සිගරට් බදු වැඩි කිරීමෙන් සිගරට් සමාගම්වලට මිලියන 7,000ක අමතර ලාභයක්

Jan 15, 2025 at 10:13 AM

|

Lanka Leader

දුම්වැටි බදු වැඩි කිරීමේ වාසිය දුම්වැටි කර්මාන්තය අත්කරගෙන ඇතැයි මද්‍යසාර සහ මත්ද්‍රව්‍ය තොරතුරු මධ්‍යස්ථානය (ඇඩික්) සඳහන් කළේය.

වැඩි ම අලෙවියක් ඇති සිගරට් කණ්ඩයේ සුරාබදු රුපියල් 4.51කින් ඉහළ දැමුව ද එහි වෙළෙඳපොළ මිල රුපියල් 10කින් වැඩි වී ඇතැයි එම සංවිධානය පවසයි.

නිවැරදි බදු අය කිරීමේ ක්‍රමවේදයක් ස්ථාපනය නොකර මෙම බදු වැඩි කිරීම හේතුවෙන් සිගරට් කර්මාන්තයට රුපියල් මිලියන 7,000ක අමතර ලාභයක් උපයා ගැනීමට හැකි වී ඇතැයි ද ඇඩික් සංවිධානය පෙන්වා දෙයි.

මෙසේ දුම්කොළ සමාගමේ ලාභය වැඩි වීමෙන් ඔවුන්ගේ ප්‍රචාරණයට සහ විවිධ මැදිහත්වීම්වලට විශාල අමතර ලාභයක් ලැබෙන බව ත් ඉන් දරුවන් සහ තරුණයන් දුම්කොළ සමාගමේ ගොදුරු බවට වැඩි වශයෙන් ගොදුරු වන බව ත් මද්‍යසාර සහ මත්ද්‍රව්‍ය තොරතුරු මධ්‍යස්ථානයේ විධායක අධ්‍යක්ෂ සම්පත් ද සේරම් පැවැසීය.

මද්‍යසාරවලින් ඇතිවන සෞඛ්‍ය සහ ආර්ථික පිරිවැය මද්‍යසාරවලින් ලැබෙන බදු ආදායමින් පියවා ගැනීමට නොහැකි වී තිබෙන බව ද විධායක අධ්‍යක්ෂවරයා සඳහන් කළේ ය.

2022 වසරේ මද්‍යසාරවලින් ඇති වූ ආර්ථික සහ සෞඛ්‍ය පිරිවැය රුපියල් බිලියන 237ක් වන විට එම වසරේ මද්‍යසාර බදු ආදායම රුපියල් බිලියන 165.2ක් පමණක් බව ද හෙතෙම ප්‍රකාශ කළේය.

ශ්‍රී ලංකාවේ දුම්වැටි සහ මද්‍යසාර භාවිතය හේතුවෙන් බෝ නොවන රෝග මරණ සියයට අසූවක් දක්වා වැඩි වී තිබෙන බව ත් මෙරට මද්‍යසාර භාවිතයෙන් වසරකට පුද්ගලයන් 15,000ක් සහ දුම්වැටි භාවිතයෙන් පුද්ගලයන් 20,000ක් මරණයට පත්වන බව ත් ඔහු කීවේය.

මේ අතර, 2023 වසරේ මද්‍යසාර බදු සියයට විස්සකින් ඉහළ දැමීමෙන් මද්‍යසාර පරිභෝජනය (ශුද්ධ මද්‍යසාර) ලීටර මිලියන 8.3කින් අඩු වී රජයේ මද්‍යසාර සුරාබදු ආදායම රුපියල් බිලියන 11.6කින් වැඩි වී තිබූ බවද සේරම් පැවසීය.

එමෙන් ම, බදු වැඩි කිරීම තුළ සිගරට්වලින් රජය ලබා ගන්නා සුරාබදු ආදායම රුපියල් බිලියන 7.7කින් වැඩි වී සිගරට් අලෙවිය මිලියන 521.5කින් අඩු වී තිබූ බව ද හෙතෙම සඳහන් කළේය.