මාස 6ක් සඳහා ධීවරයින්ට විශේෂ ඉන්ධන සහනාධාරයක්

Oct 16, 2024 at 07:26 AM

|

Lanka Leader

ධීවර ජනතාවට විශේෂ ඉන්ධන සහනාධාරයක් ලබාදීමට අමාත්‍ය මණ්ඩලය තීරණය කළ බව කැබිනට් ප්‍රකාශක ඇමැති විජිත හේරත් මහතා ඊයේ (15දා) අමාත්‍ය මණ්ඩල තීරණ දැනුම් දෙමින් පැවැසීය.

මේ සහනය ලබාදීමට මැතිවරණ කොමිසමේ අනුමැතිය ලැබී ඇති බවද ඇමැතිවරයා කීවේය.

මේ අනුව ධීවරයින්ට ඩීසල් සහ භූමිතෙල් ලීටරයක් සඳහා රු. 25ක සහනාධාරයක් ලබාදීමට ඇමැති මණ්ඩලය තීරණය කර ඇති බවත් ධීවර කර්මාන්තය යම්කිසි තැනකට ශක්තිමත් වනතෙක් මේ සහනාධාරය ලබාදීමට ඇමැති මණ්ඩලය තීරණය කර ඇති බවත් ඇමැතිවරයා සඳහන් කළේය.

ධීවරයින්ගේ ආර්ථික තත්ත්වය ඉහළ නැංවීම අරමුණු කරගෙන 2024. 10. 01 දින සිට ක්‍රියාත්මක වන පරිදි මාස 6ක කාලයක් සඳහා මේ ඉන්ධන සහනය ලබාදීමට ධීවර හා ජලජ සම්පත් ඇමැතිවරයා වශයෙන් ජනාධිපතිවරයා මේ යෝජනාව ඇමැති මණ්ඩලය වෙත ඉදිරිපත් කර තිබිණි.

මේ ඉන්ධන සහනය මාස හයක කාලයක් සඳහා රු. මිලියන 5.5ක් වෙන් කර ඇති බවත් ඒ අනුව ඉන්ධන වශයෙන් ඩීසල් ලබාගන්නා යාත්‍රා හිමියන් වෙනුවෙන් ලීටරයකට රු. 25 බැගින් මසකට රු. 300,000ක උපරිමයකට යටත්ව සහ ඉන්ධන වශයෙන් භූමිතෙල් ලබාගන්නා යාත්‍රා හිමියන් සඳහා දිනකට ලීටර් 15ක හා දින 25ක උපරිමයකට යටත්ව රැකියාවේ නිරත වන දිනයන් සඳහා පමණක් සීමා වන පරිදි භූමිතෙල් ලීටරයකට රු. 25ක් වශයෙන් දීමනාවක් ලබාදීමට ඇමැති මණ්ඩලය තීරණය කර ඇති බවද ඇමැති විජිත හේරත් මහතා සඳහන් කළේය.

ඩීසල් සහ භූමිතෙල්වල මිල සංශෝධනයන් සිදු කරන සෑම අවස්ථාවකම උපරිම මාස 6ක කාලයක් සඳහා ඩීසල් සඳහා උපරිම වශයෙන් වෙළෙඳපොළෙන් මිලෙන් සියයට 7.5ක සහනයක්ද භූමිතෙල් සඳහා උපරිම වශයෙන් වෙළෙඳපොළ මිලෙන් සියයට 12.5ක සහනයක්ද ලැබෙන පරිදි මේ සහන වැඩසටහන පවත්වාගෙන යන බවද කැබිනට් ප්‍රකාශක විජිත හේරත් ඇමැතිවරයා කියා සිටියේය.

මැතිවරණ කොමිෂන් සභාව මේ සහනය ලබාදීමට අනුමැතිය ලබාදී ඇති බවද එම අනුමැතියට යටත්ව රජය මේ සහනාධාරය ලබාදෙන බවද ඔහු සඳහන් කළේය.