වැටුප් සංශෝධනයට GMOA එකඟ නොවෙයි... වර්ජනයක් කැඳවන බව දන්වයි..
අය වැය මගින් යෝජිත වැටුප් සංශෝධනය සම්බන්ධයෙන් රජයේ වෛද්‍ය නිලධාරීන්ගේ සංගමය විසින් නිකුත් කරන ලද මාධ්‍ය නිවේදනයක් මෙහි දැක්වෙයි.
මාධ්‍ය නිවේදනය
2025 අයවැය ලේඛනයේ සෞඛ්‍ය පද්ධතිය ඉලක්ක කරගත් යෝජනා සහ අයවැයෙන් යෝජිත වැටුප් සංශෝධන හමුවේ වෛද්‍යවරුන්ට සිදු වී ඇති බලපෑම.
වත්මන් රජයේ මංගල අයවැය ලේඛනය පසුගියදා පාර්ලිමේන්තුවට ඉදිරිපත් කරනු ලැබීය.
ශ්‍රී ලාංකීය නිදහස් සෞඛ්‍ය සේවාව ශක්තිමත් කිරීම ඉලක්ක කර ගනිමින් සාධනීය යෝජනා ගණනාවක් අයවැය ලේඛනය තුළ අන්තර්ගත කර තිබීම ප්‍රශස්ත කරුණකි.
රුපියල් බිලියන 604 ක් වන, ඉතිහාසයේ වැඩිම මුදල සෞඛ්‍ය පද්ධතිය වෙනුවෙන් වෙන් කර ඇති අතර, රෝහල් පද්ධතියට ඖෂධ සහ උපකරණ ලබාදීම වෙනුවෙන් වෙන්කර ඇති මුදල රුපියල් බිලියන 185 කි. මෙලෙස මුදල් ප්‍රතිපාදන ලබාදීම මෙන්ම, එම මුදල් ප්‍රතිපාදන වඩා ඵලදායිව වැය කිරීම සඳහා ශක්තිමත් ක්‍රමවේදයන් සකස් කිරීමෙන් නිදහස් සෞඛ්‍ය සේවාව තවත් ශක්තිමත් වනු ඇත.
ඖෂධ හිඟය විසඳීමට ඇති හොඳම විසඳුම, ප්‍රසම්පාදන ක්‍රියාවලිය ඩිජිටල්කරණයට ලක් කිරීම බව රජයේ වෛද්‍ය නිලධාරිගේ සංගමය දිගින් දිගටම දැරු ස්ථාවරයයි. මෙවර අයවැය ලේඛනය තුල සෞඛ්‍ය පද්ධතිය ඩිජිටල්කරණය කිරිමේ ආරම්භක පියවර ලෙස ජාතික ඖෂධ නියාමන අධිකාරිය සහ රාජ්‍ය ඖෂධ නීතිගත සංස්ථාව ඩිජිටල්කරණය සිදුකිරීමටත්, ස්වස්ථ දත්ත පද්ධතිය තවත් ශක්තිමත් කිරීමටත් අවශ්‍ය ප්‍රතිපාදන ලබාදීම අතිශයින් වැදගත්ය. මෙහිදී මුදල් සහ ඖෂධ නාස්තිය අවම කිරීම සඳහා තිරසාර ක්‍රමවේදයක් ස්ථාපිත කිරීම ද කාලෝචිතය.
මීට අමතරව බෝ නොවන රෝග පාලනය ඉලක්ක කර ගනිමින් ප්‍රාථමික සෞඛ්‍ය සේවා පුළුල් කිරීම, පෝෂණ ගැටලු සඳහා විසඳුම් ඉදිරිපත් කිරීම, ස්නායු සංවර්ධන ආබාධ සහිත දරුවන්ගේ ප්‍රතිකාර සේවා පුළුල් කිරීම, පාසල් සිසුන්ගේ සහ නව යොවුන් වියේ දරුවන්ගේ මානසික සෞඛ්‍ය සංවර්ධනය මෙන්ම මෙරට ආබාධිත ප්‍රජාවගේ සුබසාධනය ඉලක්ක කර ගනිමින්ද සාධනීය යෝජනා ගණනාවක් මෙම අයවැයේ අන්තර්ගත වී ඇත. සෞඛ්‍ය සේවාවන් පුළුල් කිරීමේදී බුද්ධිගලනය හමුවේ දැනට උද්ගතවී ඇති වෛද්‍ය හිඟය ද අවධානයට ලක්විය යුතු කරුණකි.
වෛද්‍යවරුන් ලෙස මෙවර අයවැය ලේඛනයේ වැඩිම අවධානයක් යොමු වී ඇත්තේ රාජ්‍ය සේවයේ වැටුප් සංශෝධන ක්‍රියාවලිය කෙරෙහිය.
රජයේ වෛද්‍ය නිලධාරීන්ගේ සංගමයේ දීර්ඝකාලීන ස්ථාවරය වූයේ විද්‍යාත්මක නොවන අයුරින් විටින් විට වැටුපට දීමනා එකතු කිරීම වෙනුවට, ජාතික වැටුප් ප්‍රතිපත්තිය තුළ අදාල වැටුප් අනුපාත ආරක්ෂා වන පරිදි රාජ්‍ය සේවකයින්ගේ මූලික වැටුප සංශෝධනය විය යුතු බවයි. ඒ අනුව, පවතින මූල්‍ය සීමාවන් තුල වුවද ජනාධිපතිතුමන් ප්‍රමුඛ රජය විසින් රාජ්‍ය සේවකයින්ගේ මූලික වැටුප, ජාතික වැටුප් ප්‍රතිපත්තියට අනුකූලව ඉහළ නැංවීම අතිශයින් ධනාත්මක තීරණයකි. එහිදී සියලුම ශ්‍රේණි වල වෛද්‍යවරුන්ගේ මූලික වැටුප සැලකිය යුතු අගයකින් ඉහළ නැංවීම පිළිබඳ ගරු ජනාධිපතිතුමන්ට අපගේ ස්තූතිය පළකර සිටිමු.
අයවැය 2025 හරහා වැටුප් වැඩිවීමක් සිදුවුව ද, වෛද්‍ය සේවාවටම ආවේණික සහ සුවිශේෂි වූ අමතර රාජකාරි දීමනාව ගෙවීමේ අගය අත්තනෝමතික ලෙස අඩු කිරීමේ තීරණය වෛද්‍යවරුන් තුළ බරපතල නොසන්සුන්තාවයක් ඇතිකර ඇත.
සමස්ත වැටුප් සංශෝධන යෝජනාවලිය පිළිබඳව අද දින පැවති රජයේ වෛද්‍ය නිලධාරීන්ගේ සංගමයේ මධ්‍යම කාරක සභා රැස්වීමේදි දීර්ඝ ලෙස සාකච්ඡා වූ අතර එහිදි පහත කරුණු නිරීක්ෂණය කරන ලදී.
- රාජ්‍ය සේවයේ අනිකුත් කණ්ඩායම් වලට හිමි අතිකාල දීමනා සහ වෛද්‍යවරුන්ට පමණක් හිමි අමතර රාජකාරි දීමනා අතර සංකල්පීය සහ තාක්ෂණික වශයෙන් පැහැදිලි වෙනසක් පවති.
- අමතර රාජකාරි ක්‍රමය සහ අමතර රාජකාරි දීමනාව වෛද්‍යවරුන්ට පමණක් සුවිශේෂී සහ ආවේණික වේ. මේ වන විට වෛද්‍යවරුන්ගේ අමතර රාජකාරි දීමනාවේ පැයකට ගෙවනු ලබන අගය අදාල ශ්‍රේණියේ මූලික වැටුපේ මධ්‍ය අගයෙන් 1/80 ක් වන අතර, එම අගය වෛද්‍යවරුන්ටම පමණක් ආවේණිකය. එය මෙවර අයවැය හරහා එක්වරම මූලික වැටුපෙන් 1/120 දක්වා 50% කින් අඩු කර ඇත.
- වෛද්‍යවරුන් තම සායනික රාජකාරීන්ට අමතරව රාජකාරි ගණනාවක් ඉටුකරන අතර, සාමාන්‍ය රාජකාරී වේලාවෙන් පසුවද අඛණ්ඩව දින 07ම පැය 24 පුරා රෝගී සත්කාර සේවාවන් රට පුරා සපයනු ලබයි. ඒ වෙනුවෙන් ලැබෙන අමතර රාජකාරී දීමනාව දැනටත් ගෙවනුයේ මාසික සහ දෛනික සීමාවක් සහිතව වන බැවින්, ඉටුකරන සේවාවට සාපේක්ෂව සියලුම කාණ්ඩවල වෛද්‍යවරුන්ට ලැබෙන අමතර රාජකාරි දීමනාවේ ප්‍රමාණාත්මක අඩුවක් දැනටත් පවතී.
- තත්ත්වය එසේ තිබියදි, අයවැය යෝජනාවක් ලෙස වෛද්‍යවරුන්ගේ අමතර රාජකාරී දීමනාවේ පැයකට ගෙවන අගය අසාධාරණ සහ අත්තනෝමතික ලෙස 50% කින් පහත හෙලීම තුළ මෙරට වෛද්‍යවරුන් අවම පහසුකම් මධ්‍යයේ රට පුරා අඛණ්ඩව සපයන රෝගී සත්කාර සේවාවන්, තවත් අවතක්සේරු වීමක් සිදුවී ඇත.
- අමතර රාජකාරී දීමනාව ලබා ගැනීමේදී වෛද්‍යවරුන්ට සීමාවන් පනවා තිබුණ ද, අතිකාල දීමනා ලබා ගන්නා අනෙකුත් සේවක කාණ්ඩ ගණනාවකට, එය අසීමිත පැය ගණනක් ලබා ගැනීමේ වරප්‍රසාදය හිමිවී ඇත. එබැවින් ඔවුන්ගේ අතිකාල දීමනා ගෙවීමේ අනුපාතය අඩු වූ තත්ත්වයකදී වුවද, අවසන් ප්‍රතිඵලයේදී වෛද්‍යවරුන්ට සාපේක්ෂව ඔවුන්ට සිදුවන හානිය අවමය.
- මේ හරහා අවසානයේදී සෞඛ්‍ය පද්ධතිය තුළ වෛද්‍යවරුන් සහ අනෙකුත් සෞඛ්‍ය කාර්ය මණ්ඩල අතර නව වැටුප් විෂමතාවයක් නිර්මාණය වීමේ තත්ත්වයක්ද උද්ගත වී ඇත.
- සේවාවේ සුවිශේෂී බව නොසලකා හරිමින්, කිසිඳු පාර්ශවයක් සමඟ එකඟතාවයකින් තොරව මෙම දීමනාව අසාධාරණ සහ අත්තනෝමතික ලෙස සංශෝධනය කිරීම කිසිසේත් පිළිගත නොහැකි තත්ත්වයකි.
- මූලික වැටුපෙන් 1/20 අනුපාතයකට ගෙවනු ලබන නිවාඩු දින දීමනාව ද, 1/30 දක්වා අඩු කිරීමට තීරණය කර ඇත. මාසයක් පුරා වෛද්‍යවරුන් ඉරිදා සහ නිවාඩු දින කොතරම් ප්‍රමාණයක් තම සේවාවන් ඉටු කල ද, ගෙවීම් සිදු කරනුයේ මසකට දින තුනක් සඳහා පමණි.
- මෙතෙක් ලැබුනු සහ ලැබිය යුතු දීමනාවන් මෙලෙස අඩු කිරීම තුල, අයවැය ඔස්සේ යෝජිත වැටුප් වැඩි කිරීමෙන් අනතුරුව වුව ද වෛද්‍යවරුන්ගේ වැටුපට අවසානයේදී සැලකිය යුතු මුල්‍යමය අහිමිවීමක් සිදුවේ.
- සේවයට සරිලන වැටුපක් රහිතව විවිධ දුෂ්කරතා මධ්‍යයේ සුවිශේෂී සේවාවක් සපයන වෛද්‍යවරුන්ගේ භූමිකාව අවතක්සේරුවට ලක් කර ඇති බවක් නිරීක්ෂණය වන අතර, අනෙකුත් සියලු වෘත්තිය කාණ්ඩ වලට සාපේක්ෂව මෙවර අයවැයෙන් යෝජිත වැටුප් වැඩිවීමේ සැබෑ ප්‍රතිලාභය ද වෛද්‍යවරුන්ට අහිමි වී ඇත. මෙය මීට පෙර කිසිදු අයවැය ලේඛනයකදී නිර්මාණය නොවුණු තත්ත්වයකි.
රජය වැටුප් වැඩිවීමක් ලබාදීමේ සාධනීය අරමුණින් මෙම වැටුප් සංශෝධනය ක්‍රියාත්මක කලද, කිසියම් පාර්ශවයක මැදිහත් වීමෙන් අමතර රාජකාරි දීමනා සහ නිවාඩු දින දීමනා කප්පාදු කිරීමට ගත් තීරණය හේතුවෙන් අවසානයේදී සිදු වී ඇත්තේ වෛද්‍යවරුන් තවත් ඉච්ඡාභංගත්වයට පත්වී සෞඛ්‍ය ක්ෂේත්‍රය අනවශ්‍ය අර්බුදයක් කරා ගමන් කිරීමයි.
අයවැයට පෙර රජයේ වෛද්‍ය නිලධාරීන්ගේ සංගමයේ ප්‍රධානතම ඉල්ලීම බවට පත්වූයේ වෛද්‍යවරුන්ට රට තුළ රැඳී සිටීම දිරිමත් කිරීම සඳහා කාල රාමුවක් සහිත වැඩපිළිවෙළක් සහ ප්‍රතිපත්ති මාලාවක් අයවැය ලේඛනය හරහා ප්‍රකාශයට පත්විය යුතු බවයි. එවන් කිසිදු නිශ්චිත යෝජනාවක් මෙවර අයවැය ලේඛනය තුල අන්තර්ගතව නොතිබීම කනස්සල්ලට කරුණකි.
මෙරට සෞඛ්‍ය සේවා වෙනුවෙන් කෙතරම් මුදල් ප්‍රතිපාදන වෙන් කල ද, විශේෂඥ වෛද්‍යවරුන්, වෛද්‍යවරුන් ඇතුළු මානව සම්පත පද්ධතිය තුළ නොරැඳේ නම් රෝහල් පද්ධතිය බිඳ වැටීම වළක්වා ගත නොහැකි බව පාලකයින් සහ සියලු වගකිව යුත්තන් අවබෝධ කරගත යුතුය.
වෛද්‍යවරුන්ගේ බාධා කිරීමේ, රැදී සිටීමේ සහ ප්‍රවාහන (DAT) දීමනාව යාවත්කාලීන කිරීම, 22/99 චක්‍රලේඛනයට අන්තර්ග්‍රහණය කිරීම ඇතුළු ප්‍රවාහන ගැටළු විසඳීම, සීමාවාසික වෛද්‍යවරුන්ගේ සහ විදෙස් පුහුණුව ලබන පශ්චාත් උපාධි අධ්‍යයන වෛද්‍යවරුන්ගේ මාසික දීමනා ඉහල නැංවීම, නිල නිවාස පහසුකම් වැඩිදියුණු කිරීම ආදී යෝජනා ගණනාවක් රජයේ වෛද්‍ය නිලධාරීන්ගේ සංගමය විසින් සෞඛ්‍ය අමාත්‍යාංශයට ලබා දී ඇති අතර, ඒ මත පදනම් වූ නිශ්චිත වැඩපිළිවෙළක් ප්‍රකාශයට පත් කිරීම යුගයේ ප්‍රධාන අවශ්‍යතාවයකි. එහිදී ආර්ථික අර්බුදය හමුවේ වැඩියෙන්ම බලපෑමට ලක්වී ඇති නවක සහ කනිෂ්ඨ වෛද්‍යවරුන්ගේ ගැටලු කෙරෙහි සුවිශේෂී අවධානයක් යොමු විය යුතු බව අපගේ විශ්වාසයයි.
අයවැයෙන් යෝජිත අමතර රාජකාරි දීමනා සහ නිවාඩු දින දීමනා කප්පාදුව රට පුරා ගුණාත්මක රෝගී සත්කාරක සේවාවන් සමානාත්මතාවයෙන් යුතුව ලබා දීමටත් වෛද්‍ය සේවාවේ සුවිශේෂීතාවයටත් දැඩි අහිතකර බලපෑමක් ඇති කරන ලද ප්‍රතිපත්තිමය තීරණයක් බවත්, වෘත්තීය ගරුත්වය සහ වටිනාකම අවතක්සේරුවට ලක් වී ඇති බවත්, එම තීරණය වෙනස් කර නැවතත් අමතර රාජකාරි දීමනාවේ අගය මූලික වැටුපෙන් 1/80 ලෙසත්, නිවාඩු දින දීමනාවේ අගය මූලික වැටුපෙන් 1/20 ක් ලෙසත් කඩිනමින් සංශෝධනය විය යුතු බවත් රජයේ වෛද්‍ය නිලධාරීන්ගේ සංගමයේ මධ්‍යම කාරක සභාව අද දිනයේදි ඒකමතිකව තීරණය කරන ලදී.
එමෙන්ම වෛද්‍යවරුන් රට තුළ සහ නිදහස් සෞඛ්‍ය සේවාව තුළ රැඳී සිටීම දිරිමත් කිරීම සඳහා ශක්තිමත් වැඩපිළිවෙළක් සහ ප්‍රතිපත්ති මාලාවක් කාලරාමුවක් සහිතව ප්‍රකාශයට පත්විය යුතු බව ද මධ්‍යම කාරක සභාව තීරණය කරන ලදී.
උද්ගත වී ඇති ගැටලුකාරී තත්ත්වය සම්බන්ධයෙන් සාකච්ඡා කිරීම සඳහා ගරු ජනාධිපතිතුමන්ගෙන් කඩිනම් සාකච්ඡාවක් ඉල්ලා සිටීමට තීරණය වූ අතර සහ ඒ සඳහා ඍජුව මැදිහත් වන ලෙස ගරු සෞඛ්‍ය ඇමතිතුමන්ගෙන් ඉල්ලා සිටීමටද තීරණය විය. ඒ අනුව මෙම ගැටලුව සම්බන්ධයෙන් ගරු ජනාධිපතිතුමන් සහ සෞඛ්‍ය ඇමතිතුමන් ලිඛිතව දැනුවත් කරනු ඇත. මෙම ගැටලුව අර්බුදයක් කරා ගමන් කිරීමට ඉඩ නොදි විසඳා ගැනීම සඳහා ගරු ජනාධිපතිතුමන් කඩිනම් සාකච්ඡාවක් ලබා දෙනු ඇතැයි අපි බලාපොරොත්තු වෙමු.
වෛද්‍ය සේවාවට මෙතෙක් ලැබුණු ප්‍රතිලාභ සහ වරප්‍රසාද අත්තනෝමතික ලෙස කප්පාදු කිරීම හමුවේ ඇතිවූ මෙම ගැටලුව විසඳීමට කඩිනමින් අවශ්‍ය සාධනීය පියවර ගැනීමට පාලකයින් අපොහොසත් වන්නේ නම්, අවසානයේදී වෘත්තීය ක්‍රියාමාර්ග වලට වුවද යොමු වීමට සිදුවන බව ද රජයේ වෛද්‍ය නිලධාරීන්ගේ මධ්‍යම කාරක සභාව ඒකමතිකව තීරණය කරන ලදී.
සම්බන්ධිත පුවත් | Related News
ප්‍රධාන පුවත්
‘මේ අවුරුද්ද තුළ කිසිදු බදු අඩු කිරීමක් බැහැ’- මූල්‍ය අරමුදලෙන් රජයට කොන්දේසියක්
තමන් අත්අඩංගුවට ගෙන දිගු කලක් රදවා ගැනීමේ සූදානමක් ගැන ගම්මන්පිලගෙන් අනාවරණයක්..
ගාසා තීරය, ඉරානය හරහා ඉන්දියානු සාගරය වෙත එළඹෙන නව ලෝක යුධ වාතාවරණය ගැන ජාත්‍යන්තර භූගෝලීය විශ්ලේෂිකා ජිහාන් හමීඩ්ගෙන් අනතුරු ඇඟවීමක්..
ඊශ්‍රායලය සහ ඉරානය අතර පෙර නොවූ විරූ ගැටුම: මෙතෙක් අප දන්නා දේ
ඉරානයෙන් ඊශ්‍රායලයට දැවැන්ත බැලස්ටික් මිසයිල ප්‍රහාරයක්..
‘සීනි බද්ද රුපියල් 50 සිට ශත 25ක් තෙක් අඩු කිරීමේදී අපරාධමය වරදක් සිදුව නෑ’ - නීතිපති අධිකරණයට දන්වයි
රුසියානු ජාතික දිනය නිමිත්තෙන් ශ්‍රී ලංකාවේ රුසියානු තානාපතිතුමාගේ ප්‍රධානත්වයෙන් සැමරුම් උත්සවයක්..
ඊශ්‍රායල ප්‍රහාරයට 'දැඩි දඬුවම්' ලබා දෙනවා- ඉරානය සපථ කරයි.
විදුලි ගාස්තු වැඩිකිරීමට IMF කළ බලපෑම මෙන්න..
දරුවන් 60 ලක්ෂයක් වෙනුවෙන් කතාකළ කාන්තා පරපුර සංවිධානයට ජ්‍යෙෂ්ඨ නිතිඥ කල්‍යානන්ද තිරාණගම මහතාගෙන් මල් මිටක්..
ඊශ්‍රායල ගුවන් හමුදාව ඉරානයට "පූර්ව අනතුරු අඟවන" ප්‍රහාරයක් එල්ල කළා- ඊශ්‍රායල ආරක්ෂක අමාත්‍ය ඊශ්‍රායල් කැට්ස්
දරුවන්ගේ ආරක්ෂාව අනතුරේ හෙළා, සමරිසි අයිතීන් සුරකින නීති සංශෝධන එපා.. - ලක්මව දියණියෝ කියති..
ගෝඨාභයගෙන් බදුසහන ගත්තු අයම තමයි, ඔහු එලවන්න ගාලුමුවදොර බුරියානි බෙදුවේ.. - මහාපරිමාණ ජාවාරම්කාරයන් සහ ඩයස්පෝරාවේ සූක්ෂම මෙහෙයුම ගැන වෛද්‍ය වසන්ත බණ්ඩාරගෙන් අනාවරණයක්..
උතුරේ සිංහල ජනයාගේ හිමිකම් සහ අයිතිවාසිකම් සුරක්ෂිත කිරීමේ විද්වත් කථිකාව ජූලි 01 දා සවස 2 ට කොළඹ පුස්තකාල සේවා මණ්ඩල, ප්‍රලේඛන ශ්‍රවනාගාරයේ දී..
60 ලක්ෂයක දරුවන් අනාරක්ෂිත කරමින්, අධිකරණ ඇමැතිවරයාට බලපෑම් කර දණ්ඩනීති සංග්‍රහයේ 365, 365 (අ) වගන්ති සංශෝධනය කිරීමට මානව හිමිකම් කොමිසම දරණ උත්සාහයට කාන්තා පරපුර සංවිධානයේ විරෝධය..
දණ්ඩ නීති සංග්‍රහය සංශෝධනය කිරීම මගින් ළමා අපචාර සහ සමලිංගික ක්‍රියා ප්‍රචලිත කිරීම: ප්‍රවෘත්ති සාකච්ඡාව පිළිබඳව