චීන කොමියුනිස්ට් පක්ෂයේ යුනාන් පළාතේ දේශපාලන විද්‍යායතනයේ කමිටුව, ශ්‍රී ලංකාවේ පෙරදිග දේශපාලන විද්‍යායතනය, ශ්‍රී ලංකා කොමියුනිස්ට් පක්ෂය එක්ව සංවිධානය කරන ලද සම්මන්ත්‍රණයක් අද(26) බොරැල්ල, ශ්‍රී ලංකා කොමියුනිස්ට් පක්ෂ කාර්යාලයේ සුගීශ්වර ශාලාවේ දී පැවැත්විණි.

මෙහිදී අදහස් දක්වමින් චීන කොමියුනිස්ට් පක්ෂයේ ජාත්‍යන්තර කටයුතු පිළිබඳ අධ්‍යක්ෂක යූ හයිලින් (yu hailin) මහතා පැවසුවේ චීන ජනපති ක්ෂි ජින් පින් මහතා චීන කොමියුනිස්ට් පක්ෂයේ 20 වැනි සංවත්සරයේ දී දැක්වූ ගැඹුරු අදහස් යථාර්ථයක් කරගනු පිණිස පෙරදිග දේශපාලන විද්‍යායතනය සමග දැඩිව අත්වැල් බැඳගැනීමට කටයුතු කරන බව ය.

මෙහිදී ශ්‍රී ලංකාවේ  කොමියුනිස්ට් පක්ෂයේ සභාපති හිටපු අමාත්‍ය ඩිව් ගුණසේකර මහතා අදහස් දක්වමින් සඳහන් කළේ ඒක ධ්‍රැව දේශපාලන ලෝකය බහු ධ්‍රැව දේශපාලන ලෝකයක් බවට පරිවර්තනය වෙමින් තිබෙන බවත් අධිරාජ්‍යවාදය ක්‍රම ක්‍රමයෙන් දුර්වල වෙමින් පවතින බවත් ය.

ඒ අනුව චීනය ප්‍රමුඛ අධිරාජ්‍ය විරෝධී කඳවුර නව ලෝක තත්ත්වය යටතේ මානව වර්ගයාගේ ප්‍රගමනය වෙනුවෙන් දැවැන්ත මෙහෙයක් ඉටුකරමින් සිටින බව ඒ මහතා අවධාරණය කළේය.

මෙම අවස්ථාවට ශ්‍රී ලංකාවේ චීන තානාපති කාර්යාලය නියෝජනය කරමින් ලුඕ ඡුං (luo chong) මහතා සහභාගි වී සිටි අතර, ශ්‍රී ලංකාවේ කොමියුනිස්ට් පක්ෂය නියෝජනය කරමින් එහි ප්‍රධාන ලේකම් ජී. වීරසිංහ මහතා, පාර්ලිමේන්තු මන්ත්‍රී වීරසුමන වීරසිංහ මහතා, පෙරදිග දේශපාලන විද්‍යායතනයේ විදුහල්පති ආචාර්ය වරුණ චන්ද්‍රකීර්ති මහතා, ඇතුළු විවිධ පක්ෂ නියෝජනය කරමින් පක්ෂ නියෝජිතයෝ රැසක් සහභාගිවී සිටියහ.