මේ වන විට කිමිදුම් ක්‍රීඩාවෙන් ශ්‍රී ලංකාවට ඓතිහාසික ජයග්‍රහණයක් හිමිව තිබේ. 

ඒ , 24 හැවිරිදි දුලාන්ජන් ප්‍රනාන්දු මහතා පසුගිය නොවැම්බර් 3 දා සිට දෙසැම්බර් 03 වනදා දක්වා කැනඩාවේ මොන්ට්‍රියල් නුවර පැවැති "CAMO International Invitation" නම් ජාත්‍යන්තර කිමිදුම් තරඟාවලියේ මීටර් තුන පනින පෝරු (springboard) ඉසව්වෙන් නව ජාතික වාර්තාවක් තැබීමට සමත් වීමත් සමඟය.

මෙම ජයග්‍රහණය ඔහුගේ පුද්ගල ජයග්‍රහණයක් පමණක් නොව ශ්‍රී ලංකාවට ජාත්‍යන්තර වශයෙන් කිමිදුම් ක්‍රීඩා ක්ෂෙත්‍රයේ ඉහළ පිළිගැනීමක් සනිටුහන් කිරීමකි.

මෙම ජයග්‍රහණයත් සමඟ දුලාන්ජන් ලෝක ජලජ ක්‍රීඩා ක්ෂේත්‍රය තුළ ඉහළ පිළිගැනීමකට ලක්විය. එලෙසම එවැනි ජයග්‍රහණයක් ලැබූ තුන්වෙනි ශ්‍රී ලාංකිකයාද වන්නේය. 

කොළඹ රාජකීය විද්‍යාලයේ ආදි ශිෂ්‍යයෙකු වන දුලාන්ජන් මොන්ට්‍රියල් නුවරදි පැවැති "CAMO International Invitation" තරඟාවලියේ මීටර් තුන පනින පෝරු (springboard) ඉසව්වෙන් ලකුණු 288ක් ලබා ගැනීමට සමත් විය. එය මින් පෙර ශ්‍රී ලාංකික  කිමිදුම්කරුවෙක් විසින් එම ඉසව්වෙන් ලබාගෙන තිබූ ලකුණු 247 ජාතික වාර්තාවද බිඳ හෙලනු ලැබීය. 

මීට පෙර මෙම කිමිදුම් ඉසව්වෙන් ශ්‍රී ලාංකා වාර්තාව තබා තිබුණේ රාජකීය විද්‍යාලයේම ආදි ශිෂ්‍යයෙකු වූ ජනක බියන්වල මහතායි. ඔහු 1996 සිට ශ්‍රි ලංකා වාර්තාවට හිමිකම් පෑවේය.ජනක බියන්වල මහතා 1996 දී ඇට්ලන්ටා ගිම්හාන ඔලිම්පික් උළෙල නියෝජනය කරමින් මෙම වාර්තාව තබා ඇති අතර ඔහු මෙම ක්‍රීඩා ඉසව්ව නියෝජනය කළ අවසන් ශ්‍රී ලාංකික කිමිදුම්කරුවාද විය. 

දුලාංජන්ගේ විශිෂ්ට ක්‍රීඩා කෞෂල්‍ය ජාතික වාර්තාව බිඳ දැමුවා පමණක් නොව ලෝක ජලජ ශූරතාවයට සහභාගිවීමට අවශ්‍ය ලකුණු සීමාව වන ලකුණු 250ද ඉක්මවා යාමට සමත්කම් දැක්වීය. එහි ප්‍රතිඵලයක් ලෙස 2024 පෙබරවාරි මාසයේදි දෝහා හිදී පැවැත්විමට සැලසුම් කර ඇති ලෝක ජලජ ශූරතාවය සඳහා සහභාගිවීමට අවශ්‍ය පරිසාධන මට්ටම ඉක්මවා යාමටද සමත් වූයේය.

ටොරොන්ටෝහිදි ලබාගත් ජයග්‍රහණය සම්බන්ධයෙන් වන තම ප්‍රීතිය අප වෙත ප්‍රකාශ කරමින් දුලාංජන් පැවසුවේ “ඇත්තටම මට සතුටුයි. මට මෙම කිමිදුම් ඉසව්වේ ක්‍රීඩාකරන ජාත්‍යන්තර ක්‍රීඩකයන් අතර ඉහළ ස්ථානයක රැඳීමට අවශ්‍යයි. ඒ සඳහා මම ලකුණු 300-350 අතර රැඳිය යුතුයි. එවිට මට ලෝකයේ දක්ෂතම ක්‍රීඩකයන් 30 දෙනා අතරට පැමිණිය හැකියි."

 "CAMO International Invitation" ජාත්‍යන්තර කිමිදුම් තරඟාවලියට ලෝකයේ  ඉහල දක්ෂතා පෙන්වන ජාතීන්ට අයත් කිමිදුම්කරුවන් සහභාගී වේ. ඒ අනුව ඇමරිකා එක්සත් ජනපදය, ඉතාලිය, ස්වීඩනය, ජර්මනිය, කැනඩාව සහ මෙක්සිකෝව නියෝජනය කරමින් මීටර් තුනේ ජලජ පුවරු ඉසව්වට  දුලාන්ජන් සමඟ ලෝකයේ සිටින දක්ෂතම ක්‍රීඩකයෝ සහභාගි විය. ඒ අනුව දුලාංජන් තියුණු තරගයකට මුහුණ දුන්නේය. ඔහුට ලෝකයේ හොඳම ක්‍රීඩකයින් 18 දෙනා අතර අටවැනි ස්ථානය අත්පත් කරගනිමින් අවසන් මහා තරගයට සුදුසුකම් ලැබීමට තරම් දක්ෂතා පෙන්වීමට හැකිවිය. 

ඒ අනුව ඔහුට එම තරඟයේ පළමු වටයේදීම ලකුණු 230 ක ආකර්ෂණීය ලකුණු සහිත කිමිදුම්කරුවකු බවට පත් වීමට හැකියාව ලැබුණි. තරඟයේ අවසන් වටයේ ක්‍රීඩා තරුවක් බවට දුලන්ජන් පත්වෙමින් ලකුණු 288ක් අත්පත් කර ගැනීමට සමත් වූයේ ශ්‍රී ලංකා ජාතික වාර්තාව අත්පත් කරගනිමින් මෙන්ම තරඟවලියේ  ප්‍රශංසනීය හයවන ස්ථානය රඳවා ගැනීමට සමත්වෙමිනි. 

2020දී වයස අවුරුදු 20 සම්පූර්ණ වීමෙන් පසු ඕස්ට්ට්‍රේලියාවේ මෙල්බර්න් හි උසස් අධ්‍යාපනය සඳහා  ශ්‍රී ලංකාවෙන් පිටවීමට පෙර දුලාංජන් ශ්‍රී ලංකාවේ කිමිදුම් ඉසව්වේ ජාතික ශූරයා  බවට පත්ව සිටියේය.

මෙල්බර්න් හි ඩේකින් විශ්ව විද්‍යාලයහි ක්‍රීඩා විද්‍යාව හදාරන අතරතුර දුලාංජන් කිමිදුම් ඉසව්ව කෙරෙහි ඇති ඔහුගේ ආශාව නැවත පණ ගැන්වීය. විශ්ව විද්‍යාලය තුළ පවතින විශිෂ්ට පහසුකම් හේතුවෙන් වසර දෙකක් තුළ ඔහු තම විශිෂ්ටත්වය විදහා දැක්වූවා පමණක් නොව 2022 බර්මින්හැම් පොදු රාජ්‍ය මණ්ඩල ක්‍රීඩා උළෙලේ අවසන් තරඟයට සහභාගි වීමට අවශ්‍ය දක්ෂතා දැක්වීමටද සමත්විය. එම ජයග්‍රහණය හේතුවෙන් දුලංජන් 2023 ජූනි 1 වනදා සිට බලපැවැත්වෙන  ලෝක ජලජ ක්‍රීඩා ශිශ්‍යත්වය දිනා ගැනීමට සමත් විය. එය 2024 වර්ෂයේ අගෝස්තු 31 වනදා දක්වා වලංගු වන්නේය. ඒ අනුව ඔහු තම දක්ෂතාවයන් අදාළ ක්‍රීඩා ශිෂ්‍යත්වය මගින් ඔප් නංවාගත් බව තහවුරු වේ. 

දුලාන්ජන්  2018 වර්ෂයේදී තම ක්‍රීඩා ජීවිතය අත්හැරීමේ සිට නැවත 2020දී මෙල්බන් නුවරදී තම දක්ෂතාවයන් නැවත ලොවට පෙන්වීම දක්වා කාලය තුළ තමා තුළ වන අධිෂ්ඨාන ශක්තිය  කැපවීමේ හැකියාව අභියෝග හමුවේ නොසැලෙන ගුණය ලොවට විදහා පෙන්වීය. දුලාංජන් ප්‍රනාන්දුගේ ඔලිම්පික් සිහිනය සාර්ථක වේවාය යන්න ලංකා ලීඩර් කාර්ය මණ්ඩලයේ පැතුමයි.