බැර ලෝහ අඩංගු අධික විෂ සහල් මෙට්‍රික් ටොන් 596,440ක් ගෙන්නලා - පළිබෝධ නාශක රෙජිස්ට්‍රාල් කාර්යාල පර්යේෂණයකදී හෙළිවෙයි

Sep 17, 2022 at 11:22 AM

|

Lanka Leader

මෙරට මිනිස් පරිභෝජනය සඳහා ආනයනය කරන සහල්වල බැර ලෝහ වර්ග අධිකව පවතින බවත්, වකුගඩු රෝග, පිළිකා, අඩුබර දරු උපත් වැනි රෝග ගණනාවකට හේතුවක් වන බවත් එම සහල් සාම්පල් යොදාගෙන පළිබෝධ නාශක රෙජිස්ට්‍රාල් කාර්යාලය සිදුකරන ලද විශ්ලේෂණයක දී තොරතුරු අනාවරණය වී තිබේ.

මේ බව අනාවරණය වී තිබෙන්නේ ලක්ෂය 350ක් පමණ වටිනාකමින් යුත් CP-MS නමැති යන්ත්‍රය යොදාගෙන කරන ලද පර්යේෂණ ක්‍රමවේදයකට අනුව නිකුත් කරන ලද පර්යේෂණ වාර්තාවකිනි.

පළිබෝධ නාශක රෙජිස්ට්‍රාල් කාර්යාලය මඟින් ප්‍රකාශයට පත්කර ඇති වාර්තාවට අනුව බැරලෝහ වශයෙන් හාල්වල අඩංගු විය යුත්තේ ආසනික් 0.2, කැඩ්මියම් 0.2ක්, ඊයම් 0.2ක් සහ මර්කරි (රසදිය) 0.1ක් සහ සෙලෙනියම් 0.3ක ප්‍රමාණයකි. මේ ප්‍රමාණය අඩංගු හාල් පරිභෝජනයට සුදුසු අතර මෙරටට ආනයනය කරන සහල්වල මෙම ප්රාමාණයන් ඉතා වැඩි බව වාර්තා වී තිබේ.

මෙරටට ආනයනය කරන සහල් සාම්පල් විශ්ලේෂණය භාරව කටයුතු කරන පර්යේෂණ නිලධාරිනියක් විසින් එම සහල්වල අයන ඉවත් කරන ලද වතුර ඉවත් කර හාල් සාම්පල් කුඩුකර ග්රෑම් 0.2ක ප්‍රමාණයක් නයිට්‍රජන්, හයිඩ්‍රෝක්ලෝරික් ඇසිඩ් හා හයිඩ්‍රජන් පෙරොක්සයිඩ් දමා ජීරණය කර ලබාගත් පර්යේෂණයට අනුව එම හාල්වල ඊයම් 43%ක්, කැඩ්මියම් 26%ක්, මර්කරි (රසදිය) 20%ක්, සෙලනියම් විෂ කාරකය 47%ක් පවතින බව අනාවරණය කර තිබේ.

මෙම විෂ කාරක ශරීරයට සම්පූර්ණයෙන්ම අහිතකර වන අතර ඒවා ශරීරගත වීමෙන් වකුගඩු රෝග, පිළිකා, අඩුබර දරු උපත්, මොළය නිසි ලෙස වර්ධනය නොවීම ඇතුළු රෝග ගණනාවකට හේතුවන බව සෞඛ්‍ය අංශ පෙන්වා දෙයි.

2022 ජනවාරි සිට අගෝස්තු මාසය අවසන් වන විට මෙරටට හාල් මෙට්‍රික් ටොන් 5,96,440ක් ආනයනය කර ඇති අතර ඒ සඳහා වැය කර තිබෙන මුදල රුපියල් මිලියන 64,591කි.