බටහිර ආයුධ කර්මාන්තය අධික පිරිවැය නිසා කඩාවැටේ.. ඇමරිකාවේ ගෝලීය ආරක්ෂක ජාලය බිඳවැටිලා..

Mar 9, 2026 at 08:56 AM

|

Lanka Leader

බටහිර මාධ්‍ය කොතරම් වර්ණනා කළත්, යුධ පිටියේ සැබෑ තත්ත්වය ඊට වඩා හාත්පසින්ම වෙනස්ය. ලෝකයේ දියුණුම මිසයිල නාශක පද්ධතියක් ලෙස සැලකෙන "THAAD" පද්ධතියේ රේඩාර් යන්ත්‍ර ඉරාන ප්‍රහාර හමුවේ විනාශ වී ඇති බව වාර්තා වේ. 

ජෝර්දානයේ සහ එක්සත් අරාබි එමීර් රාජ්‍යයේ ස්ථාපිත කර තිබූ මෙම රේඩාර් පද්ධති විනාශ වීමත් සමඟ ඊශ්‍රායලය වෙත එල්ල වන ප්‍රහාර හඳුනා ගැනීමට ඇති කාලය "මිනිත්තු කිහිපයක්" දක්වා සීමා වී තිබේ.

මෙහි ඇති පුදුමයට කරුණ නම්, ඩොලර් බිලියන ගණනක් වටිනා මෙම රේඩාර් පද්ධති විනාශ කිරීමට ඉරානය භාවිතා කර ඇත්තේ ඉතා අඩු පිරිවැයකින් නිෂ්පාදනය කළ හැකි 'ෂහීඩ්' වර්ගයේ ඩ්‍රෝන යානා වීමයි. 

මේවා පියාසර කරන විට මෝටර් බයිසිකලයක ශබ්දයට සමාන ශබ්දයක් නිකුත් කරන තරමට සරල තාක්ෂණයක් සහිත වුවත්, ඒවා හඳුනාගෙන විනාශ කිරීමට ඇමරිකානු "Patriot" පද්ධති අසමත් වී ඇත. 

එක් මිසයිලයක් බිම හෙළීමට ඩොලර් මිලියන ගණනක් වටිනා "Patriot මිසයිල" 11 ක් පමණ එකවර මුදා හැරියත්, ඉලක්කය සපුරා ගැනීමට නොහැකි වූ අවස්ථා ද පසුගිය දිනවල දක්නට ලැබුණි!

ඇමරිකානු ආරක්ෂක කර්මාන්තය මුහුණ දී සිටින ලොකුම ගැටලුව වන්නේ මිසයිල නිෂ්පාදනය කිරීමේ වේගයයි. වර්තමානයේ ඇමරිකාවට මසකට නිෂ්පාදනය කළ හැක්කේ 'THAAD' මිසයිල 10 ක් සහ "Patriot" මිසයිල 35-40 ක් වැනි සුළු ප්‍රමාණයකි. 

නමුත් යුධ පිටියේදී දිනකට මෙවැනි මිසයිල විශාල ප්‍රමාණයක් වැය වේ. ඇමරිකාව ලෝකයට පෙන්වන්නේ තමන් ලෝකයේ විශාලතම ආර්ථිකය සහ නිෂ්පාදන බලවතා බවයි. නමුත් මැදපෙරදිග යුද්ධය ආරම්භ වූ විට හෙළි වූයේ ඔවුන්ගේ "පේට්‍රියට්" වැනි නවීන මිසයිල නිපදවන්නේ ඉතා සෙමින්, බොහෝ දුරට අතින් එනම් "Hand assembled" ලෙස බවයි. 

මෙයට හේතුව එම සමාගම් ලාභය වැඩි කරගැනීම සඳහා නිෂ්පාදන ක්‍රියාවලිය ස්වයංක්‍රීය කිරීමට ආයෝජනය නොකිරීමයි. යුද්ධයේදී මිසයිල සිය ගණනින් වැය වන විට, ඇමරිකානු කර්මාන්තශාලා වලට ඒවා සැපයීමට නොහැකි විය.  

ආයුධවල මිල ඉහළ දැමීමට කොන්ත්‍රාත්කරුවන් කළ කපටි උපාය අවසානයේදී ඇමරිකානු හමුදාව යුධ පිටියේදී අසරණ වීමට ප්‍රධාන හේතුව විය. මෙහි ප්‍රතිඵලයක් ලෙස ඇමරිකාවට දැන් සිදුව ඇත්තේ දකුණු කොරියාව සහ තායිවානය වැනි රටවල ස්ථාපිත කර ඇති මිසයිල පද්ධති පවා, මැදපෙරදිගට ගෙන්වා ගැනීමටයි. මෙය ඇමරිකාවේ ගෝලීය ආරක්ෂක ජාලය දුර්වල වීමක් ලෙස හැඳින්විය හැකිය.

මෙම ගැටුමේ වඩාත්ම සංකීර්ණ සහ තීරණාත්මක පැත්ත වන්නේ රුසියාවේ මැදිහත්වීමයි. රුසියාව සහ ඉරානය අතර ඇති වෙමින් පවතින යුධමය සහයෝගීතාවය ඇමරිකාව දැඩි තිගැස්මකට පත් කර තිබේ. 

රුසියාව විසින් ඉරානය වෙත සිය දියුණුම රේඩාර් තාක්ෂණය, Mig-29 සහ Su-35 වැනි ප්‍රහාරක යානා මෙන්ම S-400 මිසයිල ආරක්ෂක පද්ධති ලබා දී ඇති බව වාර්තා වේ. විශේෂයෙන්ම ඇමරිකානු චන්ද්‍රිකා සහ නිරීක්ෂණ පද්ධති මඟහරවා ගනිමින් ඉලක්ක ලබා දීමට රුසියානු බුද්ධි තොරතුරු ඉරානයට විශාල ශක්තියක් වී ඇත. 

මෙය එක් අතකින් යුක්රේන යුද්ධයේදී ඇමරිකාව ක්‍රියා කළ ආකාරයට රුසියාව විසින් දෙන ලද "ප්‍රතිචාරයක්" ලෙසද සැලකිය හැකිය. "ඔබ අපේ සතුරන්ට උදව් කරන්නේ නම්, අපි ඔබේ සතුරන්ට උදව් කරන්නෙමු" යන පණිවිඩය රුසියාව ප්‍රායෝගිකව පෙන්වා දී තිබේ.

යුද්ධය හුදෙක් වෙඩි උණ්ඩ වලට පමණක් සීමා නොවේ. එය ලෝක ආර්ථිකයටද දැඩි බලපෑමක් එල්ල කරයි. මේ වන විට බොරතෙල් බැරලයක මිල ඩොලර් 90 සීමාව ඉක්මවා ගොස් ඇති අතර, මෙය තවදුරටත් ඉහළ යාමේ අවදානමක් පවතී. 

ලෝකයේ තෙල් සැපයුමෙන් 20% ක් පමණ ගමන් කරන්නේ 'හෝමූස්' සමුද්‍ර සන්ධිය හරහාය. ඉරානය විසින් මෙම කලාපයේ නාවික ගමනාගමනයට බාධා කළහොත් සමස්ත ලෝකයම බලශක්ති අර්බුදයකට මුහුණ දෙනු ඇත.

විශේෂයෙන්ම යුරෝපය මේ සම්බන්ධයෙන් දැඩි අවදානමක පසුවේ. ඔවුන් රුසියානු ගෑස් ප්‍රතික්ෂේප කර කටාර් රාජ්‍යයෙන් ගෑස් ලබා ගැනීමට උත්සාහ කළත්, වර්තමාන යුධ තත්ත්වය හමුවේ කටාර්හි ගෑස් නිෂ්පාදන මධ්‍යස්ථාන පවා අඩපණ වී ඇත. මෙහි ප්‍රතිඵලය වන්නේ යුරෝපයේ කර්මාන්ත ශාලා වැසී යාම සහ ජන ජීවිතය අතිශය දුෂ්කර වීමයි.

අප වැනි කුඩා රටකට ලෝක බලවතුන්ගේ මෙම ගැටුම් ඈත සිදුවීම් ලෙස පෙනුනත්, එහි බලපෑම සෘජුවම අපේ මුළුතැන්ගෙයට පවා දැනේ. ඉන්ධන මිල ඉහළ යාම, භාණ්ඩ හිඟය සහ ගෝලීය උද්ධමනය මේ සියල්ලේ ප්‍රතිඵල වේ. එහෙත් මෙහි ඇති වැදගත්ම පාඩම වන්නේ, ලෝකය දැන් තනි බලවතෙකුට යටත් නොවන ලෝකයක් කරා ගමන් කරමින් සිටින බවයි.

වර්තමාන යුධ පිටියේ ඇමරිකානු සහ ඊශ්‍රායල ප්‍රහාරක යානා ඉරානයේ ගුවන් පථ ඉලක්ක කරගෙන ප්‍රහාර එල්ල කරන විට එක් අපූරු සිදුවීමක් වාර්තා විය. චන්ද්‍රිකා සහ රේඩාර් මඟින් ලබාගත් දත්ත වලට අනුව, ගුවන් පථවල ප්‍රහාරක හෙලිකොප්ටර් යානා පෙළට නවතා තිබෙනු දිස් විය. ඇමරිකානු මිසයිල ඉතා නිවැරදිව මෙම "යානා" මතට පතිත විය.

නමුත් ප්‍රහාරයෙන් පසු ලබාගත් ඡායාරූප පරීක්ෂා කිරීමේදී හෙළි වූයේ පුදුම සහගත කරුණකි. එහි තිබී ඇත්තේ සැබෑ හෙලිකොප්ටර් නොව, ගුවන් පථය මත ඉතා සූක්ෂ්ම ලෙස ඇඳ තිබූ ත්‍රිමාණ හෙවත් 3D චිත්‍ර සමූහයකි. ඩොලර් මිලියන ගණනක් වටිනා අධි-තාක්ෂණික මිසයිල අවසානයේදී පුපුරා ගොස් තිබුණේ කොන්ක්‍රීට් පොළොව මත ඇඳි තීන්ත චිත්‍ර මතය. 

මෙය අපට පෙන්වා දෙන්නේ තාක්ෂණය කොතරම් දියුණු වුවත්, මිනිස් බුද්ධිය සහ සරල රැවටීම් උපක්‍රම හමුවේ එය තවමත් පරාජය කළ හැකි බවයි.

ඇමරිකානු නාවික හමුදාව සතු දැවැන්ත ගුවන් යානා වාහක නෞකා සහ 'Destroyers' යනු සාගරයේ පාවෙන බලකොටු වැනිය. ඒවායේ ඇති මිසයිල සහ රේඩාර් පද්ධති වලට සැතපුම් සිය ගණනක් ඈතින් එන සතුරු ඉලක්ක විනාශ කළ හැකිය. 

නමුත් ඉරානය මෙයට පිළියමක් ලෙස භාවිතා කළේ ඉතා සරල උපක්‍රමයකි. ඔවුන් රුපියල් ලක්ෂ කිහිපයක් පමණක් වටිනා ඉතා වේගවත් කුඩා බෝට්ටු සිය ගණනක් එකවර මුදා හැරීමට පුරුදු විය. මෙම බෝට්ටු මත සාමාන්‍ය මිසයිල හෝ මැෂින් තුවක්කු සවිකර තිබේ. 

දැවැන්ත නෞකාවකට එකවර ඉලක්ක කරගත හැක්කේ සීමිත ඉලක්ක ප්‍රමාණයකි. නමුත් මී මැසි රංචුවක් මෙන් සෑම පැත්තකින්ම වේගයෙන් ඇදී එන කුඩා බෝට්ටු සියයක් පාලනය කිරීම එම දැවැන්ත නෞකා වලට අසීරු විය. බිලියන ගණනක් වටිනා නෞකාවක්, සාමාන්‍ය ධීවර බෝට්ටු වැනි කුඩා යාත්‍රා සමූහයක් හමුවේ පසුබැසීමට සිදුවීම තාක්ෂණයේ බලයට එල්ල වූ තදබල පහරකි.

ඇමරිකානු ගුවන් හමුදාව ලෝකයේ ඕනෑම තැනක ඇති ඉලක්කයක් අහසේ සිට විනාශ කිරීමට සමත් "ස්මාර්ට් බෝම්බ" භාවිතා කරයි. ඔවුන් සිතුවේ ඉරානයේ මිසයිල ගබඩා සහ විදින යන්ත්‍ර අහසේ සිට පහසුවෙන් විනාශ කළ හැකි බවයි. 

නමුත් ඉරානය සියුම් උපක්‍රමයක් ලෙස සියලුම වැදගත් යුධ උපකරණ අඩි සිය ගණනක් පොළොව යට සහ කඳුකරයේ ගැඹුරු ගුහාවල තැන්පත් කළේය. ඔවුන් මෙය හඳුන්වන්නේ "මිසයිල නගර" ලෙසයි.

කඳුකරයේ සැඟවී ඇති මෙම මධ්‍යස්ථාන සොයා ගැනීමට ඇමරිකානු චන්ද්‍රිකා වලට පවා අපහසු වී තිබේ. ඉරාන හමුදාව කරන්නේ මිසයිල විදින රථ උමං මාර්ග හරහා පිටතට ගෙන විනාඩි කිහිපයකින් මිසයිල මුදා හැර, ඇමරිකානු යානා පැමිණීමට පෙර නැවතත් උමං තුළට ගෙන ගොස් සැඟවීමයි. අති නවීන ගුවන් බලය හමුවේ වුවද "පොළොව යට සැඟවී සිට පහර දීම" වැනි පැරණි සරල උපක්‍රමයන් තවමත් සාර්ථක වී ඇත.

බටහිර රටවල් ඉරානයට සහ රුසියාවට එරෙහිව පැනවූ ලොකුම තහනම වූයේ නවීන පරිගණක චිප්ස් ලබා නොදීමයි. නවීන මිසයිල සහ ඩ්‍රෝන නිපදවීමට මෙම චිප්ස් අත්‍යවශ්‍ය යැයි ඔවුන් සිතූහ. 

නමුත් එම රටවල් කළේ ඉතා පුදුම සහගත දෙයකි. ඔවුන් සාමාන්‍ය රෙදි සෝදන යන්ත්‍ර , ශීතකරණ සහ ස්මාර්ට් ජංගම දුරකථනවල ඇති සරල චිප්ස් ගලවා ඒවා සිය යුධ උපකරණ සඳහා භාවිතා කිරීමට පටන් ගත්හ.

ඇමරිකාව සිතුවේ මෙම "සරල චිප්ස්" වලින් සාදන ආයුධ අසාර්ථක වනු ඇති බවයි. නමුත් ඉරාන ඩ්‍රෝන යානා පරීක්ෂා කිරීමේදී හෙළි වූයේ ඒවා තුළ තිබුණේ අප නිවෙස්වල භාවිතා කරන උපකරණවල ඇති සරල තාක්ෂණය බවයි. ඩොලර් දහස් ගණනක් වටිනා මිල අධික චිප්ස් වෙනුවට, වෙළඳපොලේ ඇති සාමාන්‍ය උපාංග වලින් නිපදවූ මෙම ආයුධ ඇමරිකානු ආරක්ෂක පද්ධති පරාජය කිරීමට සමත් විය. 

ඇමරිකානු රේඩාර් සහ ජෑමර් පද්ධති නිර්මාණය කර ඇත්තේ ගුවන් විදුලි තරංග මගින් පාලනය වන ඩ්‍රෝන යානා අඩපණ කිරීමටයි. සතුරා ඩ්‍රෝන යානයක් එවූ සැනින් එහි සංඥා අවහිර කර එය පාලනයෙන් බැහැර කිරීමට ඇමරිකානු තාක්ෂණයට හැකියාව තිබේ. 

නමුත් මෑතකදී ඉරානය සහ ඔවුන්ගේ හිතවාදී කණ්ඩායම් මේ සඳහා ඉතා පැරණි එහෙත් සාර්ථක උපක්‍රමයක් භාවිතා කළහ. ඔවුන් සිය ඩ්‍රෝන යානා පාලනය කිරීමට ගුවන් විදුලි තරංග වෙනුවට, ඉතා සිහින් 'ෆයිබර් ඔප්ටික්' රැහැනක් භාවිතා කළහ. ඩ්‍රෝන යානය පියාසර කරන විට මෙම නූලක් වැනි රැහැන දිග හැරෙමින් පාලන මධ්‍යස්ථානය සමඟ සෘජුවම සම්බන්ධ වේ. 

රැහැන් හරහා පණිවිඩ යන බැවින් කිසිදු ජෑමර් යන්ත්‍රයකට මෙම ඩ්‍රෝන යානා නතර කළ නොහැකි විය. බිලියන ගණනක් වටිනා ඉලෙක්ට්‍රොනික යුධ උපකරණ, සාමාන්‍ය නූලකින් පාලනය වන ඩ්‍රෝන යානයක් හමුවේ අසරණ වූයේ, ඒ අයුරිනි!

නවීන රේඩාර් පද්ධති සහ මිසයිල නිර්මාණය කර ඇත්තේ ඉතා වේගයෙන් පියාසර කරන ලෝහමය වස්තූන් උදාහරණ ජෙට් යානා හෝ මිසයිල හඳුනාගෙන විනාශ කිරීමටයි. මෙම පද්ධති ඩොලර් මිලියන ගණනක් වටිනා 'ස්මාර්ට්' තාක්ෂණයෙන් යුක්තය. නමුත් ඉරානය සහ ඔවුන්ගේ හිතවාදී කණ්ඩායම් මේ සඳහා ඉතා සරල උපක්‍රමයක් භාවිතා කළහ.

ඔවුන් ඉතා මිල අඩු, ලෝහමය තීන්ත ආලේපනයක් සහිත බැලූන වන "Metallic coated balloons" සිය ගණනක් අහසට මුදා හැරියහ. රේඩාර් පද්ධති වලට සුළගේ ගසා ගෙන එන මෙම බැලූන් පෙනෙන්නේ සතුරු මිසයිල හෝ යානා ලෙසයි. මෙහි ප්‍රතිඵලයක් ලෙස ඊශ්‍රායලයේ සහ ඇමරිකාවේ මිසයිල ආරක්ෂක පද්ධති මෙම හිස් බැලූන් විනාශ කිරීමට සිය මිල අධික මිසයිල මුදා හරින ලදී. 

ඩොලර් මිලියන 6 ක් වටිනා එක් පේට්‍රියට් මිසයිලයකින් විනාශ කළේ ඩොලර් 10 ක් වටිනා බැලූනයකි! 

යුද්ධයකදී ආයුධ වලට වඩා බලවත් වන්නේ ආර්ථිකයයි. ඉරානය විසින් හෝමූස් සමුද්‍ර සන්ධිය අසල යුධ අභ්‍යාස පවත්වන විට, ලෝකයේ විශාලතම නෞකා රක්ෂණ සමාගම් එම කලාපය හරහා යන තෙල් නැව්වල රක්ෂණ ගාස්තු අධික ලෙස ඉහළ දැමූහ. මෙය ඇමරිකානු ආර්ථිකයට එල්ල වූ දැඩි පහරකි.

ඩොනල්ඩ් ට්‍රම්ප් රජය ප්‍රකාශ කළේ තමන් මෙම නැව් වලට ආරක්ෂාව සපයන බවයි. නමුත් රක්ෂණ සමාගම් පැවසුවේ "ඔබ කොතරම් ආරක්ෂාව දුන්නත්, එක සරල ඩ්‍රෝන ප්‍රහාරයකින් නැවක් ගිල්වා දැමුවහොත් අපට බිලියන ගණනක වන්දියක් ගෙවීමට සිදුවන" බවය. 

මෙහිදී ඉරානය කිසිදු වෙඩිල්ලක් පත්තු නොකර, හුදෙක් "තර්ජනයක්" මගින් ලෝක තෙල් වෙළඳපොළ සහ රක්ෂණ ක්ෂේත්‍රය කළඹවා දැමීමට සමත් විය. අති නවීන යුධ නැව් තිබුණද, රක්ෂණ වාරිකය වැනි සරල ආර්ථික සාධකයක් හමුවේ ලෝක බලවතාට පසුබැසීමට සිදුවිය. 

ඇමරිකානු නාවික හමුදාව සතු බිලියන ගණනක් වටිනා නෞකා ඕනෑම මිසයිල ප්‍රහාරයකට මුහුණ දීමට සූදානම්ය. නමුත් හෝමූස් සමුද්‍ර සන්ධිය වැනි පටු මුහුදු තීරයකදී ඔවුන්ට මුහුණ දීමට සිදුවූ ලොකුම අභියෝගය වූයේ සාමාන්‍ය ධීවර බෝට්ටු මගින් මුහුදේ පාවීමට හරින ලද "මුහුදු බෝම්බ" හෙවත් "Sea Mines" ය.

මෙම බෝම්බ ඉතා පැරණි තාක්ෂණයෙන් යුක්ත වුවත්, ඒවා නෞකාවක ගැටුණු සැනින් විශාල විනාශයක් කළ හැකිය. ධීවර බෝට්ටු වලින් රහසිගතව මෙවැනි බෝම්බ සිය ගණනක් මුදා හරින විට, ඇමරිකානු අධි-තාක්ෂණික නෞකා වලට මුහුදේ ගමන් කිරීම අතිශය අවදානම්ය. 

අහසේ සිට එන මිසයිල නැවැත්වීමට සමත් වුවද, දිය යට පාවෙන සරල බෝම්බයක් හඳුනා ගැනීමට එම නෞකා වලට අපහසු ය. මෙය සාගරයේ බලය හුදෙක් තාක්ෂණය මතම රඳා නොපවතින බවට හොඳම නිදසුනකි.

යුද්ධයක් දිගු කාලයක් ඇදී යන විට, වැදගත්ම සාධකය වන්නේ භට පිරිස්වල සැපයුම් ජාලයයි . ඇමරිකානු හමුදාව ඉරාකය සහ සිරියාවේ සිය කඳවුරුවල සිටින භටයන්ට ආහාර සහ අනෙකුත් පහසුකම් සපයන්නේ ඉතා මිල අධික ගුවන් ගමන් සහ රථ පෙළවල් මගිනි.

ඉරාන හිතවාදී කණ්ඩායම් විසින් මෙම සැපයුම් මාර්ග වලට නිරන්තරයෙන් ඩ්‍රෝන ප්‍රහාර එල්ල කරන විට, ඇමරිකානු භටයන්ට අවශ්‍ය ආහාර සහ ඉන්ධන සැපයීම අතිශය දුෂ්කර විය. කඳවුර තුළ කොතරම් නවීන ආයුධ තිබුණත්, ආහාර සහ ජලය නොමැති වූ විට භටයන්ගේ මානසිකත්වය බිඳ වැටේ. ඉරානය මෙහිදී භාවිතා කළේ සතුරාට කෙලින්ම පහර දෙනවා වෙනුවට, ඔවුන්ගේ "බඩට පහර දීමේ" සරල උපක්‍රමයයි. බිලියන ගණනක යුධ අයවැයක් තිබුණද, සරල සැපයුම් ජාලයක් පවත්වා ගැනීමට නොහැකි වීම නිසා, ඇමරිකාවට සිය කඳවුරු වසා දැමීමට පවා සිදුවිය. 

මෙම සරල කතා හරහා ලෝක දේශපාලනයේ සහ යුධ පිටියේ පවතින සැබෑ යථාර්ථය ඔබට පැහැදිලි වනු ඇතැයි මම සිතමි. මේ කතා අපේ ජීවිත වලටත් අදාළය. අපේ දෛනික ජීවිතයත් යුධ පිටියක් වැනිය. අද්වෛත වේදාන්තය උගන්වන්නේ අපේ බොහෝ බිය සහ වේදනාවන් හුදෙක් "මායාවක්" බවයි. ඉරානයේ ත්‍රිමාණ චිත්‍ර වලට රැවටී මිසයිල නාස්ති කළා සේ, අපත් සමාජයේ සම්මතයන් සහ අන් අයගේ මත නමැති චිත්‍ර වලට රැවටී අපේ ශක්තිය නාස්ති කරමු. 

ආතතිය, අධික වැඩ රාජකාරි සහ අනවශ්‍ය සිතුවිලි නමැති "මිසයිල" අපේ මනසට නිරන්තරයෙන් එල්ල වේ. බටහිර ආයුධ කර්මාන්තය අධික පිරිවැය නිසා කඩාවැටුණා සේ, අපත් අපේ ජීවිතය අනවශ්‍ය ලෙස සංකීර්ණ කරගතහොත් අපේ ජීව ශක්තිය නාස්ති වේ. ඒ නිසා ඔබේ ඉලක්ක කරා යාමට ඇති සරලම සහ කාර්යක්ෂම මග සොයන්න. මිල අධික සම්පත් වලට වඩා, ඔබේ නිර්මාණශීලී බුද්ධියට ආයෝජනය කරන්න. ගැටලුවකට මුහුණ දීමේදී, හැමෝම කරන දේ නොව කිසිවෙකු නොසිතන සරල එහෙත් බලවත් විසඳුමක් සොයන්න. තවත් විග්‍රගයකින් හමුවෙමු.

©️ සාගර දියගම