ටෙස්ලා සමාගමේ ප්‍රධාන විධායක නිලධාරී මෙන්ම අමෙරිකානු ව්‍යාපාරිකයකු සහ ලොව අංක එකේ ධනවතා වන එලොන් මස්ක් මෙතෙක් ලොව සිටි ධනවත්ම පුද්ගලයා ලෙස සුප්‍රකට ෆෝබ්ස් සඟරාව මගින් නිල වශයෙන් ප්‍රකාශයට පත්කර තිබේ.

එම සඟරාවට අනුව මේවනවිට මස්ක්ගේ ශුද්ධ වත්කම අමෙරිකානු ඩොලර් බිලියන 334.3 කි.

අමෙරිකානු ජනාධිපතිවරණයෙන් ඩොනල්ඩ් ට්‍රම්ප් ජයග්‍රහණය කිරීමෙන් පසු මස්ක් හිමිකාරීත්වය දරන විද්‍යුත් වාහන සමාගමක් වන ටෙස්ලා හි කොටස් ඉහළ යෑමත් සමඟ ඔහු තවදුරටත් වාර්තා තබමින් මෑත ඉතිහාසයේ සිටින ලොව ධනවත්ම පුද්ගලයා බවට පත්ව ඇතැයි පැවසේ.

ඉකුත් ජනාධිපතිවරණ ප්‍රචාරක සමයේදී ට්‍රප්ම්ගේ ප්‍රභල පාක්ෂිකයකු ලෙස පෙනීසිටි මස්ක්, ට්‍රම්ප්ගේ ඇතැම් ප්‍රචාරක රැලිවලට පවා සහභාගි වෙමින් ඔහුගේ විශාලතම ආධාරකරු විය.

ඔහු අමෙරිකානු නව ‘රජයේ කාර්යක්ෂමතා දෙපාර්තමේන්තුව’ (DOGE) හි සභාපතිවරයා ලෙස පත්කර ඇත.

Forbes සඟරාවට අනුව, ඉකුත් සිකුරාදා වනවිට මස්ක්ගේ ශුද්ධ වතකම වාර්තාගත ලෙස ඩොලර් බිලියන 321.7 ක් විය.

නොවැම්බර් 22 වනවිට, ටෙස්ලා සමාගමේ කොටස් 3.8% කින් ඩොලර් බිලියන 7 ක වර්ධනයක් ලබාගනිමින් නව වසර 3.5 ක අවසන් ඉහළම අගය වන කොටසකට ඩොලර් 352.56 ක් ලෙස සටහන් විය.

මස්ක්ගේ ශුද්ධ වත්කම අනුව ඔහු දැන් ලොව දෙවැනි ධනවත්ම පුද්ගලයාට වඩා ඩොලර් බිලියන 80 කට වඩා ඉදිරියෙන් සිටින බව පැවසේ.

ඒ ඔරකල් සභාපති ලැරී එලිසන් වන අතර ෆෝබ්ස් සගරාවට අනුව ඔහුගේ වත්කම අමෙරිකානු ඩොලර් බිලියන 235 කි.

මස්ක්ගේ ධනයෙන් වැඩි ප්‍රමාණයක් පැමිණෙන්නේ ඔහුගේ ටෙස්ලා හි ඩොලර් බිලියන 145 ක් වටිනා 13% ක කොටස්වලින් බව පැවසේ.

- ceylonwire