කැනඩාවේ ඔටාවා නුවරට තදාසන්න බාහීවන් ප්‍රදේශයේ සිය නිවසේ දී ප්‍රහාරයකට ලක්ව තුවාල ලබා රෝහල්ගතව ප්‍රතිකාර ලබමින් සිටි ධනුෂ්ක වික්‍රමසිංහ ඊයේ (15) රෝහලෙන් පිටව යාමට නියමිතව තිබිණි.

මේ අතර, ශ්‍රී ලාංකික පවුලක සාමාජිකයින් 05 දෙනෙකු ඇතුළු 06 දෙනෙකුට මරු කැඳවූ ඔටාවා සමූහ ඝාතනයේ සැකකාර ශ්‍රී ලාංකික තරුණයා ඔටාවා අධිකරණය හමුවට දෙවැනි දිනටත් ඉදිරිපත් කෙරුණි.

දුරකථනය ඔස්සේ සැකකරු අධිකරණය හා සම්බන්ධ වූ අතර නඩු විභාගය පැවතියේ විනාඩි 4ක කාලයක් පමණයි.

කැනඩා මාධ්‍ය වාර්තා කළේ, මූලික විමර්ශනවලදී ඔටාවා පොලිස් නිලධාරීන්ට වැරදුණු වින්දිතයින්ගේ නම්වල දෝෂ නිවැරදි කිරීමට පියවර ගෙන තිබුණත් චෝදනාවල කිසිදු සංශෝධනයක් සිදුව නොතිබූ බවය. 

මෙම නඩුව වාර්තා කිරීමට විශාල මාධ්‍යවේදීන් පිරිසක් අධිකරණ පරිශ්‍රයට රැස්ව සිටියත් සැකකාර 19 හැවිරිදි ශ්‍රී ලාංකික තරුණයා අධිකරණයට රැගෙන ආවේ නැහැ. 

ඔහු නීති කෘත්‍යයට සම්බන්ධ වූයේ දුරකථනය ඔස්සේය. 

මේ වන විට ඔටාවාහි කාලෙටන් රැඳවුම් මධ්‍යස්ථානයේ රඳවා සිටින සැකකාර ෆෙබ්‍රියෝ ද සොයිසා පළමුවෙන් අධිකරණය හමුවේ තම අනන්‍යතාව ප්‍රකාශ කළේය.

නමුත්, සිය නම සහ උපන්දිනය කෙඳිරිලි හඬින් පවසද්දී, විශෝධන නිලධාරියා ඔහුට පවසා තිබුණේ, එය පැහැදිලිව උස් හඬින් පවසන ලෙසය. 

සැකකාර ෆෙබ්‍රියෝ ද සොයිසාට සාපරාධි මිනිමැරුම් චෝදනා 06ක් සහ මිනිමැරීමට තැත්කිරීමේ චෝදනාවක් එල්ලව තිබුණත්, මෙම කිසිදු චෝදනාවක් ඊයේ (14) අධිකරණය ඉදිරියේ යළි කියවා නැත. 

සය පුද්ගල ඝාතනයේ දෙවැනි දින නඩුව මිනිත්තු හතරකට සීමා වූ අතර, යළි නඩු විභාගය ලබන 28 වනදා පැවැත්වෙනු ඇත. 

මේ අතර, සැකකාර ෆෙබ්‍රියෝ ද සොයිසාගේ කැනඩා පෙම්වතිය හෙළිදරව් කළ බව කියන තොරතුරු අඩංගු වීඩියෝවක් සමාජමාධ්‍ය තුළ හුවමාරු වෙමින් පවතී.

ඇය එහිදී පවසා ඇත්තේ සැකකරු විකෘති ලිංගික ආශාවන් තිබූ පුද්ගලයකු බවත්, සමූල ඝාතනයේ දී දිවි බේරුණු ධනුෂ්ක වික්‍රමසිංහ සමග ඔහුගේ තිබූ සම්බන්ධය පිළිබඳව ඇය තුළ සැකයක් තිබූ බවත් ය.

කෙසේ වුවද ඇය පැවසූ බව කියන මෙම තොරතුරු පිළිබඳව මෙතෙක් සාක්ෂි සහිතව තොරතුරු අනාවරණය වීමක් සිදුවී නොමැත.