සුපිරි ක්‍රීඩකයාගේ බිරිඳ සීගිරියේ ඉඩම් ජාවාරමක.. වසර 5ක් ගතවී ඇතත් සීඅයිඩී වාර්තාවක් නෑ..

Oct 27, 2026 at 10:27 AM

|

Lanka Leader

ලෝක පූජිත ශ්‍රී ලංකික ක්‍රීඩකයෙකුගේ බිරිඳක් විසින් ඓතිහාසික සීගිරිය ආසන්නයේ පිහිටි වටිනා රජයේ ඉඩමක් කූට ලේඛන මඟින් වංචනික ලෙස අත්පත් කරගැනීමේ සිද්ධියට අදාළ පරීක්ෂණ වාර්තාව වසර පහක කාලයක් ගතවී ඇතත් අපරාධ පරීක්ෂණ දෙපාර්තමේන්තුව මඟින් මෙතෙක් ලබා දී නොමැති බව දඹුල්ල ප්‍රාදේශීය ලේකම් කාර්යාලය අනාවරණය කරයි. 

දඹුල්ල ප්‍රදේශයේ මාධ්‍යවේදී කාංචන කුමාර ආරියදාස මහතා විසින් තොරතුරු දැනගැනීමේ අයිතිවාසිකම් පිළිබඳ පනත යටතේ සිදුකරන ලද විමසීමකට ප්‍රතිචාර දක්වමින් මෙම තොරතුරු හෙළි වී තිබේ.

සීගිරිය ආශ්‍රිත ප්‍රදේශයේ දිළිඳු සහ අඩු ආදායම්ලාභී පවුල් වෙත බෙදාදීමට වෙන් කර තිබූ මෙම රජයේ ඉඩම, සුපිරි ක්‍රීඩකයාගේ බිරිඳ විසින් තමන්ද අඩු ආදායම්ලාභිනියක ලෙස ව්‍යාජව පෙන්වා දෙමින්, ව්‍යාජ ජාතික හැඳුනුම්පත් අංක සහ කූට පදිංචි සහතික ඉදිරිපත් කරමින් 2021 වසරේදී අත්පත් කරගෙන ඇත. 

මෙම අක්‍රමිකතාව සම්බන්ධයෙන් සිදුකළ ප්‍රාථමික විමර්ශනවලදී, කූට ලේඛන සකස් කිරීමට හා වැරදි තොරතුරු සැපයීමට ආධාර අනුබල දුන් බවට තහවුරු වූ දඹුල්ල ප්‍රාදේශීය ලේකම් කාර්යාලයට අනුයුක්ත ග්‍රාම නිලධාරීවරයෙකුගේ සේවයද ඒ දිනවලම තහනම් කිරීමට පියවර ගැනිණි.

පසුව, රජයේ ඉඩම් වංචා කිරීමේ මෙම බරපතළ සිදුවීම පිළිබඳව තොරතුරු පනත යටතේ 2021 මාර්තු 22 වන දින කරන ලද විමසීමකට පිළිතුරු දෙමින් දඹුල්ල ප්‍රාදේශීය ලේකම් කාර්යාලය දන්වා ඇත්තේ අදාළ සියලු විමර්ශන ලිපිගොනු අපරාධ පරීක්ෂණ දෙපාර්තමේන්තුව වෙත භාරදුන් බවයි. 

කෙසේ වෙතත්, එම සිදුවීමට වසර පහක් සපිරුණු පසුබිමක පසුගිය වසරේ නොවැම්බර් 20 වැනිදා යළිත් තොරතුරු පනත යටතේ කළ විමසීමේදී ප්‍රාදේශීය ලේකම් කාර්යාලය සඳහන් කර ඇත්තේ, ඉඩම් පැවරීමට අදාළ දීමනා පත්‍ර තුනෙහි මුල් පිටපත් 2025 නොවැම්බර් 13 වැනිදා අපරාධ පරීක්ෂණ දෙපාර්තමේන්තුවේ විමර්ශන ඒකකයේ ස්ථානාධිපතිවරයා වෙත භාරදුන් නමුත්, එම පරීක්ෂණවල අවසන් වාර්තාව මෙතෙක් ලැබී නොමැති බවයි.