සත්‍ය සෙවීමේ කොමිසම පනත රාජපක්ෂලාගේ ප්‍රශ්නයක් නොවන බවත්, එහි අනතුර ඇත්තේ මේ රටේ යුද්ධය අවසන් කළ හමුදා නයකයන්ට හා රණවිරුවන්ට බවත් දේශහිතෛෂී ජාතික ව්‍යාපාරයේ මහ ලේකම් වෛද්‍ය වසන්ත බණ්ඩාර මහතා පවසයි.

රාජපක්ෂලාගේ නාමය තවදුරටත් මේ රටේ දේශපාලනයට අදාළ නොවන බවද, රනිල් වික්‍රමසිංහ ජනාධිපතිවරයාට ඔවුන් යටත් වී බයෙන් සිටින බවද ඒ මහතා පවසයි.

වෛද්‍ය වසන්ත බණ්ඩාර මහතා මේ බව පැවසුවේ අන්තර්ජාල නාලිකාවක සාකච්ඡාවකට එක් වෙමිනි.

ගෝඨාභය රාජපක්ෂ හිටපු ජනාධිපතිවරයා තමන්ට ඡන්දය දුන් 69 ලක්ෂයක ජනතාවගේ ජනවරම රනිල් වික්‍රමසිංහ මහතාට බලය ලබාදීමෙන් පාවාදුන් බවත්,  අද රනිල් වික්‍රමසිංහ ජනාධිපතිවරයා එම 69 ලක්ෂයක ජනතාවට එරෙහිව ක්‍රියාන්විතයක් දියත්කර ඇති බවත් ඒ මහතා පෙන්වා දෙයි.

සත්‍ය සෙවීමේ කොමිසම පනත මේ රටේ රණවිරුවන් පාවාදෙන දුෂ්ඨතම පනත බවද පවසන ඒ මහතා, මේ පනත සම්බන්ධයෙන් තම සංවිධානය හරහා හමුදා නායකයන් දැනුම්වත් කරමින් සිටින බවද සඳහන් කරයි.

එහිදී රාජපක්ෂවරු මෙම පනත සම්බන්ධයෙන් කුමක් පවසන්නේ දැයි පාර්ලිමේන්තු මන්ත්‍රී සරත් වීරසේකර මහතාගෙන් විමසූ විට ඔහු පවසා සිටියේ " සත්‍ය සෙවීමේ කොමිසම් පනත කියලා භයානක පනතක් එනවා සරත්... ඔයගොල්ලො ඒ ගැන මොනවත් නොකර ඉන්නේ ඇයි?" දැයි ගෝඨාභය රජපක්ෂ මහතා විමසූ බව සරත් වීරසේකර මහතා පැවසූ බව ද වෛද්‍ය වසන්ත බණ්ඩාර මහතා හෙළිකරයි.

ගෝඨාභය හිටපු ජනාධිපතිවරයා, සරත් වීරසේකර මහතාගෙන් එසේ විමසනවාට වඩා රනිල් වික්‍රමසිංහ ජනාධිපතිවරයාගෙන් විමසීමට තිබූ බවත්, එසේ විමසීමක් නොකරන්නේ රනිල් වික්‍රමසිංහ ජනාධිපතිවරයාට ඇති බය නිසා බවත් වෛද්‍ය වසන්ත බණ්ඩාර මහතා මෙහිදී පැවසීය.

සවිස්තරාත්මක වීඩියෝව නරඹන්න...