දේශපාලන ඕනෑ එපාකම් වෙනුවෙන් රටේ බුද්ධි අංශ පාවාදීම සිදු නොකළ යුතුයි - උදය ගම්මන්පිල
දේශපාලන ඕනෑ එපාකම් වෙනුවෙන් මෙරට බුද්ධි අංශ පාවාදීම සිදු නොකල යුතු බව පිවිතුරු හෙළ උරුමයේ නායක නීතිඥ උදය ගම්මන්පිල මහතා පවසයි.
ඒ මහතා මේ බව සදහන් කර සිටියේ පාර්ලිමේන්තුවේ පැවති පාස්කු ප්රහාරය සම්බන්ධයෙන් වන විවාදයට එක් වෙමිනි. එහිදී වැඩිදුරටත් අදහස් දැක්වූ පිවිතුරු හෙළ උරුමයේ නායකයා මෙසේ අදහස් දැක්වීය.
රණවිරුවන් බුද්ධි අංශ පාවා දී ආණ්ඩු පෙරලා වැඩක් නෑ
අපි මේ ජනපීඩක ආණ්ඩුව පෙරළිය යුතුයි. ඒ ගැන කිසිම සැකයක් නෑ. පොහොට්ටුවට තුනෙන් දෙකේ බලයක් ලැබිලා එම බලය නිසා විපක්ෂයේ දෑස් නිලංකාර වී නිහඩව සිටින මොහොතක තමයි අපි ආණ්ඩුවේ වැරදි තීන්දු වලට අභියෝග කළේ. කුළුඳුල් අමාත්ය මණ්ඩල රැස්වීමේදී තමයි විසිවන ආණ්ඩුක්රම ව්යවස්ථා සංශෝධනය ඉදිරිපත් කිරීමට එරෙහිව කරුණු දැක්වුයේ. අපි ආණ්ඩුව පෙරලීමට එකඟයි. නමුත් ආණ්ඩුව පෙරලන්න හදන්නේ අහිංසක පාස්කු ප්රහාරයේ වින්දිතයන්ගේ ලේ සහ කඳුළු මතින් නම්, මේ ආණ්ඩුව පෙරලන්න යන්නේ රණවිරුවන් බුද්ධි අංශ පාවලා දීලා නම්, මේ ආණ්ඩුව පෙරලන්න යන්නේ ආගමික කණ්ඩායම් අතර ගැටුම් ඇතිකරලා ජනතාව අතර අවිශ්වාසය වපුරලා නම් අපි ඒකට එකඟ නෑ.
පාස්කු ප්රහාරය අතිශය සංවේදී ප්රශ්නයක්. බෞද්ධයන් ආරක්ෂාව බාරව සිටියදී ඉස්ලාමීය ත්රස්තවාදීන් කතෝලිකයන්ට ප්රහාර එල්ල කරලා තියෙනවා. ආගම් තුනක් ගෑවුණු ප්රශ්නයක් කියන්නේ සංවේදී ප්රශ්නයක්. අපි ඉතාම ප්රවේශමෙන් කළමනාකරණය කළ යුතු ප්රශ්නයක්. අන්න ඒ ප්රවේශම අපේ දේශපාලනඥයන්ට තියෙනවාද කියන එක මේ විවාදය පුරා අපිට දක්නට ලැබුණා.
පාස්කු ප්රහාරය සම්බන්ධයෙන් ඇමෙරිකාවේ FBI ආයතනයේ, ඕස්ට්රේලියාවේ පෙඩරල් පොලිසියේ සහාය අරගෙන අපේ පොලිසිය පරීක්ෂණ පවත්වලා අනූ තුන්දෙනෙකුට එරෙහිව චෝදනා ගොනුකරලා මේ වන විට නඩු පවතිනවා. පාස්කු ප්රහාරය සිදුවෙලා වසර දෙකයි මාස හතරක් ඇතුළත අපි චෝදනා ගොනු කරනවා.
ඇමරිකාවේ 9/ 11 ත්රස්ත ප්රහාරය පිළිබඳව චෝදනා ගොනු කරන්නේ ප්රහාරය සිදුවෙලා වසර හයයි මාස පහක් ගත වුණාට පස්සේ. ඒ වගේම 2015ව වර්ෂයේ නොවැම්බර් මස 13 වැනිදා ප්රංශයෙ පැරිස් නුවර සිදු වූ ත්රස්ත ප්රහාරයට විමර්ශන සිදු කරලා චෝදනා ගොනු කරන්නේ වසර පහයි මාස දහයක් ගියාට පස්සේ. අපට වඩා සම්පත් තියෙන, අපට වඩා තාක්ෂණය තියෙන, අපට වඩා බලයක් තිබෙන මේ රටවල් එක්ක සාපේක්ෂව බලද්දී අපේ පොලිසිය අපේ නිලධාරීන් අතිශය කාර්යක්ෂමව කටයුතු කරලා තියෙනවා.
එහෙමනම් යුක්තිය ඉටු කිරීම ප්රමාදයයි කියන්නේ ඇයි . අපේ කාඩිනල්තුමන් වසර කිහිපයක සිට මහා මොළකරු වා ගැන කතා කරනව. කතෝලික ඡන්ද කුට්ටිය ගැන බලාගෙන අපේ දේශපාලකයෝ සෙවිලක් බැලිල්ලක් නැතුව මහමොළකරුවෙකු ගැනම කතා කරනවා. කැලේ ගහක තල් ගෙඩියක් අත්තක් උඩට වැටෙන කොට නිදා හිටිය හාවෙක් බය වෙලා ඇහැරිලා ලෝකෙ පෙරලෙනවා කියලා දුවන්න පටන් ගත්තාලු.
කැලේ ඉන්න අනික් සත්තුත් හෙවිල්ලක් බැලිල්ලක් නැතුව මේ හාව පස්සෙන් ලෝකෙ පෙරළෙනවා කියලා දුවන්න පටන් ගත්තා. කැලේ හිටපු සිංහයා මේ සත්තුන්ව සිද්ධිය වෙච්ච තැනට එක්කන් ගිහිල්ලා, වැටිලා තියෙන්නේ තල් ගෙඩියක් බයවන්නට එපා කියලා ඒ සතුන්ගේ දිවිල්ල නතර කරලා තියෙන්නේ. පාස්කු ප්රහාරයේ මහ මොළකරු සොයමින් අපේ රටේ දේශපාලකයන් ඇතුලු බලවතුන් දුවන දිවිල්ල නතර කරන්න තාම සිංහයෙකු සොයාගන්න බැරි වෙච්ච එකයි අපට තියෙන ප්රශ්නය. එහෙම සිංහයෙකු නුදුරු අනාගතයේ බිහිවේවා කියලා අපි ප්රාර්ථනා කරනවා.
“සොනික් සොනික්” එළිදරව්වේ විපාක මොනවාද ?
ඒ වගේම මේ විවාදය පුරා කියවෙච්ච නමක් තමයි “සොනික් සොනික්”. බුද්ධි අංශ නිලධාරියෙකු ආරූඪ නමකින් ත්රස්තවාදින් සමග ගනුදෙනු කළා යැයි මෙම විවාදය පුරාම කියවුණා. බුද්ධි අංශ තොරතුරු ලබාගන්න වසර දහස් ගණනක් පැරණි ක්රමයක් තමයි සතුරු කඳවුරට මිතුරු ලෙසින් ඇතුළත් වී එහි තොරතුරු රහසේ ලබා ගැනීම. එවැනි බුද්ධි අංශ නිලධාරීන්ගේ ආරූඪ නම් සැබෑ නම් මෙහෙම පාර්ලිමේන්තු විවාද වල ප්රසිද්ධියේ කතා කරන්න ගත්තම බුද්ධි අංශ නිලධාරීන්ගේ ආරක්ෂාවට මොකද වෙන්නේ. ඔවුන් සිය ජීවිතත් අවධානමේ හෙළලා කරගෙන ගිය කටයුතුවලට මොකද වෙන්නේ ? ජාතික ආරක්ෂාවට මොකද වෙන්නේ?
ඉන්දියාවේ එක්තරා ප්රාන්තයක තිබුණු බෙදුම්වාදීත් ත්රස්තවාදී සංවිධායනයකට ඉන්දීය බුද්ධි අංශ නිලධාරියෙකු සම්බන්ධ වුණා. ටික කලකින් ඔහු ඒ බෙදුම්වාදී ත්රස්තවාදී සංවිධානයේ නායකයා බවට පත්වෙනවා. අන්තිමට ත්රස්ත සංවිධානය ඉන්දියානු රජය එක්ක සාකච්ඡා කරලා අවි බිම තබනවා. ඒක එහෙම සිදුවෙන්නේ අර බුද්ධි අංශ නිලධාරියා ත්රස්තවාදියෙකු ලෙසින් පෙනී සිටිමින් කටයුතු කළ නිසා.
ඇයි ඉන්දියාව. අපෙත් උදාහරණ තියෙනවා. කොටි දේශපාලන අංශ නායක තමිල් සෙල්වම් අපේ ගුවන් හමුදාව බෝම්බ දමලා ඔහුගේ කාර්යාලය තුළදීම ඝාතනය කළා. ඒ ප්රහාරය සිදු කරන්න තමිල් සෙල්ලම්ගේ කාර්යාලය තියෙන තැන දැන ගත්තාට මදි. බෝම්බය හෙළන මොහොත වන විට ඔහු එම කාර්යාලයේ සිටින බවත් දැනගෙනම ඉන්න ඕනෑ. ඒක කරන්න පුළුවන් වුණේ අපේ බුද්ධි නිලධාරීන් කොටි ත්රස්තවාදීන් ලෙස එම ත්රස්ත සංවිධානය ඇතුළේ ක්රියාත්මක වුණු නිසා. ඒ නිසා මෙම බුද්ධි නිලධාරීන්ගේ නම් ගම් ආරූඪ නම් ඔවුන් කරපු කියපු දේවල් පිළිබඳව විවාදයේදී දැන් පටන් වත් කතා කිරීමෙන් වළකින්න කියලා මාගේ ආදරණීය සහෝදර මන්ත්රීවරුන්ගෙන් ඉල්ලා සිටිනවා.
බුද්ධි අංශ නිලධාරියෙකු අපරාධයකට සම්බන්ධ යයි සැකයි නම් ඒ පිළිබඳව පොලිසිය කරන විමර්ශන පිළිබඳව විපක්ෂයක් විදියට සෑහීමකට පත්විය නොහැකි නම් අපට පුළුවන් තේරීම් කාරක සභාවක් පත්කරන්න. වෙනත් රටවල තියෙනවා බුද්ධි කටයුතු පිළිබඳ ස්ථාවර පාර්ලිමේන්තු කාරක සභාවක්. මේවාට සහභාගී වන සියලුම දෙනා රහස්ය දිවුරුමක් දීලා තමයි කමිටුවේ වාඩිවෙන්නෙ. මොකද බුද්ධි තොරතුරු පිටවීම ජාතික ආරක්ෂාවේ කොඳු නාරටිය බිඳ දැමීමක් කියන එක ගැන ඒ රටවල දේශපාලඥයන්ට අවබෝධයක් තිබුණා. අපේ රටේ දේශපාලනඥයන් කටයුතු කරන මේ වගකීම් විරහිත ආකාරය දැක්කහම මේ රට මේ ගානට තියෙන එක ගැන පුදුම වෙන්න ඕනෑ.
බුද්ධි අංශ දුර්වල කරනවා කියන්නේ ජාතික ආරක්ෂාව දුර්වල කරනවා කියන එකයි. 2001- 2004 ආණ්ඩුව බුද්ධි අංශ නිලධාරීන් අත්අඩංගුවට අරගෙන ඔවුන්ගේ සැබෑ නම් ම් පවා හෙළි කරා. ඒ නිසා කොටි සංවිධානයට පුළුවන් වුණා මේජර් මුතාලිෆ් වැනි දක්ෂ නිලධාරීන් පවා මරා දමන්න. මේජර් නිලාම් වැනි දක්ෂ නිලධාරීන් කලකිරිලා තමන්ගේ රට ගැන කලකිරිලා රට අත්හැරලා ගියා. අද කොටි ත්රස්තවාදය අවසන් වෙලා වසර 15ක් ගත වෙලා. මේජර් නිලාම් තවමත් මෙරටට ආවේ නෑ. මොකද ඔහුගේ හිතේ අපි ඇති කරපු තුවාලය තවමත් සුවපත් වෙලා නැහැ. ඒ වගේම 2015-2019 ආණ්ඩුව ආවා. ආයෙත් බුද්ධි අංශ දඩයම පටන් ගත්තා. නම් ගම් හෙළි කලා. අත්අඩංගුවට ගත්තා. තවත් බුද්ධි අංශ නිලධාරී රොත්තක් රට අතහැරලා ගියා. ප්රතිඵලය තමයි සහරාන්ගේ පාස්කු ප්රහාරය. ඒ නිසා බුද්ධි අංශ පිළිබඳව හෙළිදරව් කිරීම්, කරන කතා, කියන කතා වඩා ප්රෙව්සමෙන් කළ යුතුයි කියලා මම සිහිපත් කරනවා.
මහමොළකරු ගැන කියන හැමෝටම මම අනතුරු ඇඟවීමක්
මහමොළකරු ගැන කියන හැමෝටම මම අනතුරු ඇඟවීමක් කරනවා. තමන් මහෙමොළකරුවෙක් ගැන දන්නව නම් අර අත්අඩංගුවට අරගෙන ඉන්න චෝදනාවට ලක් කරලා තියෙන අනූතුන්දෙනාට අමතරව කවුරුහරි මේකට සම්බන්ධයි කියලා තොරතුරක් දන්නවා නම් කළ යුත්තේ මාධ්ය සංදර්ශන පැවැත්වීම නෙමෙයි වහා ඒ තොරතුර පොලිසියට ලබාදීමයි. ත්රසතවාදය වැළැක්වීමේ පනතේ 5 වගන්ති අනුව ත්රස්තවාදී ක්රියාවක් පිළිබඳ තොරතුරු දැනගෙන පොලිසයට ලබා නොදීම බරපතළ වැඩ සහිතව වසර 7ක් සිර දඬුවම් ලැබිය හැකි වරදක්. ඒ නිසා දන්න කෙනෙක් ඉන්නවනම් දන්න දෙයක් තියෙනවානම් ඒ තොරතුරු කරුණාකරලා පොලිසියට ලබා දෙන්න. පොලිසිය නිසි පියවර ගන්නේ නැත්නම් අන්න අපි එකට එකතු වෙලා එදාට පොලිසියට එරෙහිව කටයුතු කරන්න පුළුවන්.
අවසාන වශයෙන් මෛත්රීපාල ජනාධිපතිතුමාගේ ප්රකාශය පිළිබඳව වචනයක් කතා නොකළොත් ඒක ලොකු අඩුවක් වෙනවා. එතුමා මහමොළකරුවන් ගැන මේ ප්රහාරය පිටිපස්සේ ඉන්න අය ගැන දන්නවා කියලා ප්රකාශයක් සිදු කළා. පොලිසියට කරන්න ඕන ප්රකාශයක් මාධ්යවලට කළා. අපි කිව්වා වහාම ඔහුව අත්අඩංගුවට අරන් ප්රශ්න කරන්න කියලා. එතුමා ප්රකාශයක් ලබා දීලා තියෙනවා අපිට නොනිල වශයෙන් ලැබිලා තියෙන තොරතුරු අනුව සිරිසේන මහත්තයාගේ ප්රකාශයේ තියෙන්නේ බොරු. ඒ කියන කරුණු එකක්වත් තහවුරු කරන්න බැහැ. අසත්යයි කියල තහවුරු වෙලා තියෙනවා මේ වෙනකොට. හිටපු ජනාධිපතිවරයෙක් රටේ ජාතික ආරක්ෂාව විහිළුවට අරගෙන, මේ රටේ ජනතාව විහිළුවට අරගෙන රටේ පොලිසියත් විහිළුවට අරගෙන. හොද වෙලාවට මහේස්ත්රාත්තුමා මොලේ කල්පනා කරලා ජාතික ආරක්ෂාවට බලපාන කාරණයක් කියලා ලිපිගොනව සේප්පුවක දාලා යතුරු දාන්න තීරණය කළා. එහෙම නැත්නම් රට මේ වනවිටත් ගිනි අරං. මෙවැනි වගකීම් විරහිත ප්රකාශ කරමින් නැති ප්රශ්න ඇති කරන පුද්ගලයන් අත්අඩංගුවට ගන්න කියලා මම යෝජනා කරනවා.
– Media unit
සම්බන්ධිත පුවත් | Related News
ප්රධාන පුවත්
මේ පිරිමහන්නේ නන්දිකඩාල් පරාජයේ වෛරයයි.. මාලිමාවේ ඊබ්රාහිම් නිදොස් කොට රණවිරු සලේ පාස්කු පාස්කු ප්රහාරයේ “කුරුසය” මත තබා ඇන ගසන්නට ඉඩ නොදෙනු! - විමල්ගෙන් සටහනක්
සලේ වෙනුවෙන් අද සිට අඛණ්ඩ සත්යග්රහයක්..
සුරේෂ් සලේ රෝගී තත්ත්වයකින් කොළඹ ජාතික රෝහලට..
වීදුරු ගෙවල් වල හිඳිමින් අනුන්ට ගල් ගහන්න එපා!- ශ්රී ලංකාවේ රුසියානු තානාපතිගෙන් ශ්රී ලංකාවේ යුරෝපා සංගමයේ නියෝජිතයන්ට අවවාදයක්
යාපනයේ ජාතිවාදය අවුස්සන හැටි මෙන්න.. ආණ්ඩුව මොකද කියන්නේ? - අරුන් සිද්ධාර්ත්
ආණ්ඩුවේ ආයුෂ උතුරු නැගෙනහිර පළාත් සභා ඡන්දය තියන තුරු විතරයි.. - වෛද්ය වසන්ත බණ්ඩාර
මනෝගෙන් අතිශය ආන්දෝලනාත්මක ප්රකාශයක්..- පළාත් සභා උභතෝකෝටිකය!
මහ බැංකුව වගකීම් විරහිත ආයතනයක් වෙලා.. මහ බැංකු අධිපති පැනල යන බව කළින් කියා පැනල යයිද? - විමල් ප්රශ්න කරයි..
ඇමරිකා අලුත් බද්දෙන් ලංකාව අමාරුවේ..- ලංකා වාණිජ මණ්ඩලය
මහා සංඝරත්නයට, සම්බුද්ධ සාසනයට ද්වේෂසහගතව අගෞරව කිරීම පිළිබඳව කුප්රකට
ගම්මන්පිල සහ ඉන්දීය නීති සමාගමේ පාලන හවුල්කරු සුරනා අතර හමුවක්.. සාකච්ඡාව පිටුපස සැඟවුනු ඉන්දීය න්යාය පත්රයක් තිබුනාද?
චීනය සහ ශ්රී ලංකාව දේශසීමා හරහා සිදුවන මාර්ගගත සූදු හා විදුලි සංදේශ වංචා මර්දනය කිරීමට දැඩිව එක්ව ක්රියා කරනවා!-ශ්රී ලංකාවේ චීන තානාපති කාර්යාලය
චීන ජනපති ලබන සතියේදී උතුරු කොරියාවේ සංචාරයකට සැරසෙයි..
සිංහල ජාතිකවාදී රාජ්ය ජාතිය ආගම පදනම්කර ගෙන වර්ග සංහාරයක් සිදුකළා.. දෙමළ ජනතාවට එරෙහිව වර්ග සංහාරයක් සිදුකළා කියලා උතුරු පළාත් සභා ප්රකාශනයෙන් කියවෙනවා.. - ජීවන්ත පීරිස් පූජකවරයා යළිත් කියයි..
භාණ්ඩාගාර කොල්ලය ගැන භාණ්ඩාගාර වාර්ෂික වාර්තාවේ කිසිම සඳහනක් නෑ.. - රජිත් කීර්ති තෙන්නකෝන්
සහල් ආනයනය කරන්නේ ජනතාවට සහන සැලසීමේ අරමුණින් නොවේ.. නිලධාරීන්ගේ සහ ඇමතිවරුන්ගේ අතයට කොමිස් ලබාගැනීමේ "ජානගත බැඳීමක්" නිසා.. - ජාතික ගොවිජන එකමුතුවෙන් චෝදනා