ශ්‍රී ලංකාව ඉටුකළ යුතු කරුණු 16ක් ගැන IMF වාර්තාවක් එළියට

Oct 2, 2023 at 03:11 PM

|

Lanka Leader

ඉදිරි මාස 03ක කාලය තුළ ශ්‍රී ලංකාව ආර්ථිකමය වශයෙන් ප්‍රමුඛත්වය ලබාදී ඉටුකළ යුතු කරුණු 16ක් ඇතුළත් විශ්ලේෂණාත්මක ඇගයීම් වාර්තාවක් ජාත්‍යාන්තර මුල්‍ය අරමුදල විසින් ඉදිරිපත් කර තිබේ.

ජාත්‍යන්තර මුල්‍ය අරමුදලේ නියෝජිතයින් ඉකුත්දා මෙරට තුළ සිදුකළ සංචාරයෙන් පසු නිකුත් කර ඇති මෙම වාර්තාවේ මෙරට මුල්‍ය පාලනයේ සහ කළමනාකරණයේ දුර්වලතා රැසක් ද පෙන්වා දී තිබීම විශේෂත්වයකි.

එහි දක්වා ඇති ප්‍රධාන දුර්වලතාව වන්නේ අයවැය මඟින් ඇස්තමේන්තු කර ඇති ආදායම් එක්රැස් කිරීමට නොහැකිවීමය.

එමෙන්ම වියදම් සීමාවන්ද ඉක්මවා යාම හේතුවෙන් අයවැය පිළිබඳ විශ්වාසනීයත්වය බිඳවැටෙන බවද ජාත්‍යන්තර මුල්‍ය අරමුදල පෙන්වා දී තිබේ.

2014 වසරේ සිට සෑම වසරකම මෙරට ආදායම් ඉලක්ක සැබෑ ආදායම් එක්රැස්කීරිමට වඩා 16.9%ක ඉහළ සාමාන්‍යයකින් යුක්තවන බව මෙම වාර්තාවේ සඳහන් වේ.

එසේම 2019,2020 සහ 2022 වර්ෂවල අයවැයෙන් ඇස්තමේන්තුගත වියදම 6.3%ක සාමාන්‍යයකින් ඉක්මවා ඇති බවද මුල්‍ය අරමුදල පෙන්වා දී ඇත.

මෙලෙස අයවැය පරතරයේ ඉලක්ක සපුරාගත නොහැකිවීම දැවැන්ත ණය හිඟයකට හේතු වී ඇති බව මුල්‍ය අරමුදලේ වාර්තාවේ දැක්වේ.

අදාළ වාර්තාවේ වැඩිදුරටත් සඳහන් වන්නේ අයවැය විශ්වාසනීයත්වයකින් තොරවීම දූෂණ අවදානම ඉහළ නංවා ඇති අතර එම විශ්වාසනීයත්වය ඉහළ නැංවීම සඳහා නිසි ආදායම් පුරෝකතනයක් සිදුකළ හැකි මධ්‍යකාලීන මුල්‍ය යාන්ත්‍රණයක් සකස් කළ යුතු බවය.

තිරසාර ආදායම් ජනනයක් සඳහා බදු ප්‍රතිපත්තියේ මුලික වෙනස්කම් රැසක් සිදුකළ යුතුව ඇතිබවත්, සියලු බදුවලට අදාළව බදු පරිපාලන පනතක් ක්‍රියාවට නැංවීමටත් එමඟින් බදු ගෙවීම් පැහැර හරින්නන් සහ අල්ලස් ලබාගන්නා බදු නිලධාරීන්ට අපරාධ චෝදනා ගොනුකිරීම ඇතුළු දැඩි දඬුවම් පමුණුවීමට හැකි ආකාරයේ වගන්ති ඊට ඇතුළත්විය යුතු බවත් ජාත්‍යාන්තර මුල්‍ය අරමුදල පවසා තිබේ.