ජාතිය අමතා කෙඳිරිගෑම..

Mar 19, 2026 at 09:20 AM

|

Lanka Leader

සාමාන්‍යයෙන් ජනාධිපති කෙනෙක් ජාතිය අමතන පිලිවෙලක් තියනවා.ඊට ගැලපෙන ඇඳුමක් ඇඳගෙන,සුදුසු තැනක ඉඳන්, ජාතිය ඇමතීමේ අරමුණ හරියට ඔළුවේ තියාගෙන තමයි ඒක  කරන්න ඕනි. හැබැයි ගිය 17 වෙනිදා ඩබල් පොකට් ෂර්ට් එකක් ඇඳගෙන,තියන්න ඕනිවට පැත්තකින් ජාතිය කොඩියත් තියාගෙන,රටේ මතුවෙලා තියෙන තත්වය ගැන හරි අවබෝධයක් නැතිව තමන්ගේ බැරිකම වහගන්න අනුර ජාතිය අමතලා කතාවක් කළා.

රටේ රාළ ඒක දකින්නේ ජාතිය අමතා කරපු කෙදිරිගෑම විදිහටයි. ජාතිය අමතලා අනුර කරපු කෙඳිරිගෑමෙන් පස්සේ ජනතාව නං අනුරට අමතනවා ඇහුණා.ඇත්තට අනුර ඒ කතාව කළේ කුමාර ජයකොඩිව බේරගන්න බව පැහැදිලියි.ජනවාරි මාසයේ ඇමරිකන් USS එබ්‍රහම් ලින්කන් නෞකාව අරාබි මුහුද පැත්තට යාත්‍රා කරනකොට රටේ රාළ මතුවෙන්න පුළුවන් අවධානම ගැන අනතුරු ඇඟවීමක් කළා.

මොකද ඇමරිකාව ඔය වගේ යුධ නෞකාවක් පරිවාර නෞකාත් එක්ක ස්ථාන ගත වෙන්නේ මාළු අල්ලන්න නෙවෙයි කියලා අනුරට නොතේරුණාට පහ වසර ළමයෙකුට උනත් තේරෙනවා මේ මොකාටද එන්න හදන්නේ කියලා.ඊට පස්සේ පෙබරවාරි 28 වෙනිදා ඇමරිකාව සහ ඊශ්‍රායලය ඉරානයට පහර දුන්න ගමන් රටේ රාළ ආයෙත් අනතුරු ඇඟවීමක් කළා.රටේ රාළ කිව්වේ මේ යුද්ධ කල් ඇදෙන කලාපීය යුද්ධයක් බවට පත්වෙනවා කියලයි.

එතනදී රටක් විදිහට අපට මුහුණ දෙන්න වෙන තත්වය සහ ඒකට තියන එකම විසදුම ගැනත් කිව්වා.මේ ප්‍රශ්නයට රටම එකතුවෙලා මුහුණ දෙමු ඒ වෙනුවෙන් ජාතිය එකඟතා වැඩපිලිවෙලකට යමු කියලා යෝජනා කළා.හැබැයි අනුර ජාතිය අමතලා කරපු කෙඳිරිගෑමෙන් එහෙම වැඩපිලිවෙලකට එයා එකඟ නැති බව පේනවා.අනුර සම්පුර්ණයෙන්ම එයාගේ ආර්ථික ආවේෂණ කමිටුව මත විශ්වාසය තියලා තියන බව පේනවා.

දැන් අනුරගේ කැබිනට් එක බවට පත්වෙලා තියෙන්නේ මේ ආර්ථික ආවේෂණ කමිටුව.අනුර කරලා තියෙන්නේ රාජ්‍ය යාන්ත්‍රණය තුල විවිධ තැන්වල ඉන්න නිළාධාරින් සහ අනූරට හිතවත් කට්ටිය දාගෙන ආර්ථික ආවේෂණ කමිටුව කියලා එකතුවක් හදාගැනීමයි.ඊට පස්සේ අනුර දවසකට, දෙකකට සැරයක් ඒක කැඳවන එකයි.සාමන්‍යයෙන් ජෙප්පෝ ප්‍රශ්නයක් ආපු ගමන් කරන්නේ ටක් ගාලා කමිටුවක් හදලා ඒක කැඳව කැඳව ඉන්න එකයි.

රටට කැඳත් නැති වෙනකං අනුර ඔය කමිටුව කැඳව කැඳව හිටීයි.රටේ රාළ කීයටවත් කියන්නේ නෑ ආර්ථික ආවේෂණ කමිටුවෙන් මොකක්වත්ම වෙන්නේ නෑ කියලා.මොනවා හරි ටිකක් වෙනවා ඇති.හැබැයි ප්‍රශ්නට උත්තරය හම්බවෙන්නේ නෑ. ඇත්තටම මේ ප්‍රශ්නය පරිපාලන උත්තරයක් විතරක් හරියන්නේ නෑ.මේ තියන දේවල් ටික කළමණාකරණය කරලා හොයන්න පුළුවන් සීමිත උත්තරයක් විතරයි.මෙතෙන්ට දැන් ඕනි දේශපාලන උත්තරයක්.

ඒකයි රටේ රාළ කිව්වේ අනුරට සියලු පක්‍ෂ නායකයන් කැඳවන්න කියලා.එතනදී තමයි සියලු පක්‍ෂ නායකයන් ඇතුලත්වන දේශපාලන කම්ටුවක් හදන්න ඕනි.ඕනි නං සියලුම ආගමික නායකයන්වත් කැඳවලා සර්ව ආගමික කමිටුවක් හැදුවත් කමක් නෑ.අනුරට තව කමිටු ඕනි නං ඒවත් දාගත්තට කමක් නෑ. විජිතටත් කමිටුවක් හදලා දීලා කියලා ආරංචියි.හැබැයි මෙතනදී තීරණාත්මක වෙන්නේ දේශපාලන කම්ටුවයි.එකෙන් ගන්න තීරණ ක්‍රියාත්මක කරන්න ආර්ථික ආවේෂණ කමිටුවක් හැදුවට කමක් නෑ.

රටේ රාළ දේශපාලන කමිටුවක් ඉල්ලන්නේ නිකං නෙවෙයි.මෝඩ ජෙප්පෝ හිතනවා ඇති රනිල් හරි,සජිත් හරි,නාමල් හරි,දිලිත් හරි,චම්පික හරි ජනාධිපති කරන කුමන්ත්‍රණයක් කියලා.මේ වෙලාවේ ආණ්ඩුව පෙරලෙනවට රටේ රාළ කීයටවත් කැමති නෑ. රටේ රාළ යෝජනා කරන වැඩපිළිවෙළ හැදෙන්නේ අනුරගේ මූලිකත්වයෙන්.හැබැයි එහෙම දෙයක් කරන්න තරමේ විවෘත මනසක් සහ ශක්තිමත් කොන්දක් අනුරට නෑ.

මේ ආණ්ඩුව පත්වෙලා දැන් අවුරුද්දයි මාස හයක් වෙනවා.ඒ කාලය පුරාම ආණ්ඩුව ෆේල්.කිසිම වැඩක් කරගන්න බෑ.අත ගහන ගහන වැඩේ ෆේල්.අඩූම ගානේ රිලව් ටික ගණන් කරගන්නවත් බෑ.ඒක නිසා මේ ආණ්ඩුව කියන්නේ ජනතා විශ්වාසය නැති කරගත්ත ආණ්ඩුවක්.තිබුණ ජනවරම අහමි කරගත්ත ආණ්ඩුවක්.ඇත්තටම මේක නියම පාණ්ඩුවක්.දැන් රටේ ජනතාවගෙන් 85%ක් විතර ආණ්ඩුවට විරුද්ධයි.මේ වගේ අර්බුදයකදී ඒ විරුද්ධ කණ්ඩායම තමයි කළමණාකරණය කරගන්න ඕනි.

හැබැයි මේ අමන මරි මෝඩ ආණ්ඩුව වැඩ හදන්නේ තමන් එක්ක ඉන්න 3% දිහා බලාගෙන.එහෙම කරන්න ගිහින් එක පාරක් වැරදුන ගමන් අර 85%ම නැගිටිනවා.ඒක නවත්තන්න 3%ට බෑ. ඇත්තටම ජවිපෙ කියන්නේ ඒ දේශපාලන අවබෝධය තිබුණ පක්ෂයක්.එහෙම පක්ෂයක් තමයි ටිල්වින්ලා,අනුරලා අද හැඟීම් දැනෙන්නේ නැති හිරි වට්ටපු පක්ෂයක් බවට පත්කරලා තියෙන්නේ.

ඔයාලට මතක ඇති සෝමවංශ අමරසිංහ චන්ද්‍රකා එක්ක, මහින්ද,මෛත්‍රි එක්ක එකඟතාවලට ගියා.ඒ එයාලා හොඳ හින්දා නෙවෙයි.ශ්‍රීලනිපය එක්ක සන්ධානය හැදුවේ ශ්‍රීලනිප හොඳ හින්දා නෙවෙයි.එදාත් මහින්දට දුෂණ චෝදනා තිබුණා.හැබැයි සෝමවංශ දැක්කා කොටි පරද්දන වැඩේට හොඳම මිනිහා මහින්ද කියලා.ඒක නිසා දේශපාලන එකඟතාවයකට ගියා.එක්සත් ජනතා නිදහස් සන්ධානය හැදුවා.ජවිපෙ මැදිහත්වෙලා මානෙල් මල් ව්‍යාපාරය වගේ ව්‍යාපාර හදලා රටම යුද්ධෙට සුදානම් කළා. අන්න ඒ අවශ්‍යතාවය තමයි මෙතනත් තියෙන්නේ.

එදත් ජවිපෙ ඇතුලේ ඉඳන් අනුරලා යුද ජයග්‍රහණය වලක්වන්න නොකරපු දෙයක් නෑ.ජවිපෙ විතරක් නෙවෙයි අපේ රටේ හිටපු ජනාධිපතිවරු හැම කෙනාම වගේ ජාතියට විපතක් උන හැම අවස්ථාවකදීම ප්‍රශ්නය පොදු කරගෙන මුහුණ දෙන්න උත්සහ කළා.සර්වපාක්ෂික සමුළු කැදෙව්වා.ජේආර් පවා සර්වපාක්ෂික සමුළුවක් කැදෙව්වා.දේශපාලන උපක්‍රමයක් විදිහට හරි එහෙම කළා.ඇත්තටම මේ ප්‍රශ්නයට මුහුණ දෙන්න පුළුවන් දැනුම සහ ශක්තිය තියන මිනිස්සු ඉන්නේ විපක්ෂයේ.

මෙතනදී එයාලගේ සහය ගැනීමෙන් අනුරට කිසිම මදි පුංචිකමක් වෙන්නේ නෑ.දේශපාලන පැත්තකින් තියලා හිතුවොත් ඇත්තටම මේ වගේ වෙලාවක අපේ රටේ ඉන්න ඕනි රනිල් වගේ නායකයෙක්.රවී වගේ මුදල් ඇමති කෙනෙක්.අලි සබ්‍රි,ජීඑල් වගේ විදේශ ඇමති කෙනෙක්.චම්පික,කංචන වගේ බලශක්ති ඇමති කෙනෙක්.රමේෂ්,රාජිත වගේ සෞඛ්‍ය ඇමති කෙනෙක්.එයාලට සාපේක්ෂව හිතුවොත් දැන් ඉන්න ඔක්කොම පාපිසි.ඇත්තටම ඒ අයගේ සහය ගන්න ෆෝමැට් එකක් තියෙන්න ඕනි.

ජෙප්පෝ හිතන විදිහට මහින්ද හිරේ දාලා,රනිල් හිරේ දාලා, චම්පිකලා,ගම්මන්පිලලා,විමල්ලා හිරේ දාලා මේ ප්‍රශ්නය විසඳන්න පුළුවන්ද?ඒ අය හිරේ දාන්න ශානීවත් දාගෙන පස්සෙන් එලෙව්වට අපේ රටට තෙල් එන්නේ නෑ,ගෑස් එන්නේ නෑ. ජනතාවගේ මේ දැවෙන ප්‍රශ්නවලට ඒක උත්තරයක් නෙවෙයි. රටේ රාළට අවසාන වශයෙන් කීයන්න තියෙන්නේ අනුර දැන දැනම ගහන්නේ පට්ට කෙබර.අනිවාර්යෙන්ම ඉන්ධන,ගෑස්,ගල් අඟුරු හිඟයක් එනවා.අනිවාර්යෙන්ම විදුලි කප්පාදුවක් එනවා.

පොහොර ප්‍රශ්නය එනවා.ඒ වගේම ආහාර අර්බුදයක් එනවා. අත්‍යාවශ්‍ය බෙහෙත් හිඟයක් එනවා.ඒක වෙන්නේ ජාතික සහ ජාත්‍යන්තර වශයෙන් සැපයුම් ජාල බිඳවැටීම සහ නිෂ්පාදන ක්‍රියාවලියේ සිද්ධවෙන බිඳවැටීම එක්ක.ඒවාට පෙර සුදානමක් නැති හින්දා.සිංහල අවුරුද්දත් එක්කම මේ රටට ලබන්නේ නරක කාලයක්.යන්න හරි පාර පෙන්නලා දීලා තියෙද්දී උද්දච්චකම සහ වෛරය නිසා වැරදි පාරේ යනවා නම් අනුරට ඒකට විපාක මේ අවුරද්ද අඟදී විදින්න සිද්ධවෙයි.

හරි එහෙනම් ගිහින් එන්නම්.

ජයවේවා.

මීට

රටේ රාළ.