අවුකන ප්‍රතිමා වහන්සේට වස්ත්‍ර පැළැඳ වූ අයට වැඩවරදින ලකුණු!

Nov 29, 2023 at 10:16 AM

|

Lanka Leader

ශ්‍රී ලංකාවේ ශෛලමය පිළිම අතර විශේෂ ස්ථානයක් හිමි වන අවුකන පිළිමයට සිවුරු පැළැඳවීම සම්බන්ධයෙන් කිසිදු සැකකරුවෙකු මේ දක්වා අත්අඩංගුවට නොගැනීම සම්බන්ධයෙන් තමන් සොයා බලන බව බුද්ධශාසන, ආගමික සහ සංස්කෘතික කටයුතු අමාත්‍ය විදුර වික්‍රමනායක මහතා පවසයි.

අදාළ සිදුවීම සම්බන්ධයෙන් සැකකරුවන් අත්අඩංගුවට ගැනීම ප්‍රමාද වී ඇති බවට එල්ල වන චෝදනා සම්බන්ධයෙන් පිළිතුරු දෙමින් ඔහු මේ බව සඳහන් කර ඇත.

ඊට අදාළ පැමිණිලි ගොනු කර ඇති ගල්නෑව පොලිස් ස්ථානයේ ස්ථානාධිපතිවරයා සඳහන් කර ඇත්තේ, මේ දක්වා එම සිදුවීම සම්බන්ධයෙන් කිසිදු සැකකරුවෙකු අත්අඩංගුවට ගෙන නොමැති බව ය.

එහිදී පොලිස් ආරංචි මාර්ග සඳහන් කළේ, පෙරේදා (නොවැ. 27) දිනයේ පුරාවිද්‍යා දෙපාර්තමේන්තු නිලධාරීන් ගල්නෑව පොලිසියේ ගොනු කර තිබුණු පැමිණිල්ලේ සඳහන් කර තිබුණේ, අදාළ සිදුවීම සම්බන්ධයෙන් විමර්ශනයක් අවශ්‍ය නොවන බවත් සැකකරුවන් වෙත අවවාද කිරීම පමණක් ප්‍රමාණවත් බවත් ය.

කෙසේ වෙතත්, සිද්ධිය පිළිබඳව මාධ්‍ය ඔස්සේ මෙන් ම, සමාජ මාධ්‍ය ඔස්සේ දැඩි අවධානයක් යොමු වීමත් සමග අදාළ නිලධාරීන් යළිත් ඊයේ (නොවැ. 28) දින තවත් පැමිණිල්ලක් ගොනු කර සිද්ධිය සම්බන්ධයෙන් විමර්ශනයක් සිදු කරන ලෙස සඳහන් කර ඇතැයි එම ආරංචි මාර්ග වැඩිදුරටත් පවසයි.

මේ අතර, අනුරාධපුර අවුකන බුද්ධ ප්‍රතිමා වහන්සේට වස්ත්‍ර පැළැඳවීම පුරාවිද්‍යා ආඥාපනත අනුව බරපතළ සිද්ධියක් බව පුරාවිද්‍යා දෙපාර්තමේන්තුව පවසයි.

එහි වැඩබලන අධ්‍යක්ෂ ජනරාල් නිශාන්ති ජයසිංහ මහත්මිය පවසන්නේ, වස්ත්‍ර පැළැඳවීමේදී විහාරාධිපති හිමියන් තනි මතයට කටයුතු කර ඇති බවය.

ක්‍රිස්තු වර්ෂ 5 වැනි සියවසේ ධාතුසේන රජු නිර්මාණය කරවූ බවට ඉතිහාසයේ සඳහන් වන අනුරාධපුරය අවුකන බුද්ධ ප්‍රතිමා වහන්සේට වස්ත්‍ර පැළැඳවීමේ ඡායාරූප පසුගිය දිනවල සමාජ මාධ්‍යවල සංසරණය වූයේ සමාජය තුළ දැඩි කතාබහක් නිර්මාණය කරමිනි.