එක්සත් ජනපද අවහිර කිරීම් කියුබාවට ඩොලර් මිලියන ගණනක අලාභ පමුණුවනවා!- කියුබානු විදේශ අමාත්‍ය බෘනො රොඩ්‍රිගුස්

Sep 15, 2024 at 08:11 AM

|

Lanka Leader

එක්සත් ජනපදය විසින් පනවා ඇති ආර්ථික, වාණිජ සහ මූල්‍ය අවහිර කිරීම් හේතුවෙන් කියුබාවට 2023 සිට 2024 දක්වා ඩොලර් බිලියන 5.56 ක අලාභයක් සිදුවී ඇති බව කියුබානු විදේශ අමාත්‍ය බෘනො රොඩ්‍රිගුස් 12 වනදා ප්‍රකාශ කළේය.දේශීය සහ විදේශීය වාර්තාකරුවන් පිරිසක් ඉදිරියේ අදහස් දක්වමින් 2023 මාර්තු 1 සිට 2024 පෙබරවාරි 29 දක්වා සිදු වූ ආර්ථික හානිය ඊට පෙර වූ වාර්තාවට වඩා ඩොලර් මිලියන 189.8 ක වැඩිවීමක් නියෝජනය කරන බව රොඩ්‍රිගස්  අවධාරණය කළේය. එහිදි ඔහු එක්සත් ජනපදය කියුබාවට පනවා ඇති ආර්ථික සම්බාධක වල බලපෑම් පිළිබඳ නවතම වාර්තාව ඉදිරිපත් කළේය.

එම වාර්තාවට අනුව එක්සත් ජනපද සම්බාධක නිසා කියුබාවට සිදුවන පාඩුව මසකට ඩොලර් මිලියන 421කට වඩා ආසන්න හානියක් වන අතර එය දිනකට ඩොලර් මිලියන 13.8කට වඩා වැඩි අගයක් ගනී. ඒ අනුව එක්සත ජනපදය කියුබාවට පනවා ඇති ආර්ථික සම්බාධක හේතුවෙන් කියුබාවට සෑම පැයකටම  ඩොලර් 575,683කට වැඩි හානියක් කියුබානු ආර්ථිකයට සිදුවේ.

දශක හයක් පුරා පවතින එක්සත් ජනපද සම්බාධක හේතුවෙන් කියුබාවට සිදුව තිබෙන හානිය ඩොලර් ට්‍රිලියන 1.49 ඉක්මවා ඇති බවද විදෙශ ඇමතිවරයා පෙන්වා දුන්නේය.

කියුබානු විදේශ අමාත්‍යවරයා විසින් ඉදිරිපත් කරන ලද ලේඛනය ඔක්තෝම්බර් මාසයේදී එක්සත් ජාතීන්ගේ ජාතික සභාව වෙත ඉදිරිපත් කිරීමට නියමිතය. ආර්ථිකය මත වොෂින්ටනයේ වටලෑමේ දරුණු බලපෑම් සහ ජනගහනය මත එහි බලපෑම සහ සෞඛ්‍යය, අධ්‍යාපනය සහ ආහාර වැනි අත්‍යවශ්‍ය අංශවල සංවර්ධනය කෙරෙහි බල පැවැත්වෙන ආකාරය එහි විස්තර කරයි.

එක්සත් ජනපද ආණ්ඩුව විසින් පනවන ලද සම්බාධක මගින් දැඩි ලෙස සීමා කර ඇති කියුබාවේ විදේශ වෙළඳාම සහ ජාත්‍යන්තර මූල්‍ය සබඳතා කෙරෙහි වන අනිසි බලපෑම් ද වාර්තාව මගින් දැඩි ලෙස හෙලා දකී.

US blockade causes millions of dollars in losses for Cuba