මෝදිගේ සමීපතමයෙක් වන අමිත් ෂා ට එරෙහිව කැනඩාවෙන් කුමන්ත්‍රණ චෝදනාවක්

Oct 31, 2024 at 09:49 AM

|

Lanka Leader

අග්‍රාමාත්‍ය නරේන්ද්‍ර මෝදිගේ සමීපතමයකු ලෙස සැළකෙන දැඩි හින්දු භක්තිකයෙකු වන ඉන්දීය රජයේ ස්වදේශ කටයුතු අමාත්‍ය අමිත් ෂාට එරෙහිව කැනේඩියානු රජයෙන් චෝදනාවක් එල්ල කර තිබේ.

ඒ, කැනඩාවේදී සීක් බෙදුම්වාදීන් ඉලක්ක කරගැනීමේ කුමන්ත්‍රණ පිටුපස අමිත් ෂා සිටින බවට යි.

කෙසේවෙතත්, කැනඩාවේ චෝදනා පදනම් විරහිත බව පවසන ඉන්දීය රජය ඒවා ප්‍රතික්ෂේප කර ඇත.

වොෂින්ටන් පෝස්ට් පුවත්පත වාර්තා කර ඇත්තේ, කැනඩාවේ සීක් බෙදුම්වාදීන් ඉලක්ක කරගනිමින් ප්‍රචණ්ඩත්වය සහ බිය ගැන්වීමේ ව්‍යාපාරයක් පිටුපස අමිත් ෂා සිටින බව කැනේඩියානු නිලධාරීන් චෝදනා කළ බවයි.

ඉන්දියාව සීක් බෙදුම්වාදීන් ‘ත්‍රස්තවාදීන්’ ලෙස හඳුන්වන අතර එම බෙදුම්වාදීන් ‍රටේ ආරක්ෂාවට තර්ජනයක් බව ද පවසයි.

සීක් බෙදුම්වාදීන් ඉන්දිය භූමියෙන් වෙන් කර ඛලිස්තානය නමින් හැඳින්වෙන ස්වාධීන නිජබිමක් ඉල්ලා සිටියි.

ඒ සම්බන්ධයෙන් 1980 සහ 1990 දශකවලදී ඇති වූ කැරැල්ලකින් පුද්ගලයන් දසදහස් ගණනක් මිය ගියහ.

සීක් බෙදුම්වාදීන් පළවාහැරීම සඳහා ශුද්ධ වූ සික් කෝවිලට පහරදෙන ලෙස ආරක්ෂක හමුදාවන්ට නියෝග කිරීමෙන් පසුව ඉන්දියාවේ එවක අග්‍රාමාත්‍ය ඉන්දිරා ගාන්ධි ඇයගේ ආරක්ෂාවට සිටි සීක් ආරක්ෂකයන් විසින්ම ඝාතනය කිරීමෙන් පසු, 1984 දි ඉන්දියාවේ සීක් විරෝධී කෝලාහල ආරම්භ වූ අතර ඉන් දහස් ගණනක් මියගියේය.

ඉන් අනතුරුව 2023 දී කැනඩාවේදී සීක් බෙදුම්වාදී නායක හර්දීප් සිං නිජ්ජාර් ඝාතනයට ලක්වූ අතර එම සිදුවීමට සම්බන්ධ කරමින් කැනඩාව ඉකුත් ඔක්තෝබර් මාසයේදී කැනඩාවේ සිටි ඉන්දීය රාජ්‍යතාන්ත්‍රිකයන් නෙරපාහරින ලදී.

එයට එකටඑක කිරීමක් ලෙස ඉන්දීය රජය විසින් ද කැනේඩියානු රාජ්‍ය තාන්ත්‍රිකයන් නෙරපාහරින ලදී.

මෙම අර්බුදය ඉන්දියාව සහ කැනඩාව අතර රාජ්‍යතාන්ත්‍රික සබඳතා සඳහා දැඩි බලපෑම් එල්ල කර ඇති අතර, කැනේඩියානු අග්‍රාමාත්‍ය ජස්ටින් ටෘඩෝගේ ඉන්දීය විරෝධී ප්‍රතිපත්තිය හේතුවෙන් ඔහුගේ පාලක පක්ෂයේ නායකත්වය සම්බන්ධයෙන් ද විරෝධතා මතුවෙමින් ඇත.

-ceylonwire