විහාරමහාදේවි උද්‍යාන විරෝධතාව: නීති කැඩූ සහ නිලධාරීන්ගේ රාජකාරියට බාධා කළ අය වහාම අත්අඩංගුවට ගැනීමට කුරුඳුවත්ත පොලිසියට නියෝග..

Nov 4, 2026 at 01:09 PM

|

Lanka Leader

සිරදඬුවම් නියම වී සිටින ගලගොඩඅත්තේ ඥානසාර හිමියන් නිදහස් කරන ලෙස බලකරමින් විහාරමහාදේවි උද්‍යාන පරිශ්‍රයේ පැවැති විරෝධතාවයේදී නීත්‍යානුකූල බලපත්‍රයක් නොමැතිව ශබ්ද විකාශන යන්ත්‍රයක් භාවිත කළැයි කියන සැකකරුවන් වහාම අත්අඩංගුවට ගන්නා ලෙස කොළඹ අතිරේක මහේස්ත්‍රාත් ලහිරු සිල්වා මහතා කුරුඳුවත්ත පොලිසියට නියෝග කළේය.

එමෙන්ම එම විරෝධතාවයේදී විහාරමහා දේවි උද්‍යානයේ එල්ලා තිබූ බැනර් සහ පෝස්ටර් ගලවා ඉවත් කිරීම සඳහා එම ස්ථානයට ගිය කොළඹ මහ නගර සභාවේ නිලධාරීන් සහ උද්‍යාන භාර නිලධාරීගේ රාජකාරියට බාධා කර අවහිර කළ පුද්ගලයින් ද වහාම අත්අඩංගුවට ගන්නා ලෙස ද අධිකරණයෙන් කුරුදුවත්ත පොලිසියට තවත් නියෝගයක් නිකුත් කෙරුණි.

මෙම විරෝධතාව සම්බන්ධයෙන් කුරුදුවත්ත පොලිසිය අධිකරණයට ඉදිරිපත් කර තිබූ පැමිණිලි දෙකක් සැලකිල්ලට ගත් අධිකරණය මෙම නියෝග නිකුත් කළේය.

කුරුඳුවත්ත පොලිස් ස්ථානාධිපති ප්‍රධාන පොලිස් පරීක්ෂක සාගර දයාරත්න මෙම පැමිණිලි දෙක අධිකරණයට ඉදිරිපත් කර තිබුණි.

පැමිණිල්ල වෙනුවෙන් අධිකරණයේ පෙනී සිටි කුරුඳුවත්ත පොලිසියේ නිලධාරීන් කරුණු දක්වමින් කියා සිටියේ, විහාරමහාදේවි උද්‍යානයේ රැඳී සිටින ස්වාමීන්වහන්සේ සහ සිවිල් ක්‍රියාකාරීන් අධිකරණ නියෝග නොතකමින් අඛණ්ඩව විරෝධතාවයේ නිරත වූ අතර එම විරෝධතාව අතරතුර කිසිදු නීත්‍යානුකූල අවසරයක් හෝ බලපත්‍රයක් නොමැතිව ශබ්ද විකාශන යන්ත්‍රයක් භාවිත කර ඇති බවයි.

එමෙන්ම අනෙක් පැමිණිල්ල අධිකරණයට ඉදිරිපත් කරමින් එම නිලධාරීන් කියා සිටියේ අදාල දිනයේදී නීතිවිරෝධීව විහාරමහාදේවී උද්‍යානයේ එල්ලා තිබූ බැනර් සහ පෝස්ටර් මෙන්ම කටවුට් ගලවා ඉවත් කිරීම සදහා එම ස්ථානයට ගිය කොළඹ නගර සභාවේ නිලධාරීන්ට සහ උද්‍යාන භාර නිලධාරීන්ට උද්ඝෝෂණයේ යෙදී සිටි අයවලුන් අවහිර කර ඔවුන්ගේ රාජකාරියට බාධා කර ඇති බවයි.

ඒ අනුව අදාල සිද්ධියේ සී සී ටී වී දර්ශන සහ වීඩියෝ දර්ශන පරීක්ෂා කර බලා රාජ්‍ය නිලධාරීන්ගේ රාජකාරියට බාධා කළ අයවලුන් ද වහාම අත්අඩංගුවට ගෙන අධිකරණයට ඉදිරපත් කරන ලෙසයි මෙහිදී අධිකරණය කුරුදුවත්ත පොලිසියට නියෝග නිකුත් කළේ.

ඒ අනුව පැමිණිලි දෙක සම්බන්ධයෙන්ම වහාම ක්‍රියාත්මක වී සැකකරුවන් අත්අඩංගුවට ගෙන අධිකරණයට ඉදිරිපත් කරන ලෙසයි මහේස්ත්‍රාත්වරයා සිය නියෝගවලින් දක්වා තිබුණේ.

එමෙන්ම එම විරෝධතාව සම්බන්ධයෙන් කුරුදුවත්ත පොලිසිය අධිකරණයෙන් ලබාගත් අතුරු ආඥාව සම්බන්ධ පැමිණිල්ල අද (04) අවසන් කිරීමට ද අධිකරණයෙන් නියෝග නිකුත් විය.

ඒ, එම විරෝධතාව මේ වන විට අවසන් වී ඇති බවට කුරුදුවත්ත පොලිසිය අධිකරණයට කළ කරුණු සැලකිල්ලට ගනිමින්.