පොලිස් මාධ්‍ය ප්‍රකාශක නියෝජ්‍ය පොලිස්පති නිහාල් තල්දූව මහතා පැවසුවේ අන්තර්ජාලය ඔස්සේ මුල්‍ය වංචා සිදුකළ බව කියන චීන ජාතිකයින් 15 දෙනෙකුගෙන් යුත් තවත් පිරිසක් කෝට්ටේ වැලිකඩ ප්‍රදේශයේදී අත්අඩංගුවට ගත් බවයි.

අත්අඩංගුවට ගත් පුද්ගලයන් සතුව තිබී ඩෙස්ක්ටොප් පරිගණක 15ක් සහ ජංගම දුරකථන 15ක් ද පොලිස් භාරයට ගත් බව ඒ මහතා වැඩිදුරටත් පැවසුවේය.

මාර්ග ගත ක්‍රම ඔස්සේ මුල්‍ය වංචාවලට සම්බන්ධ බව පැවසෙන චීන ජාතිකයන් 180ක් පමණ ශ්‍රී ලංකා පොලිසිය විසින් දිවයිනේ විවිධ ප්‍රදේශවලින් ඔක්තෝබර් මාසය ඇතුළත අත්අඩංගුවට ගෙන ඇත.

පසුගිය 12 වනදා කුණ්ඩසාලේ ප්‍රදේශයේදී චීන ජාතිකයින් 129 දෙනෙකුගෙන් යුත් කණ්ඩායමක් අත්අඩංගුවට ගත් අතර එහිදී කුණ්ඩසාලේ සුඛෝපභෝගී හෝටලයක කාමර 47ක තිබී ලැප්ටොප් පරිගණක 100කට අධික සංඛ්‍යාවක් සහ ජංගම දුරකථන විශාල සංඛ්‍යාවක්ද පොලිස් භාරයට ගෙන ඇති බවද අනාවරණය විය.

මීට අමතරව ලැප්ටොප් පරිගණක 5ක්, ජංගම දුරකථන 437ක්, USඹ් කේබල් 332ක්, ජංගම දුරකථන චාජර් 133ක් ඇතුළු ඉලෙක්ට්‍රොනික උපාංග සැළකිව යුතු සංඛ්‍යාවක්ද සමඟ වලංගු වීසා නොමැතිව පානදුර ගොරකාන ප්‍රදේශයේ හෝටලයක රැඳී සිටි චීන ජාතිකයින් 20 දෙනෙකුද  පොලිසිය විසින් අත්අඩංගුවට ගනු ලැබීය.

එලෙසම පසුගිය ඔක්තෝබර් 06 වැනිදා ගම්පහ ප්‍රදේශයේ හෝටලයකදී සහ හංවැල්ල ප්‍රදේශයේ පෞද්ගලික ආයතනයකදී අන්තර්ජාලය හරහා මූල්‍ය වංචා සිදුකරමින් ශ්‍රී ලංකාවේ රැඳී සිටි විදේශිකයන් 40 දෙනෙකුගෙන් යුත් කණ්ඩායමක්ද පොලිස් අත්අඩංගුවට පත් විය.

එම පිරිසට චීන ජාතිකයින් 30 දෙනෙකු, ඉන්දීය ජාතිකයින් 4 දෙනෙකු සහ තායි ජාතිකයින් 6 දෙනෙකු ඇතුළත් විය.

එම වැටළීමේදී ජංගම දුරකථන 499ක්, ලැප්ටොප් පරිගණක 25ක් සහ ඩෙස්ක්ටොප් පරිගණක 29ක් ද පොලිස් භාරයට ගත් බවද අනාවරණය විය.