, දේශපාලන විප්ලවයකින් ආරම්භ කළ නැවුම් ආන්ඩුවක් මෙවැනි කෙටි කාලයකදි මෙතරම් කඩාවැටීමක් ලෝක දේශපාලන ඉතිහාසයේ දී වත් සිදු වී නැත.

ආණ්ඩුව පිරිහෙමින් වල පල්ලටම යන පවතින මොහොතක මේ රටේ ස්වාධීන අධිකරණය සියලුම දෙනාගෙ ඇස් ඇස් උඩ යන ඇස් ඇරෙන නඩු තීන්දුවක් දුන්නේය. ඒ මීට වසර 06 කට පෙර චෝදනා ගොනු කළ නඩුවක් සම්බන්ධයෙන් එවකට ක්‍රීඩා ඇමතිවරයෙක්ව සිටි මහින්දානන්ද අලුත්ගමගේ සහ සතොස සභාපතිවරයාව සිටි නලින් ප්‍රනාන්දුට එරෙහිව පිළිවෙලින් බරපතල වැඩ සහිතව වසර 20 ක සහ 25 ක දඬුවමකි.

තම දේශපාලන මතය කුමක් වුවත් මේ රටේ අති මහත් ජනතාව ඒ අධිකරණ තීන්දුව පිලිගත්තේ හිස නමා ගෞරව පූර්වකවය. එයට හේතුව මේ මජර දේශපාලන ක්‍රමයට කොතනින් හෝ තිතක් තැබිය යුතුය යන සිතුවිල්ලක් හැම කෙනෙකුගේම සිත් තුළ තිබූ නිසාය.

එම ස්වාධීන අධිකරණ තීරණයත් සමග වැලේ වැල් නැතුව සිටි අනුරට සහ මාලිමා ආණ්ඩුවට චන්දය දී ඉතිරිව ඇති සුළුතරයක් හැසිරෙන්නට වූයේ ගාසා තීරයට පාන් ගෙඩියක් වැටුනා සේ උද්දාමයෙනි. සමාජ මාධ්‍ය තුළ ඔවුන් මෙය හුවා දැක් වූයේ මෙය අනුරගෙ සහ මාලිමාව ආණ්ඩුවෙ ජයග්‍රහණයක් ලෙසයි.

එය අධිකරණයෙ ස්වාධීනත්වයට යුතු නැතයි අප පවසද්දි ඔවුන් අඩියක් පස්සට තබමින් පැවසුවේ අධිකරණය ස්වාධීන බවත් එහෙත් මාලිමා ආණ්ඩුව යටතේ නඩු ගොනු කිරීම, ප්‍රබල සාක්ෂි ඉදිරිපත් කිරීම, සාක්ෂි යට නොගැසීම වැනි කරුණු වලින් නීතිපති දෙපාර්තමේන්තුව සහ ආශ්‍රිත අනිකුත් නිලධාරීන්ට නිදහසෙ වැඩ කිරීමට පරිසරයක් සකස් කර දුන් බවයි.

පෙර පැවැති ආණ්ඩු වලදි නීතිපති දෙපාර්තමේන්තුවෙ සහ සාක්ෂි සම්පාදනය කරන ආයතන වල නිලධාරීන් එම ආණ්ඩුවට අවාසිදායක වන තීරණ වලට බාධා කරානම් නව ආණ්ඩුව පත්වීමත් සමග එම නිලධාරීන්ම එම ආණ්ඩුවට වාසිදායක තීරණ දීමට කටයුතු කරනවා යැයි යන තර්කය ද බැහැර කළ නොහැකිය. ගොරකා දඩමස් කිරීම සහ දඩමස් ගොරකා කිරීමේ උදාහරණ ඕනෑ තරම්ය. 

මෙවන් වාතාවරණයක් තුළදි මේ රටේ අධිකරණ ඇමතිවරයා වන හර්ෂණ නානායක්කාර ( රස සාගරයක් හිනා ආකරයක් යන තේමාව ඔස්සේ චිත්‍රපට නිෂ්පාදනය කල යසපාලිත නානායක්කාරගෙ පුත්) මොරටුවේ දි පැවැති නගර සභා මංගල සැසිවාරයකදි ප්‍රකාශ කළේ..

" මහින්දානන්ද අලුත්ගමගේගෙ නඩුවෙ ඔබ හිතනවාද ජාතික ජන බලවේගයෙ ආණ්ඩුව හැර වෙනත් ආණ්ඩුවක් බලයෙ සිටියා නම් ඔය තීන්දුව ලැබෙයි කියලා. මම හිතනවා නෑ කියලා. ඒ මගේ පෞද්ගලික මතය "

රටේ අධිකරණ ඇමතිවරයා වන නීතිඥයෙකු ද වන හර්ෂණ නානායක්කාරගෙ මෙම ප්‍රකාශය පිළිබඳව ඊයෙ පාර්ලිමේන්තුවේදි පවා ප්‍රශ්ණ කරන තත්වයට පත් විය. 

හර්ෂණ නානායක්කාරගෙ මෙම ප්‍රකාශය හුදු තමන්ගෙ පෞද්ගලික මතයක් සේ බැහැර කළ හැකිද...? ඔහු එය පැවසුවේ රාජ්‍ය උත්සවයක මෙරට අධිකරණ ඇමතිවරයා ලෙස පෙනී සිටිමින් මිස ඔහු රඟ පෑ තුට්ටු දෙකේ වාණිජ චිත්‍රපටියක සීන් එකක නොවේය.

එම ප්‍රකාශය මගින් ත්‍රී පුද්ගල අධිකරණයක් ස්වාධීනව, පිරිසිදුව දුන් තීන්දුවක් පිලිබඳව ජනතාව තුළ සැක සංකා මතුවිය හැකිය. එය නොවැලැක්විය හැකි තත්වයකි. 

අධිකරණ ඇමතිවරයාගෙ මෙම බරපතල ප්‍රකාශය මගින් එතකොට මහින්දානන්ද අලුත්ගමගේ යනු දේශපාලන සිරකරුවෙක් ද යන ප්‍රශ්නාර්ථය ඇති වීමටද ඉඩ ඇත.

මෙවැනි ප්‍රකාශ මගින් නව ආණ්ඩු පත්වීම, ආණ්ඩු මාරුවීම් මත මේ රටේ අධිකරණ තීන්දු වෙනස් වෙනවා දැයි සැකයක් ජනතාව තුළ සිතීමට පොලඹවනවා ඇත.

අනාගත දේශපාලන බල පෙරළියකදි මහින්දානන්ද අලුත්ගමගේට ජනාධිපති සමාව දීමට තරම් හේතුවක් ලෙස මෙම ප්‍රකාශය පදනමි කරගත හැකි නොවේද...?

අධිකරණ ඇමතිවරයාටද මයික් එකක් දුටු විගස, ජනතාව සීයක් දෙසීයක් දුටු විට චූන් වී කටට බ්‍රේක් නැති වී මාලිමා මැති ඇමතිවරුන් බහුතරයකට ඇති ලඟ පිකප් වීමෙ, නන් දෙඩීමේ හීනෝන්මාදය නිසා කළ ප්‍රකාශයෙන් එම ස්වාධීන තීන්දුවට කල හානියෙ බරපතල කම මෙතැකයි කියා මැනිය නොහැකිය.

අධිකරණ ඇමතිගෙ නිගමනය අනුව අධිකරණය අනාගතයේ දි දෙන තීන්දු පිළිබඳවත් " ජාතික ජන බලවේගයෙ ආණ්ඩුව තිබ්බ නිසා මේ තීන්දු අධිකරණය දුන්නා " යැයි සිතීමට ජනතාව පෙළඹීමට ඉඩ ඇත.

අනික මේ ප්‍රකාශය කරන්නෙ පශු සම්පත් ඇමතිවරයා නොව මේ රටේ අධිකරණ ඇමතිවරයාය. අධිකරණ ඇමතිවරයාගේ මෙම ප්‍රකාශය අනුව ඉදිරියේදී යම් දේශපාලඥයෙකු අධිකරණය මගින් වරදකරුවෙකු කලහොත් ඔවුන් වැටෙන්නෙ දේශපාලන සිරකරුවන් ගොඩටද...?

එම තීරණය මේ රටේ සබුද්ධික ඔබට බාරය...

- නිලන්ත සත්සර ගමගේ ✍️

(මුහුණුපොතෙන් උපුටා ගන්නා ලදී)